ಬ್ರೇಕಿಂಗ್‌ | ತೀವ್ರ ವಿರೋಧದ ಬೆನ್ನಲ್ಲೇ ಕೃತಿ ಸನೋನ್ ಅಭಿನಯದ ರಾಖಿ ಜಾಹೀರಾತು ಹಿಂಪಡೆದ ‘ಜಿವಾ’ ಸಂಸ್ಥೆ

ತೀವ್ರ ವಿರೋಧ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿನ ಆಕ್ರೋಶದ ಹಿನ್ನೆಲೆಯಲ್ಲಿ, ಬಾಲಿವುಡ್ ನಟಿ ಕೃತಿ ಸನೋನ್ ಕಾಣಿಸಿಕೊಂಡಿದ್ದ ರಕ್ಷಾಬಂಧನದ ಜಾಹೀರಾತನ್ನು ಪ್ರಸಿದ್ಧ ಆಭರಣ ಬ್ರ್ಯಾಂಡ್ ‘ಜಿವಾ’ (GIVA) ಹಿಂಪಡೆದುಕೊಂಡಿದೆ.

ಈ ಜಾಹೀರಾತಿನಲ್ಲಿ ಕೃತಿ ಸನೋನ್ ಧರಿಸಿದ್ದ ಉಡುಪು ಮತ್ತು ತಮ್ಮ ಸಾಕು ನಾಯಿಗೆ ರಾಖಿ ಕಟ್ಟಿದ್ದ ದೃಶ್ಯದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ ಹಾಗೂ ಟೀಕೆಗಳು ವ್ಯಕ್ತವಾಗಿದ್ದವು. ನಟಿ ಮತ್ತು ಬಿಜೆಪಿ ಸಂಸದೆ ಕಂಗನಾ ರಣಾವತ್ ಕೂಡ “ಬಿಕಿನಿ ಧರಿಸಿ ಸಹೋದರನಿಗೆ ರಾಖಿ ಕಟ್ಟುತ್ತಾರೆಯೇ?” ಎಂದು ಕೃತಿ ಅವರ ಉಡುಪಿನ ಆಯ್ಕೆಯನ್ನು ಕಟುವಾಗಿ ಟೀಕಿಸಿದ್ದರು. ಅಲ್ಲದೆ, ನಾಯಿಗೆ ರಾಖಿ ಕಟ್ಟುವ ಮೂಲಕ ಹಿಂದೂ ಹಬ್ಬದ ಸಂಪ್ರದಾಯವನ್ನು ಕಡೆಗಣಿಸಲಾಗಿದೆ ಎಂದು ಕೆಲವರು ಆಕ್ಷೇಪಿಸಿದ್ದರು.

ಇದಕ್ಕೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ್ದ ಕೃತಿ ಸನೋನ್, ಸಂಸ್ಕೃತಿ ಮತ್ತು ಸಂಪ್ರದಾಯಗಳು ಮನಸ್ಸಿನಲ್ಲಿರುತ್ತವೆಯೇ ಹೊರತು ಮಹಿಳೆಯರು ಧರಿಸುವ ಬಟ್ಟೆಯಲ್ಲಿಲ್ಲ ಎಂದು ಪ್ರತಿಪಾದಿಸಿದ್ದರು. ಅಲ್ಲದೆ ಸಾಕುಪ್ರಾಣಿಗಳೂ ಕುಟುಂಬದ ಭಾಗವೇ ಆಗಿರುವುದರಿಂದ ರಕ್ಷಾಬಂಧನದ ಆಚರಣೆಯಲ್ಲಿ ಅವುಗಳನ್ನು ಸೇರಿಸಿಕೊಂಡಿರುವುದನ್ನು ಅವರು ಸಮರ್ಥಿಸಿಕೊಂಡಿದ್ದರು. ಆದರೆ, ವಿವಾದ ತಾರಕಕ್ಕೇರಿದ ಬೆನ್ನಲ್ಲೇ ‘ಜಿವಾ’ ಸಂಸ್ಥೆಯು ಈ ಜಾಹೀರಾತನ್ನು ಎಲ್ಲಾ ವೇದಿಕೆಗಳಿಂದ ಅಧಿಕೃತವಾಗಿ ಹಿಂಪಡೆದಿದೆ.