ಹೊಸ ಗರ್ಭನಿರೋಧಕ ಸಾಧನವಾಗಿ ಮಾರ್ಪಾಡಾದ ಐಫೋನ್?!: ಸಂತಾನೋತ್ಪತ್ತಿ ದರ ಕುಸಿತಕ್ಕೆ ಸ್ಮಾರ್ಟ್‌ಫೋನ್‌ಗಳೇ ಕಾರಣ ಎಂದ ಜಾಗತಿಕ ಸಂಶೋಧನೆ!

ದೆಹಲಿ: ಜಗತ್ತಿನಾದ್ಯಂತ ಇತ್ತೀಚಿನ ವರ್ಷಗಳಲ್ಲಿ ಜನನ ಪ್ರಮಾಣವು ತೀವ್ರವಾಗಿ ಕುಸಿಯುತ್ತಿದೆ. ಆದರೆ, ಇದಕ್ಕೆ ಯಾವುದೇ ಆರ್ಥಿಕ ಬಿಕ್ಕಟ್ಟು ಅಥವಾ ಕಾಯಿಲೆಗಳಿಗಿಂತ ಹೆಚ್ಚಾಗಿ, 2007ರಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಟ್ಟ ಆಪಲ್ ಸಂಸ್ಥೆಯ ‘ಐಫೋನ್’ ಪ್ರಮುಖ ಕಾರಣವಿರಬಹುದು ಎಂದು ಇತ್ತೀಚಿನ ಕೆಲವು ಹೊಸ ಅಧ್ಯಯನಗಳು ಬಹಿರಂಗಪಡಿಸಿವೆ.

ಐಫೋನ್ ಆವಿಷ್ಕಾರಗೊಂಡ 2007ರ ನಂತರದ ವರ್ಷಗಳಲ್ಲಿ ಜಗತ್ತಿನ ಶ್ರೀಮಂತ ಹಾಗೂ ಬಡ ರಾಷ್ಟ್ರಗಳೆಂಬ ಯಾವುದೇ ಭೇದವಿಲ್ಲದೆ ಎಲ್ಲೆಡೆ ಜನನ ಪ್ರಮಾಣವು ಗಣನೀಯವಾಗಿ ಇಳಿಕೆಯಾಗಲು ಪ್ರಾರಂಭಿಸಿದೆ ಎಂದು ಸಂಶೋಧನೆಗಳು ತಿಳಿಸಿವೆ. ಸಾಮಾನ್ಯವಾಗಿ ಇತಿಹಾಸದ ದಾಖಲೆಗಳನ್ನು ಗಮನಿಸಿದರೆ, ಯಾವುದೇ ಒಂದು ದೇಶ ಅಥವಾ ಸಮಾಜದಲ್ಲಿ ಜನರ ಜೀವನಮಟ್ಟ ಸುಧಾರಿಸಿದಾಗ ಜನನ ಪ್ರಮಾಣ ಕುಸಿಯುವುದು ಸಹಜ ಪ್ರಕ್ರಿಯೆ. ಆದರೆ, ಕಳೆದ ಎರಡು ದಶಕಗಳಲ್ಲಿ ಸಂಶೋಧಕರು ವಿಭಿನ್ನವಾದ ಹೊಸ ಬೆಳವಣಿಗೆಯನ್ನು ಗಮನಿಸಿದ್ದಾರೆ. ವಿವಿಧ ದೇಶಗಳಲ್ಲಿ ಸಾಮಾಜಿಕ ಮತ್ತು ಆರ್ಥಿಕ ಪರಿಸ್ಥಿತಿಗಳು ವಿಭಿನ್ನವಾಗಿದ್ದರೂ, 2007ರಿಂದ ಜಗತ್ತಿನಾದ್ಯಂತ ಏಕರೂಪವಾಗಿ ಜನನ ಪ್ರಮಾಣ ಕುಸಿಯುತ್ತಿರುವುದು ಕಂಡುಬಂದಿದೆ. ಇದಕ್ಕೆ ಕಾರಣಗಳನ್ನು ಹುಡುಕ ಹೊರಟಾಗ, ಸ್ಮಾರ್ಟ್‌ಫೋನ್‌ಗಳ ಅತಿಯಾದ ಬಳಕೆಯೇ ಇದಕ್ಕೆ ನೇರ ಕಾರಣ ಎಂಬ ಅಂಶ ಬೆಳಕಿಗೆ ಬಂದಿದೆ.

ನೆಟ್‌ವರ್ಕ್ ಕನೆಕ್ಟಿವಿಟಿ ಆಧಾರಿತ ಸಂಶೋಧನೆ: ಅಮೆರಿಕದ ‘ನ್ಯಾಷನಲ್ ಬ್ಯೂರೋ ಆಫ್ ಎಕನಾಮಿಕ್ ರಿಸರ್ಚ್’ ಬಿಡುಗಡೆ ಮಾಡಿರುವ ವರದಿಯ ಪ್ರಕಾರ, ಅಮೆರಿಕದಲ್ಲಿ 1980 ರಿಂದ 2007ರ ಅವಧಿಯಲ್ಲಿ ಪ್ರತಿ 1000 ಮಹಿಳೆಯರ ಸರಾಸರಿ ಸಂತಾನೋತ್ಪತ್ತಿ ದರವು 65 ರಿಂದ 70 ರಷ್ಟಿತ್ತು. ಆದರೆ, 2007ರ ನಂತರ ಇದು ವೇಗವಾಗಿ ಕುಸಿಯುತ್ತಾ ಬಂದು 2024ರ ವೇಳೆಗೆ 54 ಕ್ಕೆ ತಲುಪಿದೆ. ಅಂದರೆ ಕೇವಲ 17 ವರ್ಷಗಳ ಅವಧಿಯಲ್ಲಿ ಶೇಕಡಾ 22 ರಷ್ಟು ಇಳಿಕೆ ದಾಖಲಾಗಿದೆ.

ಅಮೆರಿಕದಲ್ಲಿ 2007ರ ಜೂನ್ ತಿಂಗಳಿನಲ್ಲಿ ಐಫೋನ್ ಬಿಡುಗಡೆಯಾಯಿತು. ಆ ಸಮಯದಲ್ಲಿ 2011ರವರೆಗೆ ಐಫೋನ್ ಕೇವಲ ‘ಎಟಿ ಆಂಡ್ ಟಿ’ (AT&T) ನೆಟ್‌ವರ್ಕ್ ಮೂಲಕ ಮಾತ್ರ ಗ್ರಾಹಕರಿಗೆ ಲಭ್ಯವಿತ್ತು. ಸಂಶೋಧಕರು ಈ ನೆಟ್‌ವರ್ಕ್ ಲಭ್ಯತೆಯ ಆಧಾರದ ಮೇಲೆ ಅಧ್ಯಯನ ನಡೆಸಿದಾಗ ಒಂದು ಆಶ್ಚರ್ಯಕರ ಸಂಗತಿ ಬಯಲಾಗಿದೆ. ಈ ಹೈಸ್ಪೀಡ್ ನೆಟ್‌ವರ್ಕ್ ಸೌಲಭ್ಯವಿಲ್ಲದ ಅಮೆರಿಕದ ಗ್ರಾಮೀಣ ಭಾಗಗಳಲ್ಲಿ ಜನನ ಪ್ರಮಾಣವು ಎಂದಿನಂತೆ ಸಾಮಾನ್ಯವಾಗಿತ್ತು. ಆದರೆ, ನೆಟ್‌ವರ್ಕ್ ಸೌಲಭ್ಯವಿದ್ದ ನಗರ ಪ್ರದೇಶಗಳಲ್ಲಿ 15 ರಿಂದ 19 ವರ್ಷದೊಳಗಿನ ಯುವತಿಯರಲ್ಲಿ ಜನನ ಪ್ರಮಾಣ ಶೇಕಡಾ 4.5 ರಿಂದ 8 ರಷ್ಟು ಮತ್ತು 20 ರಿಂದ 24 ವರ್ಷದೊಳಗಿನವರಲ್ಲಿ ಶೇಕಡಾ 3.2 ರಿಂದ 6 ರಷ್ಟು ಕುಸಿದಿರುವುದು ಕಂಡುಬಂದಿದೆ. ಒಟ್ಟಾರೆಯಾಗಿ 2007 ರಿಂದ 2024ರ ಅವಧಿಯಲ್ಲಿ 15-19 ವರ್ಷದೊಳಗಿನವರಲ್ಲಿ ಜನನ ಪ್ರಮಾಣವು ಬರೋಬ್ಬರಿ ಶೇಕಡಾ 70 ರಷ್ಟು, 20-24 ವರ್ಷದವರಲ್ಲಿ ಶೇಕಡಾ 47 ರಷ್ಟು ಮತ್ತು 30-34 ವರ್ಷದವರಲ್ಲಿ ಶೇಕಡಾ 7 ರಷ್ಟು ಕುಸಿದಿದೆ ಎಂದು ವರದಿ ತಿಳಿಸಿದೆ.

ವಿಶ್ವದಾದ್ಯಂತ ಇದೇ ಪರಿಸ್ಥಿತಿ – ಕಾರಣವೇನು?: ಜನನ ಪ್ರಮಾಣ ಕುಸಿತಕ್ಕೆ ಕೇವಲ ಐಫೋನ್ ಒಂದೇ ಕಾರಣವಲ್ಲದಿದ್ದರೂ, ಸ್ಮಾರ್ಟ್‌ಫೋನ್‌ಗಳ ಪ್ರಭಾವವೇ ಅತ್ಯಂತ ಪ್ರಮುಖವಾದುದು ಎಂದು ವಿಜ್ಞಾನಿಗಳು ಸ್ಪಷ್ಟಪಡಿಸಿದ್ದಾರೆ. ಹ್ಯಾಂಡ್‌ಸೆಟ್‌ಗಳು ಮತ್ತು ಸ್ಮಾರ್ಟ್‌ಫೋನ್‌ಗಳು ಜನರ ಕೈ ಸೇರಿದ ನಂತರ, ದಂಪತಿಗಳು ಹಾಗೂ ಯುವ ಪೀಳಿಗೆಯು ಪರಸ್ಪರ ಭೌತಿಕವಾಗಿ ಮತ್ತು ಸ್ನೇಹಿತರೊಂದಿಗೆ ಕಳೆಯುವ ಸಮಯವನ್ನು ತೀರಾ ಕಡಿಮೆ ಮಾಡಿದ್ದಾರೆ. ಇದರಿಂದಾಗಿ ದಂಪತಿಗಳ ನಡುವೆ ಲೈಂಗಿಕ ಕ್ರಿಯೆಯ ಪ್ರಮಾಣವು ಗಣನೀಯವಾಗಿ ಕಡಿಮೆಯಾಗಿದ್ದು, ಜನರು ಹೆಚ್ಚಾಗಿ ಇಂಟರ್ನೆಟ್ ಹಾಗೂ ಅಶ್ಲೀಲ ಚಿತ್ರಗಳ (ಪೋರ್ನೋಗ್ರಫಿ) ಕಡೆಗೆ ಆಕರ್ಷಿತರಾಗುತ್ತಿದ್ದಾರೆ ಎಂದು ವಿಶ್ಲೇಷಿಸಲಾಗಿದೆ.

ಅಮೆರಿಕದ ಸಿನ್ಸಿನಾಟಿ ವಿಶ್ವವಿದ್ಯಾಲಯದ ಅರ್ಥಶಾಸ್ತ್ರಜ್ಞರು ವಿಶ್ವಬ್ಯಾಂಕ್‌ನ ದತ್ತಾಂಶಗಳನ್ನು (World Bank Data) ಬಳಸಿ ಜಗತ್ತಿನ 128 ದೇಶಗಳಲ್ಲಿ ಸ್ಮಾರ್ಟ್‌ಫೋನ್ ಬಳಕೆ ಮತ್ತು ಯುವತಿಯರ ಸಂತಾನೋತ್ಪತ್ತಿ ದರದ ಮೇಲಿನ ಪ್ರಭಾವದ ಕುರಿತು ಮತ್ತೊಂದು ಸಮೀಕ್ಷೆ ನಡೆಸಿದ್ದಾರೆ. ಈ ದೇಶಗಳಲ್ಲಿ ವಿಭಿನ್ನ ಆರೋಗ್ಯ ವ್ಯವಸ್ಥೆ, ಗರ್ಭಪಾತ ನಿರೋಧಕ ಕಟ್ಟುನಿಟ್ಟಿನ ಕಾನೂನುಗಳು, ಧಾರ್ಮಿಕ ಸಂಪ್ರದಾಯಗಳು ಮತ್ತು ಹಣದುಬ್ಬರ ಇದ್ದಾಗ್ಯೂ, ಸ್ಮಾರ್ಟ್‌ಫೋನ್‌ಗಳು ಜನಪ್ರಿಯಗೊಂಡ ತಕ್ಷಣವೇ ಎಲ್ಲೆಡೆ ಸಂತಾನೋತ್ಪತ್ತಿ ದರ ಕುಸಿದಿರುವುದು ಪತ್ತೆಯಾಗಿದೆ.

ವಿಶೇಷವಾಗಿ ಇರಾನ್, ಕೋಸ್ಟಾರಿಕಾ, ಗ್ವಾಟೆಮಾಲಾ, ಚಿಲಿ, ಮೆಕ್ಸಿಕೋ ಮತ್ತು ಟರ್ಕಿ ದೇಶಗಳಲ್ಲಿ ಸ್ಮಾರ್ಟ್‌ಫೋನ್ ಮತ್ತು 4Gಯಂತಹ ಹೈಸ್ಪೀಡ್ ಬ್ರಾಡ್‌ಬ್ಯಾಂಡ್ ನೆಟ್‌ವರ್ಕ್‌ಗಳು ಲಭ್ಯವಾದ ತಕ್ಷಣವೇ ಯುವ ಜನತೆಯಲ್ಲಿ ಹೆರಿಗೆ ಪ್ರಮಾಣವು ಅಷ್ಟೇ ವೇಗವಾಗಿ ಕುಸಿದಿದೆ. ಜನರು ನೇರವಾಗಿ ಭೇಟಿಯಾಗಿ ಸಂವಹನ ನಡೆಸುವ ಮತ್ತು ಒಟ್ಟಿಗೆ ಕಳೆಯುವ ಸಾಮಾಜಿಕ ಸಮಯವು 2003ರಲ್ಲಿ ದಿನಕ್ಕೆ ಸರಾಸರಿ 68 ನಿಮಿಷಗಳಷ್ಟಿತ್ತು. ಆದರೆ, ಸ್ಮಾರ್ಟ್‌ಫೋನ್‌ಗಳ ಅತಿಯಾದ ಬಳಕೆಯಿಂದಾಗಿ 2019ರ ವೇಳೆಗೆ ಇದು ಕೇವಲ 38 ನಿಮಿಷಗಳಿಗೆ ಕುಸಿದಿದೆ ಎಂದು ಈ ಆತಂಕಕಾರಿ ವರದಿ ಬಹಿರಂಗಪಡಿಸಿದೆ.