ಪಾಸ್‌ಪೋರ್ಟ್ ಸೂಚ್ಯಂಕದಲ್ಲಿ ಮತ್ತಷ್ಟು ಕುಸಿದ ಭಾರತ

ದೆಹಲಿ: ಜಾಗತಿಕ ಪಾಸ್‌ಪೋರ್ಟ್ ಸೂಚ್ಯಂಕದ (GPI) ಐದನೇ ಆವೃತ್ತಿಯಲ್ಲಿ ಭಾರತೀಯ ಪಾಸ್‌ಪೋರ್ಟ್ ಕಳೆದ ವರ್ಷಕ್ಕೆ ಹೋಲಿಸಿದರೆ ಒಂದು ಸ್ಥಾನ ಕುಸಿತ ಕಂಡು 125ನೇ ರ್ಯಾಂಕ್ ಪಡೆದಿದೆ. ಗ್ಲೋಬಲ್ ಸಿಟಿಜನ್ ಸಲ್ಯೂಷನ್ಸ್ ಪ್ರಕಟಿಸಿದ ವರದಿಯ ಪ್ರಕಾರ, ಪಾಸ್‌ಪೋರ್ಟ್‌ನ ಒಟ್ಟು ಮೌಲ್ಯವನ್ನು ಜಾಗತಿಕ ಪ್ರಯಾಣ, ಹೂಡಿಕೆ ಸಾಮರ್ಥ್ಯ ಮತ್ತು ಜೀವನದ ಗುಣಮಟ್ಟದಂತಹ ಅಂಶಗಳನ್ನು ಪರಿಗಣನೆಗೆ ತೆಗೆದುಕೊಂಡು 197 ದೇಶಗಳಿಗೆ ಈ ರ‍್ಯಾಂಕಿಂಗ್ ನೀಡಲಾಗಿದೆ.

ಸ್ವೀಡನ್ ಪಾಸ್‌ಪೋರ್ಟ್ ಅಗ್ರಸ್ಥಾನದಲ್ಲಿದೆ. ಉತ್ತಮ ಪ್ರಯಾಣ ಸೂಚ್ಯಂಕದಲ್ಲಿ ಭಾರತ 136ನೇ ರ‍್ಯಾಂಕ್, ಜೀವನದ ಗುಣಮಟ್ಟ ಸೂಚ್ಯಂಕದಲ್ಲಿ 118ನೇ ರ‍್ಯಾಂಕ್ ಮತ್ತು ಹೂಡಿಕೆ ಸೂಚ್ಯಂಕದಲ್ಲಿ 94ನೇ ರ‍್ಯಾಂಕ್ ಪಡೆದಿದೆ. ಹೂಡಿಕೆ ಸೂಚ್ಯಂಕವು ಒಂದು ದೇಶದ ಆರ್ಥಿಕತೆಯು ಹೂಡಿಕೆಗಳಿಗೆ ಮತ್ತು ವ್ಯಾಪಾರ ಅವಕಾಶಗಳಿಗೆ ಎಷ್ಟರ ಮಟ್ಟಿಗೆ ಸೂಕ್ತವಾದ ತಾಣವಾಗಿದೆ ಎಂಬುದನ್ನು ವಿವರಿಸುತ್ತದೆ.

ಭಾರತದ ಪಾಸ್‌ಪೋರ್ಟ್‌ನೊಂದಿಗೆ 26 ದೇಶಗಳಿಗೆ ವೀಸಾ ಇಲ್ಲದೆ ಪ್ರಯಾಣಿಸಬಹುದು ಎಂದು ವರದಿ ತಿಳಿಸಿದೆ. ಆದರೆ ಭಾರತೀಯ ನಾಗರಿಕರು 88 ದೇಶಗಳಿಗೆ ಭೇಟಿ ನೀಡಬೇಕಾದರೆ ಇಂದಿಗೂ ವೀಸಾ ಅಗತ್ಯವಿದೆ ಎಂದು ಅದು ಬಹಿರಂಗಪಡಿಸಿದೆ.