ನೇಪಾಳ ಹಿಮಪಾತ: ಈವರೆಗೆ 4 ಮೃತದೇಹ ಪತ್ತೆ, ಇನ್ನೂ 12 ಮಂದಿ ನಾಪತ್ತೆ

ನೇಪಾಳದ ಹಿಮ್ಲುಂಗ್ ಹಿಮಾಲ್ ಶಿಖರದಲ್ಲಿ ಸಂಭವಿಸಿದ ಹಿಮಪಾತದ ಬಳಿಕ ಸೋಮವಾರ ಇನ್ನೂ ಎರಡು ಮೃತದೇಹಗಳು ಪತ್ತೆಯಾಗಿದ್ದು, ಇದರೊಂದಿಗೆ ಪತ್ತೆಯಾದ ಶವಗಳ ಸಂಖ್ಯೆ ನಾಲ್ಕಕ್ಕೆ ಏರಿಕೆಯಾಗಿದೆ. ಇನ್ನೂ 12 ಮಂದಿ ನಾಪತ್ತೆಯಾಗಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನೇಪಾಳದ ಮನಾಂಗ್ ಜಿಲ್ಲೆಯ ನಾರ್ ಫೂ ಪ್ರದೇಶದಲ್ಲಿರುವ 7,126 ಮೀಟರ್ ಎತ್ತರದ ಹಿಮ್ಲುಂಗ್ ಹಿಮಾಲ್ ಶಿಖರದ ಬೇಸ್ ಕ್ಯಾಂಪ್ ಮೇಲೆ ಭಾನುವಾರ ಈ ಹಿಮಪಾತ ಅಪ್ಪಳಿಸಿದೆ. ಪರ್ವತಾರೋಹಿಗಳು ಮತ್ತು ಸಹಾಯಕ ಸಿಬ್ಬಂದಿ ಇಲ್ಲಿ ಆಶ್ರಯ ಪಡೆದಿದ್ದರು. ಘಟನೆಯ ಬೆನ್ನಲ್ಲೇ ಹಲವು ಸಿಬ್ಬಂದಿ ಹಾಗೂ ಮಾರ್ಗದರ್ಶಿಗಳು (ಗೈಡ್‌ಗಳು) ನಾಪತ್ತೆಯಾಗಿರುವುದು ವರದಿಯಾಗಿದೆ. ಸೋಮವಾರ ಪತ್ತೆಯಾದ ಮೃತದೇಹಗಳನ್ನು ಬೀರೇಂದ್ರ ಗುರುಂಗ್ ಮತ್ತು ಘನ ಶ್ಯಾಮ್ ರಾಯ್ ಎಂದು ಗುರುತಿಸಲಾಗಿದೆ ಎಂದು ನೇಪಾಳ ನ್ಯಾಷನಲ್ ಮೌಂಟೇನ್ ಗೈಡ್ ಅಸೋಸಿಯೇಷನ್ (ಎನ್‌ಎನ್‌ಎಂಜಿಸಿ) ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದೆ.

ಛೇಬಿ ಭೋಟೆ ಮತ್ತು ಪಾಸಾಂಗ್ ಭೋಟೆ ಅವರ ಮೃತದೇಹಗಳು ಭಾನುವಾರವೇ ಪತ್ತೆಯಾಗಿದ್ದವು ಎಂದು ಸಂಸ್ಥೆ ತಿಳಿಸಿದೆ. ಸಂಘಟನೆಯ ಶೋಧ ಹಾಗೂ ರಕ್ಷಣಾ ತಂಡವು ಹಿಮಪಾತ ಪೀಡಿತ ಪ್ರದೇಶದಲ್ಲಿ ಕಾರ್ಯಾಚರಣೆಯನ್ನು ಮುಂದುವರಿಸಿದೆ.

ಹವಾಮಾನ ಮತ್ತು ಪರ್ವತದ ಪರಿಸ್ಥಿತಿಗಳು ಅನುಕೂಲಕರವಾಗಿದ್ದ ಕಾರಣ ತಂಡವು ಸೋಮವಾರವೂ ಶೋಧ ಕಾರ್ಯಾಚರಣೆಯನ್ನು ಮುಂದುವರಿಸಲು ಯೋಜಿಸಿದೆ ಎಂದು ಎನ್‌ಎನ್‌ಎಂಜಿಸಿ ಅಧ್ಯಕ್ಷ ತುಲ್ ಸಿಂಗ್ ಗುರುಂಗ್ ಹೇಳಿದ್ದಾಗಿ ‘ದಿ ಕಠ್ಮಂಡು ಪೋಸ್ಟ್’ ಪತ್ರಿಕೆ ವರದಿ ಮಾಡಿದೆ. “ನಾಲ್ಕು ಮೃತದೇಹಗಳನ್ನು ಹೊರತೆಗೆದು ಗುರುತಿಸಲಾಗಿದೆ. ಇನ್ನೂ 12 ಜನರು ನಾಪತ್ತೆಯಾಗಿದ್ದು, ಅವರಿಗಾಗಿ ಶೋಧ ಮುಂದುವರಿದಿದೆ” ಎಂದು ಗುರುಂಗ್ ಹೇಳಿಕೆಯನ್ನು ಪತ್ರಿಕೆ ಉಲ್ಲೇಖಿಸಿದೆ.

ವರದಿಯ ಪ್ರಕಾರ, ‘ಇಮ್ಯಾಜಿನ್ ನೇಪಾಳ್ ಟ್ರೆಕ್ ಆ್ಯಂಡ್ ಎಕ್ಸ್‌ಪೆಡಿಶನ್’ನ ಮಿಂಗ್ಮಾ ಜಿ. ಶೆರ್ಪಾ ನೇತೃತ್ವದ ಶೋಧ ತಂಡವನ್ನು ಸೋಮವಾರ ಬೆಳಿಗ್ಗೆ ಚಾಮೆಯಿಂದ ಹಿಮ್ಲುಂಗ್ ಬೇಸ್ ಕ್ಯಾಂಪ್‌ಗೆ ಹೆಲಿಕಾಪ್ಟರ್ ಮೂಲಕ ಕರೆದೊಯ್ಯಲಾಗಿದ್ದು, ಅವರು ರಕ್ಷಣಾ ಕಾರ್ಯಾಚರಣೆಯಲ್ಲಿ ಕೈಜೋಡಿಸಿದ್ದಾರೆ. ಭಾನುವಾರ ಪತ್ತೆಯಾದ ಮೃತದೇಹಗಳನ್ನು ಚಾಮೆ ಆಸ್ಪತ್ರೆಯಿಂದ ವಿಮಾನದ ಮೂಲಕ ಕಠ್ಮಂಡುವಿಗೆ ರವಾನಿಸಿ, ತ್ರಿಭುವನ್ ವಿಶ್ವವಿದ್ಯಾಲಯ ಬೋಧನಾ ಆಸ್ಪತ್ರೆಗೆ ತಲುಪಿಸಲಾಗಿದೆ.

ನೇಪಾಳದ ಪರ್ವತ ಜಿಲ್ಲೆಗಳಲ್ಲಿ ನಿರಂತರವಾಗಿ ಸುರಿಯುತ್ತಿರುವ ಮಳೆ ಮತ್ತು ಹಿಮಪಾತದ ನಡುವೆ ಭಾನುವಾರ ಈ ದುರಂತ ಸಂಭವಿಸಿದೆ. ಈ ಹವಾಮಾನದಿಂದಾಗಿ ಹಲವೆಡೆ ಭೂಕುಸಿತ ಮತ್ತು ಪ್ರವಾಹವೂ ಉಂಟಾಗಿದೆ. ಕಳೆದ ಆಗಸ್ಟ್‌ನಲ್ಲಿ ಸಂಭವಿಸಿದ ಭೀಕರ ಪ್ರವಾಹದ ಆಘಾತದಿಂದ ದೇಶ ಇನ್ನೂ ಚೇತರಿಸಿಕೊಳ್ಳುತ್ತಿರುವ ಸಂದರ್ಭದಲ್ಲೇ ಪರ್ವತಾರೋಹಿಗಳ ಸಾವು ಸಂಭವಿಸಿದೆ. ಆಗಸ್ಟ್ ತಿಂಗಳ ಪ್ರವಾಹವು ಹಲವು ಹಳ್ಳಿಗಳನ್ನು ಮುಳುಗಿಸಿದ್ದು, 1,400 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದರು ಮತ್ತು ಸುಮಾರು 6,000 ಜನರು ನಾಪತ್ತೆಯಾಗಿದ್ದರು.