ಮಹಾರಾಷ್ಟ್ರದಲ್ಲಿ ಎಫ್‌ಡಿಎ ಭರ್ಜರಿ ಬೇಟೆ: ದಾರಿ ತಪ್ಪಿಸುವ ಜಾಹೀರಾತು ನೀಡಿದ್ದ ಪತಂಜಲಿಯ 51 ಲಕ್ಷ ರೂ. ಮೌಲ್ಯದ ಔಷಧಗಳು ಜಪ್ತಿ!

ಮುಂಬೈ: ದಾರಿ ತಪ್ಪಿಸುವ ಜಾಹೀರಾತುಗಳು ಮತ್ತು ನಿಯಮಾವಳಿಗಳ ಉಲ್ಲಂಘನೆಯ ವಿರುದ್ಧ ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತವು (FDA) ರಾಜ್ಯಾದ್ಯಂತ ಹಠಾತ್ ಕಾರ್ಯಾಚರಣೆ ನಡೆಸಿದ್ದು, ಒಟ್ಟು 73.24 ಲಕ್ಷ ರೂಪಾಯಿ ಮೌಲ್ಯದ ಔಷಧಗಳನ್ನು ಜಪ್ತಿ ಮಾಡಿದೆ. ವಶಪಡಿಸಿಕೊಳ್ಳಲಾದ ಒಟ್ಟು ಔಷಧಗಳ ಪೈಕಿ ಬರೋಬ್ಬರಿ 51.41 ಲಕ್ಷ ರೂಪಾಯಿ ಮೌಲ್ಯದ ಔಷಧಗಳು ಬಾಬಾ ರಾಮದೇವ್ ಅವರ ಪತಂಜಲಿ ಸಮೂಹಕ್ಕೆ ಸೇರಿದ ಹರಿದ್ವಾರದ ‘ದಿವ್ಯ ಫಾರ್ಮಸಿ’ ತಯಾರಿಸಿದ ಉತ್ಪನ್ನಗಳಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

‘ಹಿಂದೂಸ್ತಾನ್ ಟೈಮ್ಸ್’ ವರದಿಯ ಪ್ರಕಾರ, ಇತ್ತೀಚೆಗಷ್ಟೇ ಮಹಾರಾಷ್ಟ್ರ ಎಫ್‌ಡಿಎ ಕಮಿಷನರ್ ಆಗಿ ಅಧಿಕಾರ ವಹಿಸಿಕೊಂಡಿರುವ ತುಕಾರಾಂ ಮುಂಢೆ ಅವರ ನೇರ ಸೂಚನೆಯ ಮೇರೆಗೆ ಈ ವಿಶೇಷ ಜಂಟಿ ಕಾರ್ಯಾಚರಣೆಯನ್ನು ಹಮ್ಮಿಕೊಳ್ಳಲಾಗಿತ್ತು. ಮೇ 25 ರಂದು ಅಧಿಕಾರ ಸ್ವೀಕರಿಸಿದ ಮುಂಢೆ, ಸಾರ್ವಜನಿಕ ಆರೋಗ್ಯದ ರಕ್ಷಣೆಗಾಗಿ ರಾಜ್ಯಾದ್ಯಂತ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುವಂತೆ ಆದೇಶಿಸಿದ್ದರು. ಇದರ ಭಾಗವಾಗಿ ಮುಂಬೈ, ಕೊಂಕಣ, ಪುಣೆ, ನಾಸಿಕ್, ಅಮರಾವತಿ, ನಾಗ್ಪುರ ಮತ್ತು ಛತ್ರಪತಿ ಸಂಭಾಜಿನಗರ ಸೇರಿದಂತೆ ಎಫ್‌ಡಿಎಯ ಏಳು ಪ್ರಾದೇಶಿಕ ವಿಭಾಗಗಳಲ್ಲಿ ಏಕಕಾಲದಲ್ಲಿ ದಾಳಿ ನಡೆಸಲಾಯಿತು.

ಚಮತ್ಕಾರಿ ಚಿಕಿತ್ಸೆಯ ಭರವಸೆ ನೀಡಿದ್ದಕ್ಕೆ ಕ್ರಮ: ಔಷಧಗಳು ಮತ್ತು ಚಮತ್ಕಾರಿ ಚಿಕಿತ್ಸೆಗಳ (ಆಕ್ಷೇಪಾರ್ಹ ಜಾಹೀರಾತುಗಳು) ಕಾಯ್ದೆ 1954 ರ ಅಡಿಯಲ್ಲಿ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದ್ದು, ರಾಜ್ಯಾದ್ಯಂತ 12 ಆಯುರ್ವೇದ ಔಷಧ ಮಳಿಗೆಗಳನ್ನು ತಪಾಸಣೆಗೊಳಪಡಿಸಲಾಯಿತು. ಗಂಭೀರ ಕಾಯಿಲೆಗಳಿಗೆ ಶೇ. 100 ರಷ್ಟು ಖಚಿತ ಗುಣಮುಖ ಹಾಗೂ ಚಮತ್ಕಾರಿ ಫಲಿತಾಂಶ ನೀಡುವ ಸುಳ್ಳು ಭರವಸೆಗಳೊಂದಿಗೆ ಪ್ರಚಾರ ಮಾಡಲಾಗುತ್ತಿದ್ದ ಆಯುರ್ವೇದ ಔಷಧಗಳನ್ನು ತನಿಖೆಯ ವೇಳೆ ವಶಪಡಿಸಿಕೊಳ್ಳಲಾಗಿದೆ.

ಜಪ್ತಿ ಮಾಡಲಾದ ಆಯುರ್ವೇದ ಉತ್ಪನ್ನಗಳಲ್ಲಿ ಸಿಂಹಪಾಲು ದಿವ್ಯ ಫಾರ್ಮಸಿಗೆ ಸೇರಿದ್ದಾಗಿದೆ. ಎಫ್‌ಡಿಎ ಅಂಕಿಅಂಶಗಳ ಪ್ರಕಾರ, ಕೊಂಕಣ ವಲಯದಲ್ಲಿ 18.58 ಲಕ್ಷ ರೂ., ಪುಣೆಯಲ್ಲಿ 14.68 ಲಕ್ಷ ರೂ., ನಾಗ್ಪುರದಲ್ಲಿ 7.26 ಲಕ್ಷ ರೂ., ನಾಸಿಕ್‌ನಲ್ಲಿ 7.10 ಲಕ್ಷ ರೂ., ಮುಂಬೈನಲ್ಲಿ 1.85 ಲಕ್ಷ ರೂ., ಅಮರಾವತಿಯಲ್ಲಿ 1.42 ಲಕ್ಷ ರೂ. ಹಾಗೂ ಛತ್ರಪತಿ ಸಂಭಾಜಿನಗರದಲ್ಲಿ 48,718 ರೂಪಾಯಿ ಮೌಲ್ಯದ ಪತಂಜಲಿ ಔಷಧಗಳನ್ನು ಜಪ್ತಿ ಮಾಡಲಾಗಿದೆ.

ವಶಪಡಿಸಿಕೊಳ್ಳಲಾದ ಪ್ರಮುಖ ಉತ್ಪನ್ನಗಳಲ್ಲಿ ದೃಷ್ಟಿ ಐ ಡ್ರಾಪ್ಸ್ (Drishti Eye Drops), ಗಿಲೋಯ್ ಘನ ವಟಿ, ಕುಟಜ್ ಘನ ವಟಿ, ಸಿಸ್ಟೋಗ್ರಿಟ್ ಡೈಮಂಡ್ ಟ್ಯಾಬ್ಲೆಟ್, ನ್ಯೂರೋಗ್ರಿಟ್ ಗೋಲ್ಡ್ ಕ್ಯಾಪ್ಸುಲ್, ಮಧುಗ್ರಿಟ್ ಟ್ಯಾಬ್ಲೆಟ್ ಮತ್ತು ಮೆಮೊರಿಗ್ರಿಟ್ ಟ್ಯಾಬ್ಲೆಟ್‌ಗಳು ಸೇರಿವೆ.

ಅಲೋಪತಿ ಔಷಧಗಳೂ ಜಪ್ತಿ: ಈ ವಿಶೇಷ ಕಾರ್ಯಾಚರಣೆಯು ಕೇವಲ ಆಯುರ್ವೇದ ಔಷಧಗಳಿಗೆ ಮಾತ್ರ ಸೀಮಿತವಾಗಿರಲಿಲ್ಲ. ಪುಣೆ ವಲಯದಲ್ಲಿ ತಪಾಸಣೆ ನಡೆಸುವಾಗ ತಪ್ಪು ಲೇಬಲಿಂಗ್ ಹೊಂದಿದ್ದ (Wrong labeling) ಒಟ್ಟು 21.83 ಲಕ್ಷ ರೂಪಾಯಿ ಮೌಲ್ಯದ ಅಲೋಪತಿ ಔಷಧಗಳನ್ನೂ ಸಹ ಎಫ್‌ಡಿಎ ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ. ಈ ಕಾರ್ಯಾಚರಣೆಯಲ್ಲಿ ಅಲೋಪತಿ ಔಷಧಗಳ ಅತಿ ದೊಡ್ಡ ಜಪ್ತಿ ನಡೆದಿರುವುದು ಪುಣೆ ವಲಯದಲ್ಲೇ ಆಗಿದೆ. ರಾಜ್ಯಾದ್ಯಂತ ವಶಪಡಿಸಿಕೊಳ್ಳಲಾದ ಒಟ್ಟು ಆಯುರ್ವೇದ ಮತ್ತು ಅಲೋಪತಿ ಔಷಧಗಳ ಒಟ್ಟು ಮೌಲ್ಯ 73,24,656 ರೂಪಾಯಿಗಳಾಗಿದ್ದು, ಎಫ್‌ಡಿಎ ಇತಿಹಾಸದಲ್ಲೇ ಇದು ಅತ್ಯಂತ ದೊಡ್ಡ ಜಾರಿ ಕಾರ್ಯಾಚರಣೆಗಳಲ್ಲಿ ಒಂದಾಗಿದೆ ಎಂದು ಪರಿಗಣಿಸಲಾಗಿದೆ.

ದಾರಿ ತಪ್ಪಿಸುವ ಜಾಹೀರಾತುಗಳು, ಕಾನೂನುಬಾಹಿರ ತಯಾರಿಕೆ ಮತ್ತು ನಿಯಮಾವಳಿಗಳ ಮಾನದಂಡಗಳನ್ನು ಉಲ್ಲಂಘಿಸಿ ಔಷಧ ಮಾರಾಟ ಮಾಡುವವರ ವಿರುದ್ಧ ಈ ಕಠಿಣ ಕಾರ್ಯಾಚರಣೆ ಮುಂದೆಯೂ ಮುಂದುವರಿಯಲಿದೆ ಎಂದು ಎಫ್‌ಡಿಎ ಕಮಿಷನರ್ ತುಕಾರಾಂ ಮುಂಢೆ ಎಚ್ಚರಿಸಿದ್ದಾರೆ. ಸಾರ್ವಜನಿಕರ ಆರೋಗ್ಯದ ಜೊತೆ ಚೆಲ್ಲಾಟವಾಡುವ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಗಳನ್ನು ಬಿಡುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಔಷಧಗಳು ಮತ್ತು ಪ್ರಸಾಧನ ಸಾಮಗ್ರಿ ಕಾಯ್ದೆ 1940 (Drugs and Cosmetics Act) ಹಾಗೂ ಇತರ ಸಂಬಂಧಿತ ಕಾನೂನುಗಳನ್ನು ಉಲ್ಲಂಘಿಸುವವರ ವಿರುದ್ಧ ನೇರವಾಗಿ ಕಾನೂನು ಮತ್ತು ನ್ಯಾಯಾಂಗ ಕ್ರಮ ಜರುಗಿಸಲಾಗುವುದು ಎಂದು ಮುಂಢೆ ಎಚ್ಚರಿಕೆ ನೀಡಿದ್ದಾರೆ. ಸುರಕ್ಷಿತ ಆಹಾರ ಮತ್ತು ಔಷಧಗಳನ್ನು ಪಡೆಯುವುದು ಪ್ರತಿಯೊಬ್ಬ ನಾಗರಿಕನ ಮೂಲಭೂತ ಹಕ್ಕಾಗಿದ್ದು, ಅದನ್ನು ಖಚಿತಪಡಿಸುವುದು ಆಡಳಿತದ ಪ್ರಾಥಮಿಕ ಜವಾಬ್ದಾರಿಯಾಗಿದೆ ಎಂದು ಅವರು ತಿಳಿಸಿದರು. ಇದರೊಂದಿಗೆ, ಔಷಧಗಳಿಗೆ ಸಂಬಂಧಿಸಿದ ದಾರಿ ತಪ್ಪಿಸುವ ಜಾಹೀರಾತುಗಳನ್ನು ನಂಬದಂತೆ ಮತ್ತು ವೈದ್ಯರ ಸಲಹೆಯಿಲ್ಲದೆ ಸ್ವಯಂ ಔಷಧೋಪಚಾರ ಮಾಡದಂತೆ ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.

ಸಾರ್ವಜನಿಕರ ಸಹಭಾಗಿತ್ವವನ್ನು ಹೆಚ್ಚಿಸಲು ಎಫ್‌ಡಿಎ ಶೀಘ್ರದಲ್ಲೇ ವಿಶೇಷ ಮೊಬೈಲ್ ಅಪ್ಲಿಕೇಶನ್ ಮತ್ತು ಟೋಲ್-ಫ್ರೀ ಸಹಾಯವಾಣಿಯನ್ನು ಪ್ರಾರಂಭಿಸಲಿದೆ ಎಂದು ವರದಿ ತಿಳಿಸಿದೆ. ಇದರ ಮೂಲಕ ಸಾರ್ವಜನಿಕರು ಕಾನೂನುಬಾಹಿರ ಔಷಧ ಮಾರಾಟ, ಕಲಬೆರಕೆ ಮತ್ತು ದಾರಿ ತಪ್ಪಿಸುವ ಜಾಹೀರಾತುಗಳ ಬಗ್ಗೆ ನೇರವಾಗಿ ದೂರು ದಾಖಲಿಸಬಹುದಾಗಿದೆ. ನಾಗರಿಕರಿಂದ ಬರುವ ಎಲ್ಲಾ ದೂರುಗಳನ್ನು ಅತ್ಯಂತ ಗೌಪ್ಯವಾಗಿ ಇಟ್ಟು ತನಿಖೆ ನಡೆಸಲಾಗುವುದು ಹಾಗೂ ನಿಯಮ ಉಲ್ಲಂಘನೆ ಸಾಬೀತಾದರೆ ತಕ್ಷಣವೇ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಇಲಾಖೆ ತಿಳಿಸಿದೆ.