ಅಹಂಕಾರದಿಂದ ಎಲ್ಲವೂ ನಿಯಂತ್ರಣದಲ್ಲಿದೆ ಅಂದುಕೊಳ್ಳುವುದು ಭ್ರಮೆ; ಇತರರ ಆರಾಧನಾ ಪದ್ಧತಿಯನ್ನೂ ಗೌರವಿಸಬೇಕು: ಆರ್‌ಎಸ್‌ಎಸ್ ಮುಖ್ಯಸ್ಥ ಮೋಹನ್ ಭಾಗವತ್

ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿ ನಡೆದ ‘ಯುವ ಧರ್ಮ ಸಂಸದ್’ ಸಮಾವೇಶವನ್ನುದ್ದೇಶಿಸಿ ಮಾತನಾಡಿದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ಸರಸಂಘಚಾಲಕ ಮೋಹನ್ ಭಾಗವತ್, ಅಹಂಕಾರ ಮತ್ತು ಮಿತಿಮೀರಿದ ಗರ್ವದ ವಿರುದ್ಧ ಯುವಜನತೆಗೆ ಎಚ್ಚರಿಕೆ ನೀಡಿದ್ದಾರೆ. ಅಹಂಕಾರದಲ್ಲಿ ಮುಳುಗಿದ ವ್ಯಕ್ತಿಯು ಜಗತ್ತಿನಲ್ಲಿ ಎಲ್ಲವೂ ತನ್ನ ನಿಯಂತ್ರಣದಲ್ಲೇ ಇದೆ ಮತ್ತು ಘಟನೆಗಳು ತನ್ನಿಚ್ಛೆಯಂತೆಯೇ ನಡೆಯಬೇಕು ಎಂಬ ಭ್ರಮೆಗೆ ಬೀಳುತ್ತಾನೆ, ಆದರೆ ವಾಸ್ತವ ಹಾಗಿರುವುದಿಲ್ಲ ಎಂದು ಅವರು ಪ್ರತಿಪಾದಿಸಿದ್ದಾರೆ.

ಧರ್ಮ ಮತ್ತು ನೈತಿಕ ಶಿಕ್ಷಣ ಕೇವಲ ವೃದ್ಧಾಪ್ಯಕ್ಕೆ ಸೀಮಿತವಾದದ್ದಲ್ಲ ಎಂದು ಸ್ಪಷ್ಟಪಡಿಸಿದ ಅವರು, ಇಂದಿನ ಜೆನ್‌ ಜಿ (Gen Z) ಯುವಪೀಳಿಗೆಯು ಧರ್ಮದ ಕುರಿತು ಮುಕ್ತವಾಗಿ ಚರ್ಚಿಸುತ್ತಿರುವುದು ಅತ್ಯಂತ ಸಕಾರಾತ್ಮಕ ಬೆಳವಣಿಗೆ ಎಂದಿದ್ದಾರೆ. ಧರ್ಮವು ನಿವೃತ್ತಿಯ ನಂತರ ಓದುವ ಭಗವದ್ಗೀತೆ ಅಥವಾ ರಾಮಾಯಣಕ್ಕೆ ಮಾತ್ರ ಸೀಮಿತವಾಗಿರದೆ, ವ್ಯಕ್ತಿಯ ಹುಟ್ಟಿನಿಂದ ಸಾವಿನವರೆಗಿನ ಸಮಗ್ರ ಜೀವನದುದ್ದಕ್ಕೂ ಪ್ರಸ್ತುತವಾಗಿರುತ್ತದೆ ಎಂದು ಅವರು ಹೇಳಿದರು. ಧರ್ಮವು ಕೇವಲ ಭಾಷಣ ಅಥವಾ ಪುಸ್ತಕಗಳಲ್ಲಿರದೆ, ದೈನಂದಿನ ನಡವಳಿಕೆ ಮತ್ತು ಕರ್ತವ್ಯಗಳಲ್ಲಿ ವ್ಯಕ್ತವಾಗುತ್ತದೆ ಎಂದ ಅವರು, ಪುತ್ರ ಧರ್ಮ, ರಾಜ ಧರ್ಮ ಮತ್ತು ಮಾನವ ಧರ್ಮಗಳನ್ನು ಉದಾಹರಿಸಿದರು.

ಧಾರ್ಮಿಕ ಸಹಿಷ್ಣುತೆಯ ಮಹತ್ವವನ್ನು ಒತ್ತಿ ಹೇಳಿದ ಭಾಗವತ್, ಪ್ರತಿಯೊಬ್ಬರೂ ತಮ್ಮ ಗುರು ಅಥವಾ ಪರಂಪರೆಯು ನೀಡಿದ ಮತ್ತು ತಮ್ಮ ಸ್ವಭಾವಕ್ಕೆ ಸೂಕ್ತವಾದ ಆರಾಧನಾ ಪದ್ಧತಿಗೆ ಬದ್ಧರಾಗಿರಬೇಕು, ಅದೇ ವೇಳೆ ಇತರರ ಆರಾಧನಾ ಪದ್ಧತಿಗಳನ್ನೂ ಸಮಾನವಾಗಿ ಗೌರವಿಸಬೇಕು ಎಂದು ಕರೆ ನೀಡಿದರು. ಇತರರ ಆರಾಧನೆಯನ್ನೂ ಉತ್ತಮವೆಂದು ಪರಿಗಣಿಸುತ್ತೇವೆ, ಆದರೆ ಮತಾಂತರವಾಗದೆ ನಮ್ಮದೇ ಆದ ಪದ್ಧತಿಯಲ್ಲಿ ನಿಷ್ಠರಾಗಿರುತ್ತೇವೆ ಎಂದರು.

ಇಂದೋರ್‌ನಲ್ಲಿ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ‘ಛಾತ್ರೋಂ ಕೀ ಗೂಂಜ್’ ವಿದ್ಯಾರ್ಥಿ ಸಂವಾದ ಕಾರ್ಯಕ್ರಮ ನಿಗದಿಯಾಗಿದ್ದ ಸಂದರ್ಭದಲ್ಲೇ, ಯಾವುದೇ ರಾಜಕೀಯ ನಾಯಕರ ಹೆಸರನ್ನು ಪ್ರಸ್ತಾಪಿಸದೆ ಅಹಂಕಾರ ಹಾಗೂ ಸ್ವಪ್ರತಿಷ್ಠೆಯ ಬಗ್ಗೆ ಭಾಗವತ್ ನೀಡಿರುವ ಈ ಹೇಳಿಕೆಗಳು ರಾಜಕೀಯ ವಲಯದಲ್ಲೂ ಗಮನ ಸೆಳೆದಿವೆ.