ಮೋದಿ ಕುರಿತು ವಿಶ್ವಾಸ ವ್ಯಕ್ತಪಡಿಸಿದ ಮಿತ್ರಪಕ್ಷಗಳು: ಪ್ರಧಾನಿ ನೇತ್ರತ್ವದಲ್ಲೇ ಮುಂದಿನ ಚನಾವಣೆ

ಹೊಸದೆಹಲಿ: ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟದ ಎಲ್ಲಾ 39 ಘಟಕಗಳು ಮಂಗಳವಾರ ಪ್ರಧಾನಿ ನರೇಂದ್ರ ಮೋದಿಯವರ ಮೇಲೆ ನಂಬಿಕೆಯಿರುವುದಾಗಿ ಹೇಳಿವೆ ಮತ್ತು 2024ರ ಲೋಕಸಭಾ ಚುನಾವಣೆಯಲ್ಲಿ ಅವರ ನಾಯಕತ್ವದಲ್ಲಿ ಒಗ್ಗಟ್ಟಿನಿಂದ ಸ್ಪರ್ಧಿಸಲು ನಿರ್ಧರಿಸಿವೆ.

ಭಾರತೀಯ ಜನತಾ ಪಕ್ಷ ಆಯೋಜಿಸಿದ್ದ ಸಭೆಯಲ್ಲಿ ಅಂಗೀಕರಿಸಿದ ನಿರ್ಣಯದಲ್ಲಿ, NDA ಪಾಲುದಾರ ಪಕ್ಷಗಳು ಚುನಾವಣೆಯಲ್ಲಿ ಜಯಗಳಿಸುವ ಮತ್ತು ಸತತ ಮೂರನೇ ಅವಧಿಗೆ ಮೋದಿ ನೇತೃತ್ವದಲ್ಲಿ ಕೇಂದ್ರದಲ್ಲಿ ತಮ್ಮ ಸರ್ಕಾರವನ್ನು ರಚಿಸುವ ವಿಶ್ವಾಸವನ್ನು ವ್ಯಕ್ತಪಡಿಸಿದರು.

“ಪ್ರಧಾನಿ ನರೇಂದ್ರ ಮೋದಿಯವರ ಅಧ್ಯಕ್ಷತೆಯಲ್ಲಿ ಇಂದು ನವದೆಹಲಿಯಲ್ಲಿ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟದ ಸಭೆ ನಡೆಯಿತು. NDA ಒಕ್ಕೂಟದ ಒಟ್ಟು 39 ಮೈತ್ರಿ ಪಕ್ಷಗಳು ಇದರಲ್ಲಿ ಭಾಗವಹಿಸಿದ್ದವು” ಎಂದು NDA ನಿರ್ಣಯದಲ್ಲಿ ತಿಳಿಸಲಾಗಿದೆ.

NDA ಮೈತ್ರಿಕೋಟವು “ಯಶಸ್ವಿ 25 ವರ್ಷಗಳನ್ನು” ಪೂರ್ಣಗೊಳಿಸಿದ ಸಂದರ್ಭದಲ್ಲಿ ಈ ಸಭೆಯನ್ನು ಆಯೋಜಿಸಲಾಗಿತ್ತು ಎಂದು ಅದು ತಿಳಿಸಿದೆ.

“ಸಭೆಯಲ್ಲಿ ಎಲ್ಲಾ NDA ಘಟಕಗಳು ನರೇಂದ್ರ ಮೋದಿಯವರ ನಾಯಕತ್ವವನ್ನು ಒಪ್ಪಿಕೊಂಡಿವೆ ಮತ್ತು ಅವರ ಮುಂದಾಳತ್ವದಲ್ಲೇ ಮುಂದಿನ ಚುನಾವಣೆಯನ್ನು ಎದುರಿಸಲು ಒಪ್ಪಿಕೊಂಡಿವೆ. ಮುಂದಿನ ಬಾರಿಯೂ ಮೋದಿ ಮತ್ತೆ ಪ್ರಧಾನಿಯಾಗಲಿದ್ದಾರೆ” ಎಂದು ನಿರ್ಣಯ ಹೇಳಿದೆ.

2014ರಲ್ಲಿ ಮೋದಿಯವರ ನಾಯಕತ್ವದಡಿ ಜನರಿಂದ ಪಡೆದ ಆಶೀರ್ವಾದವು 2019ರಲ್ಲಿ ʼಅನೇಕ ಪಟ್ಟುʼ ಹೆಚ್ಚಿದೆ ಎಂದು NDA ಹೇಳಿಕೊಂಡಿದೆ.

“ವಿರೋಧ ಪಕ್ಷಗಳ ಸುಳ್ಳುಗಳು, ವದಂತಿಗಳು ಮತ್ತು ಆಧಾರರಹಿತ ಆರೋಪಗಳನ್ನು ತಿರಸ್ಕರಿಸಿ, ದೇಶವು NDA ಮೈತ್ರಿಕೂಟದ ನಾಯಕತ್ವದಲ್ಲಿ ನಂಬಿಕೆ ಇಡುತ್ತಿದೆ” ಎಂದು ಬಿಜೆಪಿ ನೇತೃತ್ವದ ಮೈತ್ರಿಕೂಟ ಹೇಳಿದೆ.

“ಇಂದು ಪ್ರತಿಪಕ್ಷಗಳು ಅಸ್ತಿತ್ವದ ಮತ್ತು ಪ್ರಸ್ತುತತೆಯ ಬಿಕ್ಕಟ್ಟನ್ನು ಎದುರಿಸುತ್ತಿವೆ. ಅವು ಗೊಂದಲಕ್ಕೊಳಾಗಿ ದಿಕ್ಕು ತಪ್ಪಿವೆ” ಎಂದು ಹೇಳಲಾಗಿದೆ.

ತಮ್ಮ ಬದ್ಧತೆ, ಭಕ್ತಿ, ನಿರಂತರ ಕಠಿಣ ಪರಿಶ್ರಮ ಮತ್ತು ನಿಸ್ವಾರ್ಥ ಸಮರ್ಪಣೆಯ ಮೂಲಕ ಭಾರತವನ್ನು ಅಭೂತಪೂರ್ವ ಅಭಿವೃದ್ಧಿಯ ಹಾದಿಯಲ್ಲಿ ಮುನ್ನಡೆಸಿದ್ದಕ್ಕಾಗಿ ಮತ್ತು ತಮ್ಮ ದೇಶದ ಶಕ್ತಿ ಮತ್ತು ಪರಾಕ್ರಮದ ಸಾಕ್ಷಾತ್ಕಾರದ ಬಗ್ಗೆ ನಾಗರಿಕರಿಗೆ ಹೆಮ್ಮೆ ಪಡಲು ಅವಕಾಶ ನೀಡಿದ್ದಕ್ಕಾಗಿ NDA ಪಕ್ಷಗಳು ಮೋದಿಯವರನ್ನು ಶ್ಲಾಘಿಸಿದವು.

“ಈ ಅಭಿವೃದ್ಧಿಯ ಪಯಣದಲ್ಲಿ ಪ್ರಧಾನಿ ಮೋದಿಯವರ ನಾಯಕತ್ವದಲ್ಲಿ ನಾವು ಒಂದಾಗಿದ್ದೇವೆ, ನಾವು ಒಗ್ಗಟ್ಟಾಗಿದ್ದೇವೆ ಮತ್ತು ನಾವು ಸರ್ವಾನುಮತದಿಂದ ಬದ್ಧರಾಗಿದ್ದೇವೆ” ಎಂದು ನಿರ್ಣಯದಲ್ಲಿ ತಿಳಿಸಲಾಗಿದೆ.