ಸಾಮಾಜಿಕ ಜಾಲತಾಣದಲ್ಲಿ ಪ್ರಧಾನಿ ಮೋದಿ ವೀಡಿಯೊ ಡಿಲೀಟ್ ಪ್ರಕರಣ: ಕೇಂದ್ರ ಸರ್ಕಾರದ ಕ್ಷಮೆಯಾಚಿಸಿದ ಮೆಟಾ

ಸಾಮಾಜಿಕ ಜಾಲತಾಣ ಫೇಸ್‌ಬುಕ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಸಂಬಂಧಿಸಿದ ವೀಡಿಯೊ ಒಂದನ್ನು ಕೆಲ ಕಾಲ ತೆಗೆದುಹಾಕಿದ್ದಕ್ಕೆ ಸಂಸ್ಥೆಯ ಮಾತೃ ಸಂಸ್ಥೆ ‘ಮೆಟಾ’ ಭಾರತ ಸರ್ಕಾರಕ್ಕೆ ಕ್ಷಮೆಯಾಚಿಸಿದೆ.

ತಾಂತ್ರಿಕ ದೋಷದ ಕಾರಣದಿಂದಾಗಿಯೇ ಆ ವೀಡಿಯೊವನ್ನು ತೆಗೆದುಹಾಕಲಾಗಿತ್ತು ಎಂದು ಮೆಟಾ ಸ್ಪಷ್ಟನೆ ನೀಡಿದೆ ಎಂದು ಮೂಲಗಳು ತಿಳಿಸಿವೆ. ಆದಾಗ್ಯೂ, ಈ ಘಟನೆಯನ್ನು ಕೇಂದ್ರ ಸರ್ಕಾರವು ಅತ್ಯಂತ ಗಂಭೀರವಾಗಿ ಪರಿಗಣಿಸಿದೆ ಎಂದು ತಿಳಿದುಬಂದಿದೆ.

ಮೆಟಾ ನೀಡಿದ ವಿವರಣೆ ಹಾಗೂ ವೀಡಿಯೊ ತೆಗೆದುಹಾಕಲು ಕಾರಣವಾದ ಸಂದರ್ಭಗಳನ್ನು ಸರ್ಕಾರ ಪರಿಶೀಲಿಸುತ್ತಿದೆ. ಯುವಜನತೆಯನ್ನು ಉದ್ದೇಶಿಸಿ ಪ್ರಧಾನಿಯವರು ಪೋಸ್ಟ್ ಮಾಡಿದ್ದ ವೀಡಿಯೊವನ್ನು ತೆಗೆದುಹಾಕಿದ್ದರ ಕುರಿತು ಮಾಹಿತಿ ತಂತ್ರಜ್ಞಾನ (IT) ಸಚಿವಾಲಯವು ಮೆಟಾದಿಂದ ಸ್ಪಷ್ಟನೆ ಕೋರಿತ್ತು.