ಆರ್ಥಿಕ ಅಸಮಾನತೆಯ ಪ್ರತಿಬಿಂಬ: ಭಾರತದಲ್ಲಿ ಬೆಳೆಯುತ್ತಿದೆ ಬಿಲಿಯನೇರ್‌ಗಳ ಪಡೆ, ಕುಸಿಯುತ್ತಿದೆ ಸಾಮಾನ್ಯನ ಕೊಳ್ಳುವ ಶಕ್ತಿ

ದೇಶದಲ್ಲಿ ಬೆಲೆ ಏರಿಕೆಯಿಂದ ಸಾಮಾನ್ಯ ಜನರ ಆದಾಯ ಕಡಿಮೆಯಾಗುತ್ತಿದ್ದರೆ, ಮತ್ತೊಂದೆಡೆ ಅತಿ ಶ್ರೀಮಂತರ ಸಂಖ್ಯೆ ಭಾರೀ ಪ್ರಮಾಣದಲ್ಲಿ ಹೆಚ್ಚುತ್ತಿದೆ. ಜಾಗತಿಕವಾಗಿ ಭೌಗೋಳಿಕ ರಾಜಕೀಯ ಅನಿಶ್ಚಿತತೆಗಳು, ಬಡ್ಡಿದರಗಳ ಏರಿಕೆಯ ಭೀತಿ ಮತ್ತು ಆರ್ಥಿಕ ಅಸಮಾನತೆಗಳಿದ್ದರೂ, ವಿಶ್ವದಾದ್ಯಂತ ಶ್ರೀಮಂತರ ಸಂಖ್ಯೆ ಗಣನೀಯವಾಗಿ ಹೆಚ್ಚುತ್ತಿದೆ ಎಂದು ಅಂತರರಾಷ್ಟ್ರೀಯ ಆಸ್ತಿ ಸಲಹೆಗಾರ ‘ನೈಟ್ ಫ್ರಾಂಕ್’ ಇತ್ತೀಚಿನ ವರದಿಯಲ್ಲಿ ಬಹಿರಂಗಪಡಿಸಿದೆ.

ಈ ವರದಿಯ ಪ್ರಕಾರ, ದೇಶದಲ್ಲಿ ಬಿಲಿಯನೇರ್‌ಗಳ (ಕುಬೇರರು) ಸಂಖ್ಯೆ ಮುಂದಿನ ಐದು ವರ್ಷಗಳಲ್ಲಿ ಶೇ. 51ರಷ್ಟು ಏರಿಕೆಯಾಗಿ 313ಕ್ಕೆ ತಲುಪಲಿದೆ. 2026ರ ಆರಂಭದಲ್ಲಿ 207ರಷ್ಟಿದ್ದ ಈ ಸಂಖ್ಯೆ, 2031ರ ವೇಳೆಗೆ ಭಾರಿ ಏರಿಕೆ ಕಾಣಲಿದೆ. ಈ ಬೆಳವಣಿಗೆಯ ದರವು ಜಾಗತಿಕ ಆರ್ಥಿಕ ಶಕ್ತಿಗಳಾದ ಚೀನಾ (ಶೇ. 20) ಮತ್ತು ಅಮೆರಿಕ (ಶೇ. 12)ಕ್ಕಿಂತ ಅಧಿಕವಾಗಿರುವುದು ಗಮನಾರ್ಹ.

ಬಿಲಿಯನೇರ್‌ಗಳು ಮಾತ್ರವಲ್ಲದೆ, ಸುಮಾರು 250 ಕೋಟಿ ರೂಪಾಯಿಗಿಂತ ಹೆಚ್ಚು ಆಸ್ತಿ ಹೊಂದಿರುವ ‘ಅಲ್ಟ್ರಾ ರಿಚ್’ ವ್ಯಕ್ತಿಗಳ ಸಂಖ್ಯೆಯೂ ಭಾರತದಲ್ಲಿ 25,217ಕ್ಕೆ ತಲುಪಲಿದೆ ಎಂದು ವರದಿ ಅಂದಾಜಿಸಿದೆ. ಪ್ರಸ್ತುತ ಜಾಗತಿಕ ಬಿಲಿಯನೇರ್‌ಗಳಲ್ಲಿ ಭಾರತದ ಪಾಲು ಶೇ. 6.7ರಷ್ಟಿದ್ದರೆ, 2031ರ ವೇಳೆಗೆ ಇದು ಶೇ. 8ಕ್ಕೆ ಏರಲಿದೆ. ಅಮೆರಿಕ 914 ಬಿಲಿಯನೇರ್‌ಗಳೊಂದಿಗೆ ಮೊದಲ ಸ್ಥಾನದಲ್ಲಿದ್ದರೆ, ಚೀನಾ 485 ಮಂದಿಯೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಭಾರತ 207 ಬಿಲಿಯನೇರ್‌ಗಳೊಂದಿಗೆ ವಿಶ್ವದಲ್ಲಿ ಮೂರನೇ ಸ್ಥಾನದಲ್ಲಿದೆ. ಕಳೆದ ಐದು ವರ್ಷಗಳಲ್ಲಿ ಸರಾಸರಿ ಪ್ರತಿದಿನ 89 ಮಂದಿ ಅಲ್ಟ್ರಾ ರಿಚ್ ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ.

ಸಾಮಾನ್ಯವಾಗಿ 30 ದಶಲಕ್ಷ ಡಾಲರ್ (ಸುಮಾರು 250 ಕೋಟಿ ರೂ.)ಗಿಂತ ಹೆಚ್ಚು ನಿವ್ವಳ ಆಸ್ತಿ ಹೊಂದಿರುವವರನ್ನು ‘ಅಲ್ಟ್ರಾ ರಿಚ್’ ಎಂದು ಕರೆಯಲಾಗುತ್ತದೆ. 2021ರಲ್ಲಿ ವಿಶ್ವದಾದ್ಯಂತ ಈ ಸಂಖ್ಯೆ 5.51 ಲಕ್ಷವಾಗಿದ್ದರೆ, ಪ್ರಸ್ತುತ 7,13,626ಕ್ಕೆ ಏರಿದೆ. ಭಾರತದಲ್ಲಿ ಪ್ರಸ್ತುತ 19,877 ಅಲ್ಟ್ರಾ ರಿಚ್ ವ್ಯಕ್ತಿಗಳಿದ್ದು, ಮುಂದಿನ ಐದು ವರ್ಷಗಳಲ್ಲಿ ಈ ಸಂಖ್ಯೆ 25,217ಕ್ಕೆ ತಲುಪಲಿದೆ. ಈ ಪಟ್ಟಿಯಲ್ಲಿ ಭಾರತ ವಿಶ್ವದಾದ್ಯಂತ ಆರನೇ ಸ್ಥಾನದಲ್ಲಿದೆ.

ಶ್ರೀಮಂತರು ತಮ್ಮ ಸಂಪತ್ತನ್ನು ಕೇಂದ್ರೀಕರಿಸಲು ರಿಯಲ್ ಎಸ್ಟೇಟ್ ಅನ್ನು ಪ್ರಮುಖ ಮಾರ್ಗವಾಗಿ ಆರಿಸಿಕೊಂಡಿದ್ದಾರೆ. ಪ್ರತಿಯೊಬ್ಬ ಅತಿ ಶ್ರೀಮಂತ ವ್ಯಕ್ತಿಯು ಸರಾಸರಿ 3.7 ನಿವಾಸಗಳನ್ನು ಹೊಂದಿದ್ದಾನೆ. ಅವರ ಒಟ್ಟು ಸಂಪತ್ತಿನ ಶೇ. 21ರಷ್ಟು ಪಾಲು ವಾಣಿಜ್ಯ ರಿಯಲ್ ಎಸ್ಟೇಟ್‌ನಲ್ಲಿದೆ.

ದೇಶದಲ್ಲಿ ಬಿಲಿಯನೇರ್‌ಗಳ ಸಂಖ್ಯೆ ಹೆಚ್ಚಾಗುತ್ತಿರುವ ನಡುವೆಯೇ, ಹಣದುಬ್ಬರದ ಹೊಡೆತಕ್ಕೆ ಸಾಮಾನ್ಯ ಜನರ ಆದಾಯ ಕರಗಿಹೋಗುತ್ತಿದೆ. ವಸತಿಗಳ ಬೆಲೆ ಹೆಚ್ಚಳದಿಂದಾಗಿ ಪ್ರಮುಖ ನಗರಗಳಲ್ಲಿ ಸಾಮಾನ್ಯ ಜನರ ಕೊಳ್ಳುವ ಶಕ್ತಿ ಕಡಿಮೆಯಾಗುತ್ತಿದೆ. ದೇಶದ ವೃದ್ಧಿ ದರವು ಅಂಕಿಅಂಶಗಳಲ್ಲಿ ಕಾಣುತ್ತಿದ್ದರೂ, ಅದರ ಫಲವು ಕೆಳವರ್ಗದ ಜನರಿಗೆ ತಲುಪುತ್ತಿಲ್ಲ ಎಂದು ಆರ್ಥಿಕ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಸಂಪತ್ತು ಕೆಲವೇ ಜನರ ಕೈಯಲ್ಲಿ ಕೇಂದ್ರೀಕೃತವಾಗುತ್ತಿರುವುದರಿಂದ ಸಮಾಜದಲ್ಲಿ ಆರ್ಥಿಕ ಅಂತರ ಹೆಚ್ಚುತ್ತಿದೆ ಎಂದು ಅನೇಕ ವರದಿಗಳು ತಿಳಿಸಿವೆ.