ತಿಂಗಳಿಗೆ 18 ಸಾವಿರಕ್ಕೆ ಕತ್ತೆ ದುಡಿಮೆ; ಮೂವರ ಕೆಲಸ ಒಬ್ಬರಿಂದ ಮಾಡಿಸುತ್ತಿದ್ದಾರೆ!: ಇಂಡಿಗೋ ಉದ್ಯೋಗಿಯಿಂದ ಬಹಿರಂಗ ಪತ್ರ

ದೆಹಲಿ: ಇಂಡಿಗೋ (IndiGo) ವಿಮಾನಯಾನ ಸಂಸ್ಥೆಯು ತನ್ನ ಇತ್ತೀಚಿನ ಕ್ರಮಗಳಿಂದಾಗಿ ಸಾರ್ವಜನಿಕರಿಂದ ತೀವ್ರ ಟೀಕೆ ಎದುರಿಸುತ್ತಿರುವ ಸಂದರ್ಭದಲ್ಲಿ, ಸಂಸ್ಥೆಯ ಆಂತರಿಕ ನ್ಯೂನತೆಗಳನ್ನು ಬಹಿರಂಗಪಡಿಸಿರುವ ಇಂಡಿಗೋ ಉದ್ಯೋಗಿಯೊಬ್ಬರು ಬರೆದ ಬಹಿರಂಗ ಪತ್ರವು ಈಗ ಸಂಚಲನ ಮೂಡಿಸಿದೆ.

ಈ ದೀರ್ಘಕಾಲಿಕ ಉದ್ಯೋಗಿ ತಮ್ಮ ಪತ್ರದ ಮೂಲಕ ಹಲವಾರು ವರ್ಷಗಳಿಂದ ಸಂಸ್ಥೆಯ ಆಂತರಿಕ ಅವನತಿ ಮತ್ತು ಅಹಂಕಾರವನ್ನು ಹೊರಗೆಡಹಿದ್ದಾರೆ.

2006ರಲ್ಲಿ ಏರ್‌ಲೈನ್‌ನ ಮೊದಲ ದಿನಗಳಲ್ಲಿ ಕೆಲಸ ಮಾಡುವುದು ಹೆಮ್ಮೆಯ ವಿಷಯವಾಗಿತ್ತು. ಆದರೆ ನಂತರ ಸಂಸ್ಥೆಯಲ್ಲಿ ಅಹಂಕಾರ ಮತ್ತು ದುರಾಶೆ ಹೆಚ್ಚಾಯಿತು. ಸ್ಪರ್ಧೆಯನ್ನು ಹತ್ತಿಕ್ಕಲು ಆಕಾಶ ಏರ್‌ನಂತಹ ಹೊಸ ವಿಮಾನಯಾನ ಸಂಸ್ಥೆಗಳಿಗೆ ಹಾನಿ ಮಾಡಿ, ಆಕ್ರಮಣಕಾರಿಯಾಗಿ ವರ್ತಿಸಿದೆ ಎಂದಿದ್ದಾರೆ.

ಸಿಬ್ಬಂದಿ ಶೋಷಣೆ ಮತ್ತು ಕಡಿಮೆ ವೇತನ

ಸಿಬ್ಬಂದಿ ಕಲ್ಯಾಣ ಮತ್ತು ಕಾರ್ಯಾಚರಣೆಯ ಸಮಗ್ರತೆಯನ್ನು ಪಣಕ್ಕಿಟ್ಟು ಸಂಸ್ಥೆ ಬೆಳೆದಿದೆ. ಕೇವಲ ತಿಂಗಳಿಗೆ ₹16,000 ರಿಂದ ₹18,000 ಗಳಿಸುವ ಗ್ರೌಂಡ್ ಸಿಬ್ಬಂದಿಯೊಂದಿಗೆ, ವಿಮಾನಗಳ ಹಿಂದೆ ಓಡುವುದು ಮತ್ತು ಭಾರವಾದ ಲಗೇಜ್‌ಗಳನ್ನು ಸಾಗಿಸುವಂತಹ ಮೂವರು ವ್ಯಕ್ತಿಗಳ ಕೆಲಸವನ್ನು ಒಬ್ಬರಿಂದಲೇ ಮಾಡಿಸಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ. ಜೊತೆಗೆ ಅವರ ಮೇಲೆ ತೀವ್ರ ಒತ್ತಡ ಮತ್ತು ನಿರ್ಬಂಧಗಳನ್ನು ಹೇರಲಾಗಿದೆ.

ಒಂದು ಇ-ಮೇಲ್ ಸಹ ಸರಿಯಾಗಿ ಬರೆಯಲು ಸಾಧ್ಯವಾಗದ ವ್ಯಕ್ತಿಗಳು ಉಪಾಧ್ಯಕ್ಷ ಮಟ್ಟಕ್ಕೆ ಬೆಳೆಯಲು ಪ್ರಾರಂಭಿಸಿದ್ದಾರೆ ಎಂದು ಅವರು ಆಪಾದಿಸಿದ್ದಾರೆ. ಕೆಲಸದ ಒತ್ತಡದಿಂದ ಮಧ್ಯ ಕ್ಯಾಬಿನ್ ಸಿಬ್ಬಂದಿ ವಿಮಾನದಲ್ಲಿ ಅತ್ತಿರುವ ಬಗ್ಗೆಯೂ ತಿಳಿದುಬಂದಿದೆ.

ನಾಯಕತ್ವದ ಪ್ರಾಬಲ್ಯವನ್ನು ಸಮರ್ಥಿಸಿಕೊಳ್ಳಲು ಪೈಲಟ್‌ಗಳು, ಇಂಜಿನಿಯರ್‌ಗಳು ಮತ್ತು ಗ್ರೌಂಡ್ ಸಿಬ್ಬಂದಿ ಸೇರಿದಂತೆ ಉದ್ಯೋಗಿಗಳನ್ನು ಅಣಗಿಸಲಾಗುತ್ತಿದೆ. ಅಸುರಕ್ಷಿತ ಕರ್ತವ್ಯದ ಸಮಯ, ದಣಿವು ಮತ್ತು ಕಾರ್ಯಾಚರಣೆಯ ಒತ್ತಡಗಳ ಬಗ್ಗೆ ಆತಂಕ ವ್ಯಕ್ತಪಡಿಸಿದ ಪೈಲಟ್‌ಗಳ ಮೇಲೆ ಪ್ರಧಾನ ಕಚೇರಿಯ ಹಿರಿಯ ನಿರ್ವಹಣೆಯು ಕೆಲವೊಮ್ಮೆ ಗಟ್ಟಿಯಾಗಿ ಕೂಗಿದೆ, ಬೆದರಿಸಿದೆ ಮತ್ತು ಅವಮಾನಿಸಿದೆ. ಸಂಸ್ಥೆಯಲ್ಲಿ ಜವಾಬ್ದಾರಿಯ ಕೊರತೆ ಇದೆ, ಮತ್ತು ಕೇವಲ ಭಯವಷ್ಟೇ ಇದೆ ಎಂದು ಅವರು ಆರೋಪಿಸಿದ್ದಾರೆ.

ಅಷ್ಟೇ ಅಲ್ಲದೆ, ವಿಮಾನದಲ್ಲಿ ಪ್ರಯಾಣಿಸುವವರನ್ನು ಪ್ರಯಾಣಿಕರು (Passengers) ಎಂದು ಕರೆಯುವ ಬದಲು ಗ್ರಾಹಕರು (Customers) ಎಂದು ಕರೆಯಬೇಕು ಎಂದು ಸೂಚನೆ ನೀಡಲಾಗಿದ್ದು, ಇದು ಸಂಸ್ಥೆಯು ನಾಗರಿಕರ ಬಗ್ಗೆ ಹೊಂದಿರುವ ನಿರ್ಲಿಪ್ತತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಉದ್ಯೋಗಿ ತಮ್ಮ ಪತ್ರದಲ್ಲಿ ಹೇಳಿದ್ದಾರೆ.