ಇಸ್ರೋಗೆ ಮತ್ತೊಂದು ಐತಿಹಾಸಿಕ ಯಶಸ್ಸು: ಕಕ್ಷೆಗೆ ಜಿಎಸ್‌ಎಲ್‌ವಿ-ಎಫ್‌17, ಇಒಎಸ್-05 ಉಪಗ್ರಹ ಯಶಸ್ವಿ ಉಡಾವಣೆ

ಶ್ರೀಹರಿಕೋಟಾ: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ನಡೆಸಿದ ಜಿಎಸ್‌ಎಲ್‌ವಿ-ಎಫ್17/ಇಒಎಸ್-05 (GSLV-F17/EOS-05) ಉಡಾವಣಾ ಯೋಜನೆ ಸಂಪೂರ್ಣ ಯಶಸ್ವಿಯಾಗಿದೆ. ಆಂಧ್ರಪ್ರದೇಶದ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಉಡಾವಣೆಗೊಂಡ ಜಿಎಸ್‌ಎಲ್‌ವಿ-ಎಫ್17 ರಾಕೆಟ್, 2,367 ಕೆಜಿ ತೂಕದ ಅತ್ಯಾಧುನಿಕ ಭೂ ವೀಕ್ಷಣಾ ಉಪಗ್ರಹ ಇಒಎಸ್-05 ಅನ್ನು ನಿಗದಿತ ಸಬ್-ಜಿಯೋಸಿಂಕ್ರೋನಸ್ ಟ್ರಾನ್ಸ್‌ಫರ್ ಆರ್ಬಿಟ್‌ಗೆ (Sub-GTO) ಅತ್ಯಂತ ನಿಖರವಾಗಿ ತಲುಪಿಸಿದೆ.

ಉಡಾವಣೆ ಯಶಸ್ಸಿನ ಬಳಿಕ ಮಾತನಾಡಿದ ಇಸ್ರೋ ಅಧ್ಯಕ್ಷ ಡಾ. ವಿ. ನಾರಾಯಣನ್, “ಇದು ಭಾರತದ ಬಾಹ್ಯಾಕಾಶ ಕಾರ್ಯಕ್ರಮದಲ್ಲಿ ಒಂದು ಐತಿಹಾಸಿಕ ಮೈಲಿಗಲ್ಲು” ಎಂದು ಸಂತಸ ವ್ಯಕ್ತಪಡಿಸಿದರು. ಶ್ರೀಹರಿಕೋಟಾದಿಂದ ನಡೆದ 107ನೇ ಉಡಾವಣೆ ಹಾಗೂ ಜಿಎಸ್‌ಎಲ್‌ವಿ ಸರಣಿಯ 19ನೇ ಕಾರ್ಯಾಚರಣೆ ಇದಾಗಿದೆ. ಆರಂಭಿಕ ಜಿಎಸ್‌ಎಲ್‌ವಿ-ಡಿ1 ಯೋಜನೆಯಲ್ಲಿ ಕೇವಲ 1,536 ಕೆಜಿ ತೂಕ ಹೊತ್ತೊಯ್ಯುವ ಸಾಮರ್ಥ್ಯವಿದ್ದ ರಾಕೆಟ್, ಇದೀಗ ವಿನ್ಯಾಸ ಮತ್ತು ಪ್ರೊಪಲ್ಷನ್ ವ್ಯವಸ್ಥೆಯ ನಿರಂತರ ಸುಧಾರಣೆಯ ಫಲವಾಗಿ 2,367 ಕೆಜಿ ತೂಕದ ಉಪಗ್ರಹವನ್ನು ಕಕ್ಷೆಗೆ ಸೇರಿಸುವ ಮೂಲಕ ತನ್ನ ಬಲ ಪ್ರದರ್ಶಿಸಿದೆ.

ಕಾರ್ಯಾರಂಭದ ನಂತರ, ಈ ಇಒಎಸ್-05 ಭಾರತದ ಮೊದಲ ಸಮರ್ಪಿತ ಜಿಯೋಸಿಂಕ್ರೋನಸ್ ಭೂ ಚಿತ್ರೀಕರಣ ಉಪಗ್ರಹವಾಗಿ ಕಾರ್ಯನಿರ್ವಹಿಸಲಿದೆ. ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಮಾನವರಹಿತ ‘ಗಗನ್‌ಯಾನ್’ ಯೋಜನೆ ಸೇರಿದಂತೆ ಒಟ್ಟು 6 ಉಡಾವಣೆಗಳನ್ನು ನಡೆಸುವ ಗುರಿ ಹೊಂದಲಾಗಿದೆ ಎಂದು ಅವರು ಮಾಹಿತಿ ನೀಡಿದರು.

ಮಿಷನ್ ಡೈರೆಕ್ಟರ್ ಥಾಮಸ್ ಕುರಿಯನ್ ಮಾತನಾಡಿ, ಜಿಎಸ್‌ಎಲ್‌ವಿ ಇದುವರೆಗೆ ಜಿಟಿಒ ಅಥವಾ ಸಬ್-ಜಿಟಿಒ ಕಕ್ಷೆಗೆ ಸೇರಿಸಿದ ಉಪಗ್ರಹಗಳಲ್ಲೇ ಇಒಎಸ್-05 ಅತ್ಯಂತ ಭಾರವಾದದ್ದು ಎಂದರು. ರಾಕೆಟ್ ಕಕ್ಷೆ ಸೇರುವ ಪ್ರಕ್ರಿಯೆ ಕೆಲವೇ ನಿಮಿಷಗಳಲ್ಲಿ ಮುಗಿದರೂ, ಅದರ ಹಿಂದೆ ವಿಜ್ಞಾನಿಗಳು, ಇಂಜಿನಿಯರ್‌ಗಳು ಮತ್ತು ಕೈಗಾರಿಕಾ ಪಾಲುದಾರರ ಹಲವು ತಿಂಗಳುಗಳ ಕಠಿಣ ಪರಿಶ್ರಮವಿದೆ ಎಂದು ಅವರು ಹರ್ಷ ಹಂಚಿಕೊಂಡರು.