ಖತಾರ್ ಗ್ಯಾಸ್ ಕೇಂದ್ರದ ಮೇಲೆ ದಾಳಿ: ಭಾರತಕ್ಕೆ ಇಂಧನ ಸಂಕಷ್ಟ! ಪರ್ಯಾಯ ಮಾರ್ಗಗಳಿಗಾಗಿ ಹುಡುಕಾಟ

ಇಸ್ರೇಲ್ ತನ್ನ ‘ಪಾರ್ಸ್’ ಗ್ಯಾಸ್ ಕ್ಷೇತ್ರದ ಮೇಲೆ ನಡೆಸಿದ ದಾಳಿಗೆ ಪ್ರತೀಕಾರವಾಗಿ, ಇರಾನ್ ಖತಾರ್‌ನ ‘ರಾಸ್ ಲಫಾನ್’ ಕೈಗಾರಿಕಾ ನಗರದ ಇಂಧನ ಸೌಲಭ್ಯದ ಮೇಲೆ ದಾಳಿ ನಡೆಸಿದೆ. ಇದು ತನ್ನ ಕಚ್ಚಾ ತೈಲದ ಶೇ. 88 ರಷ್ಟು ಮತ್ತು ಅನಿಲದ ಶೇ. 50 ರಷ್ಟು ಆಮದಿನ ಮೇಲೆ ಅವಲಂಬಿತವಾಗಿರುವ ಭಾರತಕ್ಕೆ ಆಘಾತಕಾರಿ ಸುದ್ದಿಯಾಗಿದೆ.

ಭಾರತಕ್ಕೆ ಅತಿ ದೊಡ್ಡ ಅನಿಲ ಪೂರೈಕೆದಾರ ರಾಷ್ಟ್ರವಾಗಿರುವ ಖತಾರ್‌ನಿಂದ ಬರುವ ಆಮದಿನಲ್ಲಿ ಈಗಾಗಲೇ ವ್ಯತ್ಯಯ ಉಂಟಾಗಿದೆ. ಭಾರತಕ್ಕೆ ಅಗತ್ಯವಿರುವ ಎಲ್‌ಪಿಜಿ (LPG) ಯಲ್ಲಿ ಮೂರನೇ ಒಂದು ಭಾಗ ಮತ್ತು ಲಿಕ್ವಿಫೈಡ್ ನ್ಯಾಚುರಲ್ ಗ್ಯಾಸ್ (LNG) ನಲ್ಲಿ ಸುಮಾರು ಅರ್ಧದಷ್ಟು ಖತಾರ್‌ನಿಂದಲೇ ಆಮದಾಗುತ್ತದೆ.

ಅಮೆರಿಕಾ-ಇಸ್ರೇಲ್ ವಿರುದ್ಧ ತನ್ನ ಪ್ರತೀಕಾರದ ದಾಳಿಯನ್ನು ತೀವ್ರಗೊಳಿಸಿರುವ ಇರಾನ್, ಖತಾರ್‌ನಲ್ಲಿರುವ ವಿಶ್ವದ ಅತಿ ದೊಡ್ಡ ಎಲ್‌ಎನ್‌ಜಿ ಪ್ಲಾಂಟ್ ಮೇಲೆ ದಾಳಿ ಮಾಡಿದೆ. ಈ ಹಿಂದೆ ‘ಹೊರ್ಮುಜ್ ಜಲಸಂಧಿ’ಯ (Strait of Hormuz) ದಿಗ್ಬಂಧನದಿಂದಾಗಿ ಉಂಟಾಗಿದ್ದ ಸಾರಿಗೆ ಸಮಸ್ಯೆಗಳನ್ನು ಭಾರತವು ತಾತ್ಕಾಲಿಕ ಎಂದು ಭಾವಿಸಿತ್ತು. ಆದರೆ ಈಗ ರಾಸ್ ಲಫಾನ್ ಗ್ಯಾಸ್ ಕೇಂದ್ರಕ್ಕೆ ಆಗಿರುವ ಹಾನಿಯು ಭಾರತಕ್ಕೆ ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಲಿದೆ. ಈ ಸೌಲಭ್ಯದ ದುರಸ್ತಿಗೆ ಎಷ್ಟು ಸಮಯ ಬೇಕಾಗುತ್ತದೆ ಎಂಬುದು ತಿಳಿದಿಲ್ಲ. ಯುದ್ಧ ಕೊನೆಗೊಂಡರೂ ಅಥವಾ ನಿರ್ಬಂಧಗಳು ಸಡಿಲಿಕೆಯಾದರೂ, ರಾಸ್ ಲಫಾನ್‌ನಿಂದ ಎಲ್‌ಎನ್‌ಜಿ ಮತ್ತು ಪಿಎನ್‌ಜಿ ಪೂರೈಕೆಯು ಸದ್ಯಕ್ಕೆ ಸುಗಮವಾಗುವ ಸಾಧ್ಯತೆಗಳಿಲ್ಲ.

ದೀರ್ಘಾವಧಿ ಒಪ್ಪಂದಗಳು ಪೆಟ್ರೋನೆಟ್ ಎಲ್‌ಎನ್‌ಜಿ ಲಿಮಿಟೆಡ್ (PLL), ಗೈಲ್ ಇಂಡಿಯಾ (GAIL) ಮತ್ತು ಜಿಎಸ್‌ಪಿಸಿ (GSPC) ಸಂಸ್ಥೆಗಳು ಅನಿಲ ಪೂರೈಕೆಗೆ ಸಂಬಂಧಿಸಿದಂತೆ ಖತಾರ್‌ನೊಂದಿಗೆ ದೀರ್ಘಾವಧಿಯ ಒಪ್ಪಂದಗಳನ್ನು ಹೊಂದಿವೆ. ಪೆಟ್ರೋನೆಟ್ ಸಂಸ್ಥೆಯು ಖತಾರ್‌ನಿಂದ ವರ್ಷಕ್ಕೆ 75 ಲಕ್ಷ ಟನ್ ಎಲ್‌ಎನ್‌ಜಿಯನ್ನು ಆಮದು ಮಾಡಿಕೊಳ್ಳುತ್ತಿದೆ. ಜಿಎಸ್‌ಪಿಸಿ ಮತ್ತು ಗೈಲ್ ಸಂಸ್ಥೆಗಳು ಸೇರಿ ಒಟ್ಟು 10 ಲಕ್ಷ ಟನ್ ಎಲ್‌ಎನ್‌ಜಿಯನ್ನು ಆಮದು ಮಾಡಿಕೊಳ್ಳುತ್ತಿವೆ.