ಹಿಂದೂ ಮಹಿಳೆಯರು ಇಸ್ಲಾಮಿಸ್ಟ್‌ಗಳ ಜೊತೆ ಬೆರೆತ ಬಳಿಕ ಎಡಪಂಥೀಯರಾಗುತ್ತಿದ್ದಾರೆ: ಕಂಗನಾ ರಣಾವತ್‌

ದೆಹಲಿ: ಬಿಜೆಪಿ ಸಂಸದೆ ಕಂಗನಾ ರಣಾವತ್ ಅವರು ಇಂದು ತಮ್ಮ ‘ಎಕ್ಸ್’ (X) ಖಾತೆಯಲ್ಲಿ ವೀಡಿಯೊ ಒಂದನ್ನು ಹಂಚಿಕೊಂಡಿದ್ದಾರೆ. ಅದರಲ್ಲಿ ಅವರು ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದು, ತಾವು ‘ಜಾಗೃತಗೊಂಡ ಹಿಂದೂ ಮಹಿಳೆ’ ಎಂದು ಹೇಳಿಕೊಂಡಿದ್ದಾರೆ.

ಇಸ್ಲಾಮಿಸ್ಟ್‌ಗಳ ಜೊತೆ ಸಂಪರ್ಕಕ್ಕೆ ಬಂದ ನಂತರ ಹಿಂದೂ ಮಹಿಳೆಯರು ಕಟು ಎಡಪಂಥೀಯರಾಗಿ ಬದಲಾಗುತ್ತಿದ್ದಾರೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ. ಹಿಂದೆ ತಟಸ್ಥ ಹಿಂದೂ ಮಹಿಳೆಯಾಗಿದ್ದ ತಾವು ಈಗ ಜಾಗೃತಗೊಂಡ ಹಿಂದೂವಾಗಿ ಬದಲಾಗಿರುವುದಾಗಿ ಹೇಳಿದ್ದಾರೆ. ಕೆಲವು ದಿನಗಳ ಹಿಂದೆ ‘ಕಾಕ್ರೋಚ್ ಜನತಾ ಪಾರ್ಟಿ’ (ಸಿಜೆಪಿ) ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದ ಅವರು, “ಸಿಜೆಪಿ ಒಂದು ಕೊಳಚೆ ಚರಂಡಿ” ಎಂದು ತಮ್ಮ ಎಕ್ಸ್ ಖಾತೆಯಲ್ಲಿ ವಿವಾದಾತ್ಮಕ ಬರಹ ಹಂಚಿಕೊಂಡಿದ್ದರು.

ತಮ್ಮ ಇತ್ತೀಚಿನ ವೀಡಿಯೊ ಸಂದೇಶದಲ್ಲಿ ಮಾತನಾಡಿದ ಕಂಗನಾ ರಣಾವತ್, “ನನ್ನ ಮನಸ್ಸಿನ ಭಾವನೆಯೊಂದನ್ನು ಹಂಚಿಕೊಳ್ಳಬೇಕಿದೆ. ಸಂಸತ್ತಿಗೆ ಹೋಗುವುದು ತಡವಾಗುತ್ತಿದ್ದರೂ ಈ ವಿಚಾರವನ್ನು ಹಂಚಿಕೊಳ್ಳುವುದು ಮುಖ್ಯ ಎನಿಸಿತು,” ಎಂದಿದ್ದಾರೆ.

ಚಿತ್ರರಂಗದ ಮಹಿಳೆಯರ ಕುರಿತು ಮಾತನಾಡಿದ ಅವರು, ತಮಗೆ ಹಲವು ಹಿಂದೂ ಮಹಿಳೆಯರ ಪರಿಚಯವಿದೆ, ಆದರೆ ಅವರಲ್ಲಿ ಹೆಚ್ಚಿನವರಿಗೆ ರಾಜಕೀಯ ಅಥವಾ ಧಾರ್ಮಿಕ ತಿಳಿವಳಿಕೆ ಇರುವುದಿಲ್ಲ ಎಂದಿದ್ದಾರೆ. ಸಾಮಾನ್ಯವಾಗಿ ಯುವಜನರಲ್ಲಿ ಇಂತಹ ಲಕ್ಷಣಗಳು ಕಂಡುಬರುತ್ತವೆ ಮತ್ತು ಅವರು ತಟಸ್ಥರಾಗಿರುತ್ತಾರೆ. ಆದರೆ ಇಸ್ಲಾಮಿಸ್ಟ್‌ಗಳ ಪರಿಚಯವಾದ ಬಳಿಕ ಆ ಮಹಿಳೆಯರಲ್ಲಿ ಬದಲಾವಣೆಗಳು ಬರತೊಡಗುತ್ತವೆ ಎಂದು ಕಂಗನಾ ಹೇಳಿದ್ದಾರೆ.

ಇಸ್ಲಾಮಿಸ್ಟ್‌ಗಳ ಜೊತೆ ಬೆರೆತ ಬಳಿಕ ಅವರು ಎಡಪಂಥೀಯರಾಗುತ್ತಾರೆ, ಇದರಲ್ಲಿ ಯಾವುದೇ ತಪ್ಪಿಲ್ಲ; ಏಕೆಂದರೆ ಸಂವಿಧಾನವು ಪ್ರತಿಯೊಬ್ಬರಿಗೂ ಆ ಸ್ವಾತಂತ್ರ್ಯವನ್ನು ನೀಡಿದೆ. ನಮಗೆ ಬೇಕಾದ ಯಾವುದೇ ಧರ್ಮ ಅಥವಾ ಸಿದ್ಧಾಂತವನ್ನು ನಾವು ಸ್ವೀಕರಿಸಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಆದರೆ ತಾವು ಈಗ ತಟಸ್ಥ ಹಿಂದೂವಾಗಿ ಉಳಿದಿಲ್ಲ ಎಂದಿರುವ ಅವರು, “ಈಗ ಜನರು ನನ್ನನ್ನು ಪೀಡಿಸುತ್ತಿದ್ದಾರೆ, ಸಂಘ ಪರಿವಾರಕ್ಕೆ ಯಾವಾಗ ಸೇರ್ಪಡೆಯಾದಿರಿ ಎಂದು ಪ್ರಶ್ನಿಸುತ್ತಿದ್ದಾರೆ. ಈಗ ನಾನು ಜಾಗೃತಗೊಂಡ ಹಿಂದೂ, ಬಿಜೆಪಿ ಹಾಗೂ ಆರ್‌ಎಸ್‌ಎಸ್ ಮಾದರಿಯ ಹಿಂದೂ. ಬದಲಾವಣೆ ಎನ್ನುವುದು ಎಲ್ಲರಿಗೂ ಆಗಬೇಕೆಂದು ಬಯಸುವಾಗ, ನನ್ನಲ್ಲಿ ಬದಲಾವಣೆ ಏಕೆ ಆಗಬಾರದು?” ಎಂದು ಪ್ರಶ್ನಿಸಿದ್ದಾರೆ.

ಹಿಂದೂ ಮಹಿಳೆಯರು ನಿರ್ದಿಷ್ಟ ಸಿದ್ಧಾಂತದ ಗುರುತಿಗಾಗಿ ಹೋರಾಡಬೇಕು, ಬದಲಾವಣೆಯ ಮೂಲಕ ಜಾಗೃತಿ ಪಡೆಯಬೇಕು; ಹಾಗಿರುವಾಗ ಆ ಹಾದಿಯನ್ನು ಏಕೆ ಮುಚ್ಚಲಾಗುತ್ತಿದೆ ಎಂದು ಅವರು ಕೇಳಿದ್ದಾರೆ.