ಟಿಸಿಎಸ್ ನಾಸಿಕ್ ಪ್ರಕರಣ: ಮಲೇಷ್ಯಾ ಮೂಲದ ಧರ್ಮಪ್ರಚಾರಕನ ಲಿಂಕ್ ಪತ್ತೆ; ಇನ್ನೂ ಮೂರು ಸಂತ್ರಸ್ತರಿಂದ ಎಫ್‌ಐಆರ್

ನಾಸಿಕ್: ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS) ನಾಸಿಕ್ ಕೇಂದ್ರದಲ್ಲಿ ನಡೆದ ಲೈಂಗಿಕ ಕಿರುಕುಳ ಮತ್ತು ಮತಾಂತರ ಯತ್ನದ ಪ್ರಕರಣವು ಈಗ ಅಂತಾರಾಷ್ಟ್ರೀಯ ಆಯಾಮ ಪಡೆದುಕೊಂಡಿದೆ. ಪ್ರಕರಣದ ತನಿಖೆ ನಡೆಸುತ್ತಿರುವ ವಿಶೇಷ ತನಿಖಾ ದಳ (SIT), ಈ ಕೃತ್ಯದ ಹಿಂದೆ ಮಲೇಷ್ಯಾ ಮೂಲದ ಧರ್ಮಪ್ರಚಾರಕನ ಕೈವಾಡವಿರುವ ಶಂಕೆಯ ಮೇಲೆ ತನಿಖೆ ಆರಂಭಿಸಿದೆ.

ಮಲೇಷ್ಯಾ ಮೂಲದ ಇರ್ಮನ್ ಎಂಬ ಧರ್ಮಪ್ರಚಾರಕನನ್ನು ಆನ್‌ಲೈನ್ ವಿಡಿಯೋ ಕರೆಗಳ ಮೂಲಕ ಟಿಸಿಎಸ್‌ನ ಕೆಲವು ಉದ್ಯೋಗಿಗಳಿಗೆ ಪರಿಚಯಿಸಲಾಗಿತ್ತು ಎಂಬ ಸ್ಫೋಟಕ ಮಾಹಿತಿ ಮೂಲಗಳಿಂದ ಲಭ್ಯವಾಗಿದೆ. ಆರೋಪಿಗಳಿಂದ ವಶಪಡಿಸಿಕೊಳ್ಳಲಾದ ಡಿಜಿಟಲ್ ಸಾಧನಗಳನ್ನು ಪರಿಶೀಲಿಸಿದಾಗ, ಇರ್ಮನ್ ಎಂಬಾತ ವಿಡಿಯೋ ಕರೆಗಳ ಮೂಲಕ ಉದ್ಯೋಗಿಗಳ ಮೇಲೆ ಧಾರ್ಮಿಕ ಪ್ರಭಾವ ಬೀರಲು ಮತ್ತು ಅವರನ್ನು ಪ್ರಚೋದಿಸಲು ಯತ್ನಿಸಿರುವುದು ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ ಪೊಲೀಸರು ಈತನ ಪೂರ್ವಾಪರ ಮತ್ತು ಸಂವಹನ ದಾಖಲೆಗಳನ್ನು ಬೆನ್ನತ್ತಿದ್ದಾರೆ.

ಈಗಾಗಲೇ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕಂಪನಿಯ ಹಿರಿಯ ಎಚ್‌ಆರ್ (HR) ಅಧಿಕಾರಿ ಸೇರಿದಂತೆ ಏಳು ಜನರನ್ನು ಬಂಧಿಸಲಾಗಿದೆ. ಲೈಂಗಿಕ ಕಿರುಕುಳ, ಒತ್ತಾಯಪೂರ್ವಕವಾಗಿ ಧಾರ್ಮಿಕ ವಿಚಾರಗಳನ್ನು ಹೇರುವುದು ಮತ್ತು ಮತಾಂತರಕ್ಕೆ ಯತ್ನಿಸಿದ ಗಂಭೀರ ಆರೋಪಗಳನ್ನು ಇವರ ಮೇಲೆ ಹೊರಿಸಲಾಗಿದೆ. ಟಿಸಿಎಸ್‌ನ ಬಿಪಿಒ ಕೇಂದ್ರದಲ್ಲಿ ಪೊಲೀಸರು ಹೌಸ್‌ಕೀಪಿಂಗ್ ಸಿಬ್ಬಂದಿಯಂತೆ ಮಾರುವೇಷದಲ್ಲಿ ಕೆಲಸ ಮಾಡಿ ಮಾಹಿತಿ ಕಲೆಹಾಕಿದ ನಂತರ ಈ ದೊಡ್ಡ ಜಾಲ ಬಯಲಿಗೆ ಬಂದಿತ್ತು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಈವರೆಗೆ ಒಟ್ಟು 9 ಎಫ್‌ಐಆರ್‌ಗಳು ದಾಖಲಾಗಿದ್ದು, ಶೀಘ್ರದಲ್ಲೇ ಮತ್ತೊಬ್ಬರು ಸಂತ್ರಸ್ತರು ಹೊಸದಾಗಿ ದೂರು ನೀಡುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ. ಇದರಿಂದ ಒಟ್ಟು ಪ್ರಕರಣಗಳ ಸಂಖ್ಯೆ 12 ರಿಂದ 14ಕ್ಕೆ ಏರಬಹುದು ಎಂದು ಅಂದಾಜಿಸಲಾಗಿದೆ. ಕಂಪನಿಯ ಸಿಒಒ (COO) ಆರತಿ ಸುಬ್ರಮಣಿಯನ್ ನೇತೃತ್ವದಲ್ಲಿ ಟಿಸಿಎಸ್ ಆಂತರಿಕ ತನಿಖೆ ನಡೆಸುತ್ತಿದ್ದು, ಮಲೇಷ್ಯಾ ನಂಟಿನ ಬಗ್ಗೆ ಕಂಪನಿ ಈವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಡಿಜಿಟಲ್ ಡೇಟಾ ವಿಶ್ಲೇಷಣೆ ಮುಗಿದ ನಂತರ ನಾಸಿಕ್ ಪೊಲೀಸರು ಮತ್ತಷ್ಟು ಬಂಧನಗಳನ್ನು ಮಾಡುವ ಸಾಧ್ಯತೆಯಿದೆ.