ಈಗಾಗಲೇ ಸಾಂಸ್ಕೃತಿಕವಾಗಿ ಹಿಂದೂ ದೇಶವಾಗಿರುವ ಭಾರತವನ್ನು ರಾಜಕೀಯವಾಗಿಯೂ ಹಿಂದೂ ರಾಷ್ಟ್ರವೆಂದು ಘೋಷಿಸಬೇಕು: ಸಾಧ್ವಿ ರಿತಂಭರ

ಪುರಿ: ಭಾರತವು ತನ್ನ ಸಾಂಸ್ಕೃತಿಕ ಮೌಲ್ಯಗಳು, ಪರಂಪರೆ ಮತ್ತು ಜೀವನ ವಿಧಾನದ ದೃಷ್ಟಿಯಿಂದ ಈಗಾಗಲೇ ಹಿಂದೂ ದೇಶವಾಗಿದ್ದು, ರಾಜಕೀಯವಾಗಿಯೂ ಭಾರತವನ್ನು ಅಧಿಕೃತವಾಗಿ ‘ಹಿಂದೂ ರಾಷ್ಟ್ರ’ ಎಂದು ಘೋಷಿಸುವ ಅಗತ್ಯವಿದೆ ಎಂದು ಪದ್ಮಭೂಷಣ ಪ್ರಶಸ್ತಿ ಪುರಸ್ಕೃತ ಸಾಧ್ವಿ ರಿತಂಭರ ಹೇಳಿದ್ದಾರೆ. ಒಡಿಶಾದ ಪುರಿಯಲ್ಲಿ ಶ್ರೀ ಜಗನ್ನಾಥ ಸ್ವಾಮಿಯ ದರ್ಶನ ಪಡೆದ ಬಳಿಕ ಅವರು ಮಾಧ್ಯಮಗಳೊಂದಿಗೆ ಮಾತನಾಡಿದರು.

ಪುರಿಯ ಬಲಿಯಾಪಂಡಾದಲ್ಲಿ ಆಯೋಜಿಸಲಾಗಿರುವ ಏಳು ದಿನಗಳ ಭಾಗವತ ಕಥಾ ಕಾರ್ಯಕ್ರಮಕ್ಕಾಗಿ ಆಗಮಿಸಿರುವ ಅವರು, ‘ಹಿಂದೂ ರಾಷ್ಟ್ರ’ ಚರ್ಚೆಯ ಕುರಿತು ಮಾತನಾಡುತ್ತಾ, “ಭಾರತದ ಬಹುಸಂಖ್ಯಾತ ಜನರ ಚಿಂತನೆಯಲ್ಲಿ ‘ವಸುಧೈವ ಕುಟುಂಬಕಂ’ (ಇಡೀ ಜಗತ್ತೇ ಒಂದು ಕುಟುಂಬ) ಎಂಬ ಉದಾತ್ತ ಭಾವನೆಯಿದೆ. ಭಾರತೀಯ ಸಂವಿಧಾನದ ಮೂಲ ಪ್ರತಿಯಲ್ಲಿರುವ ಶ್ರೀರಾಮನ ಚಿತ್ರದಿಂದ ಹಿಡಿದು ‘ಸತ್ಯಮೇವ ಜಯತೆ’ ಧ್ಯೇಯವಾಕ್ಯದವರೆಗೆ ಎಲ್ಲದರಲ್ಲೂ ದೇಶದ ಸನಾತನ ಸಾಂಸ್ಕೃತಿಕ ಅಸ್ಮಿತೆ ಎದ್ದು ಕಾಣುತ್ತದೆ. ಹಿಂದುಗಳ ಕಲ್ಯಾಣವೇ ಭಾರತದ ಕಲ್ಯಾಣವಾಗಿದ್ದು, ನಡವಳಿಕೆ ಮತ್ತು ಸಂಸ್ಕೃತಿಯಲ್ಲಿ ಹಿಂದೂ ರಾಷ್ಟ್ರವಾಗಿರುವ ಭಾರತವನ್ನು ಸಾಂವಿಧಾನಿಕ ಹಾಗೂ ರಾಜಕೀಯವಾಗಿಯೂ ಹಾಗೆಯೇ ಘೋಷಿಸಬೇಕು” ಎಂದು ಅಭಿಪ್ರಾಯಪಟ್ಟರು.

ಇದೇ ವೇಳೆ ಗೋರಕ್ಷಣೆ ಮತ್ತು ಮಹಿಳೆಯರ ಸುರಕ್ಷತೆಯ ಕುರಿತು ಮಾತನಾಡಿದ ಸಾಧ್ವಿ ರಿತಂಭರ, “ಗೋಹತ್ಯೆ, ಮಹಿಳೆಯರ ಮೇಲಿನ ದೌರ್ಜನ್ಯ ಮತ್ತು ಹೆಣ್ಣು ಭ್ರೂಣಹತ್ಯೆಗಳು ನಡೆಯುವ ನೆಲದಲ್ಲಿ ಶಾಂತಿ ಮತ್ತು ನೆಮ್ಮದಿ ನೆಲೆಸಲು ಸಾಧ್ಯವಿಲ್ಲ. ಸರ್ಕಾರಗಳು ಆದಾಯ ಗಳಿಕೆಗೆ ಬೇರೆ ಹತ್ತಾರು ಮಾರ್ಗಗಳನ್ನು ಹುಡುಕಿಕೊಳ್ಳಬಹುದೇ ಹೊರತು, ಗೋಮಾಂಸ ಮಾರಾಟದಿಂದ ಆದಾಯ ಗಳಿಸುವುದು ಘೋರ ಪಾಪ” ಎಂದು ಕಳವಳ ವ್ಯಕ್ತಪಡಿಸಿದರು.