ಇನ್ನು ಟ್ರೂ ಕಾಲರ್‌ ಅವಶ್ಯಕತೆಯಿಲ್ಲ, ಕರೆಯ ವೇಳೆ ನಂಬರ್‌ ಜೊತೆ ಹೆಸರನ್ನೂ ತೋರಿಸುವಂತೆ ಟ್ರಾಯ್‌ ಕ್ರಮ

ದೆಹಲಿ: ನಮ್ಮ ಮೊಬೈಲ್‌ಗೆ ಯಾರು ಕರೆ (Incoming Calls) ಮಾಡುತ್ತಿದ್ದಾರೆ ಎಂದು ತಿಳಿಯಲು, ನಾವು ಟ್ರೂ ಕಾಲರ್ (Truecaller) ನಂತಹ ಥರ್ಡ್-ಪಾರ್ಟಿ ಅಪ್ಲಿಕೇಶನ್‌ಗಳ ಮೇಲೆ ಅವಲಂಬಿತರಾಗಿದ್ದೇವೆ.

ಇನ್ನು ಮುಂದೆ ಅಂತಹ ಅವಶ್ಯಕತೆ ಇಲ್ಲದೆ, ಫೋನ್ ಸಂಪರ್ಕ ಪಡೆಯುವ ಸಮಯದಲ್ಲಿ ನೀಡಲಾದ ಐಡಿಯಲ್ಲಿನ ಹೆಸರು ಇನ್‌ಕಮಿಂಗ್ ಕರೆಗಳ ಸಮಯದಲ್ಲಿ ಮೊಬೈಲ್ ಪರದೆಯ ಮೇಲೆ ಕಾಣಿಸಿಕೊಳ್ಳುವ ಸೌಲಭ್ಯವು ಲಭ್ಯವಾಗಲಿದೆ. ಈ ಕುರಿತು ದೂರಸಂಪರ್ಕ ಇಲಾಖೆ (DoT) ಸಲ್ಲಿಸಿದ ಪ್ರಸ್ತಾವನೆಗಳಿಗೆ ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (TRAI) ಅನುಮೋದನೆ ನೀಡಿದೆ. ಇದು ಮುಂದಿನ ವರ್ಷ ಮಾರ್ಚ್ ವೇಳೆಗೆ ಲಭ್ಯವಾಗುವ ನಿರೀಕ್ಷೆಯಿದೆ.

ಕರೆ ಮಾಡುವವರ ಹೆಸರು ಪ್ರೆಸೆಂಟೇಷನ್ (CNAP) ಎಂದು ಕರೆಯಲ್ಪಡುವ ಈ ಸೇವೆಯ ಮೂಲಕ, ಇನ್ನು ಮುಂದೆ ಗ್ರಾಹಕರು ತಮಗೆ ಬರುವ ಕರೆಗಳಲ್ಲಿ ಪಾರದರ್ಶಕತೆಯನ್ನು ಪಡೆಯುತ್ತಾರೆ. ನಿಮಗೆ ಕರೆ ಮಾಡುವ ವ್ಯಕ್ತಿ ಸಂಬಂಧಿಸಿದ ಟೆಲಿಕಾಂ ಆಪರೇಟರ್‌ನೊಂದಿಗೆ ಸಿಮ್ ತೆಗೆದುಕೊಳ್ಳುವಾಗ ಯಾವ ಹೆಸರನ್ನು ನೀಡಿದ್ದಾರೋ, ಆ ಹೆಸರು ಮಾತ್ರ ನಿಮಗೆ ಪ್ರದರ್ಶನಗೊಳ್ಳುತ್ತದೆ.

ಇದರ ಮೂಲಕ ಸ್ಪ್ಯಾಮ್ ಕರೆಗಳ (Spam Calls) ತೊಂದರೆ ನಿವಾರಣೆಯಾಗುತ್ತದೆ. ಸಿಬಿಐ, ಐಟಿ, ಪೊಲೀಸ್, ಸಿಐಡಿ ಮುಂತಾದ ಹೆಸರುಗಳೊಂದಿಗೆ ವಂಚನೆ ಮಾಡುವ ಸಾಧ್ಯತೆ ಇರುವುದಿಲ್ಲ. ಈ ವೈಶಿಷ್ಟ್ಯವು ಗ್ರಾಹಕರಿಗೆ ಪೂರ್ವನಿಯೋಜಿತವಾಗಿ (Default) ಪ್ರಾರಂಭವಾಗುತ್ತದೆ.