ಮಕ್ಕಳ ಆರೋಗ್ಯದ ಬಗ್ಗೆ ಸುಪ್ರೀಂ ಕೋರ್ಟ್ ಕಳವಳ: ಪ್ಯಾಕೆಟ್ ಆಹಾರಗಳ ಮುಂಭಾಗದಲ್ಲಿ ಕಡ್ಡಾಯ ಎಚ್ಚರಿಕೆ ಲೇಬಲ್‌ಗೆ ಎಫ್‌ಎಸ್‌ಎಸ್‌ಎಐ ಸಮ್ಮತಿ

ಪ್ಯಾಕ್ ಮಾಡಿದ ಆಹಾರ ಪದಾರ್ಥಗಳಿಂದ ಮಕ್ಕಳ ಆರೋಗ್ಯದ ಮೇಲಾಗುವ ಪರಿಣಾಮಗಳ ಕುರಿತು ಗಂಭೀರ ಕಳವಳ ವ್ಯಕ್ತಪಡಿಸಿರುವ ಸುಪ್ರೀಂ ಕೋರ್ಟ್, ಆಹಾರ ಉತ್ಪನ್ನಗಳ ಮುಂಭಾಗದಲ್ಲಿ ಎಚ್ಚರಿಕೆ ಲೇಬಲ್ ಅಳವಡಿಸುವ ವಿಚಾರವನ್ನು ‘ಅತ್ಯಂತ ಗಂಭೀರವಾಗಿ’ ಪರಿಗಣಿಸಿದೆ. ನ್ಯಾಯಮೂರ್ತಿ ಜೆ.ಬಿ. ಪಾರ್ದೀವಾಲಾ ಮತ್ತು ನ್ಯಾಯಮೂರ್ತಿ ಕೆ. ವಿನೋದ್ ಚಂದ್ರನ್ ಅವರಿದ್ದ ಪೀಠವು, ಇದು ರಾಷ್ಟ್ರೀಯ ಹಿತಾಸಕ್ತಿಯ ವಿಷಯವಾಗಿದ್ದು, ಎಲ್ಲಾ ಕಡೆಯಿಂದಲೂ ಸಂಪೂರ್ಣ ಸಹಕಾರವನ್ನು ನಿರೀಕ್ಷಿಸುವುದಾಗಿ ತಿಳಿಸಿದೆ.

ವಿಚಾರಣೆ ವೇಳೆ, ಸಕ್ಕರೆ, ಉಪ್ಪು ಅಥವಾ ಕೊಬ್ಬಿನಂತಹ ಹಾನಿಕಾರಕ ಅಂಶಗಳಲ್ಲಿ ಯಾವುದಾದರೂ ಒಂದು ಅಂಶ ನಿಗದಿತ ಮಿತಿಗಿಂತ ಹೆಚ್ಚಿದ್ದರೂ ಅಂತಹ ಉತ್ಪನ್ನಗಳ ಮುಂಭಾಗದಲ್ಲಿ ಎಚ್ಚರಿಕೆ ಲೇಬಲ್‌ಗಳನ್ನು (Front-of-pack warning labels) ಅಳವಡಿಸಲು ಸಿದ್ಧವಿರುವುದಾಗಿ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (ಎಫ್‌ಎಸ್‌ಎಸ್‌ಎಐ) ಸುಪ್ರೀಂ ಕೋರ್ಟ್‌ಗೆ ತಿಳಿಸಿತು. ಈ ಹಿಂದೆ ಎರಡು ಅಥವಾ ಹೆಚ್ಚಿನ ಹಾನಿಕಾರಕ ಅಂಶಗಳನ್ನು ಹೊಂದಿರುವ ಉತ್ಪನ್ನಗಳಿಗೆ ಮಾತ್ರ ಆರಂಭಿಕ ಹಂತದಲ್ಲಿ ಎಚ್ಚರಿಕೆ ವ್ಯವಸ್ಥೆಯನ್ನು ಅನ್ವಯಿಸಲು ಪ್ರಾಧಿಕಾರ ಪ್ರಸ್ತಾಪಿಸಿತ್ತು. ಆದರೆ, ಕೇವಲ ಒಂದು ಅಂಶ ಅತಿಯಾಗಿದ್ದರೂ ಅಂತಹ ಆಹಾರಕ್ಕೆ ಎಚ್ಚರಿಕೆ ಲೇಬಲ್ ಏಕೆ ಇರಬಾರದು ಎಂದು ಸುಪ್ರೀಂ ಕೋರ್ಟ್ ಪ್ರಶ್ನಿಸಿದ ನಂತರ ಎಫ್‌ಎಸ್‌ಎಸ್‌ಎಐ ತನ್ನ ನಿಲುವನ್ನು ಬದಲಾಯಿಸಿಕೊಂಡಿತು.

ಪ್ಯಾಕ್ ಮಾಡಿದ ಆಹಾರ ಪದಾರ್ಥಗಳಲ್ಲಿ ಸಕ್ಕರೆ, ಉಪ್ಪು ಅಥವಾ ಕೊಬ್ಬು ನಿಗದಿತ ಮಿತಿಯನ್ನು ಮೀರಿದರೆ ಕೆಂಪು ಬಣ್ಣದ, ಷಡ್ಭುಜಾಕೃತಿಯ (Hexagonal) ಎಚ್ಚರಿಕೆ ಲೇಬಲ್‌ಗಳನ್ನು ಅಳವಡಿಸಲು ಎಫ್‌ಎಸ್‌ಎಸ್‌ಎಐ ಪ್ರಸ್ತಾಪಿಸಿದೆ. ಎಫ್‌ಎಸ್‌ಎಸ್‌ಎಐ ಪರ ಹಾಜರಾದ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಬ್ರಿಜೇಂದರ್ ಚಹಾರ್, ಎರಡು ಹಂತಗಳಲ್ಲಿ ಇದನ್ನು ಜಾರಿಗೆ ತರುವ ಹಿಂದಿನ ಯೋಜನೆ ಕೇವಲ ಸಲಹೆಯಷ್ಟೇ ಆಗಿತ್ತು ಎಂದು ಸ್ಪಷ್ಟಪಡಿಸಿದರು. ನ್ಯಾಯಾಲಯದ ನಿರ್ದೇಶನದಂತೆ ಒಂದೇ ಹಂತದಲ್ಲಿ, ಯಾವುದೇ ಒಂದು ಹಾನಿಕಾರಕ ಅಂಶ ಹೆಚ್ಚಿದ್ದರೂ ಎಚ್ಚರಿಕೆ ನೀಡುವ ನಿಯಮವನ್ನು ಜಾರಿಗೆ ತರಲು ಪ್ರಾಧಿಕಾರ ಒಪ್ಪಿಗೆ ಸೂಚಿಸಿದೆ.

ಆಹಾರ ಸಂಸ್ಕರಣಾಗಾರರ ಸಂಘವನ್ನು ಪ್ರತಿನಿಧಿಸಿದ ಹಿರಿಯ ವಕೀಲ ಮಣಿಂದರ್ ಸಿಂಗ್, ಪ್ರತಿ 100 ಗ್ರಾಂ ಮಾನದಂಡ ಮತ್ತು ಪ್ರತಿ ಸರ್ವಿಂಗ್ ಲೆಕ್ಕಾಚಾರ ಎರಡನ್ನೂ ಬಳಸುವ ಪ್ರಸ್ತಾಪದ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದರು. ಐಸಿಎಂಆರ್ ಮಾರ್ಗಸೂಚಿಗಳು ಮತ್ತು ಅಂತರರಾಷ್ಟ್ರೀಯ ಪದ್ಧತಿಗಳನ್ನು ಉಲ್ಲೇಖಿಸಿ ನಿಯಮಾವಳಿಗಳಲ್ಲಿ ಸ್ಪಷ್ಟತೆ ನೀಡುವಂತೆ ಕೋರಲಾಗಿದೆ ಎಂದು ತಿಳಿಸಿದರು.

ಮತ್ತೊಬ್ಬ ಹಿರಿಯ ವಕೀಲ ದೇವದತ್ ಕಾಮತ್ ವಾದ ಮಂಡಿಸಿ, ಅಲ್ಟ್ರಾ-ಪ್ರೊಸೆಸ್ಡ್ ಆಹಾರಗಳನ್ನು ಮತ್ತು ಪೌಷ್ಟಿಕಾಂಶದ ಮೌಲ್ಯವನ್ನೂ ಒಳಗೊಂಡಿರುವ ಆಹಾರಗಳನ್ನು ಒಂದೇ ರೀತಿಯಾಗಿ ಪರಿಗಣಿಸಬಾರದು ಎಂದರು. ಕುರ್ಕುರೆ ಮತ್ತು ಉಪ್ಪು ಬೆರೆಸಿದ ಗೋಡಂಬಿಯನ್ನು ಉದಾಹರಣೆಯಾಗಿ ನೀಡಿದ ಅವರು, ಆಹಾರದ ಸ್ವರೂಪ ಮತ್ತು ಸಂಸ್ಕರಣಾ ವಿಧಾನವನ್ನೂ ಗಮನದಲ್ಲಿಟ್ಟುಕೊಂಡು ಎಚ್ಚರಿಕೆ ನಿಯಮ ರೂಪಿಸಬೇಕು ಎಂದು ವಾದಿಸಿದರು. ಅಲ್ಲದೆ, ಭಾರತದಲ್ಲಿ ಕೆಂಪು ಬಣ್ಣವನ್ನು ಮಾಂಸಾಹಾರಿ ಗುರುತಿಗಾಗಿ ಸಾಮಾನ್ಯವಾಗಿ ಬಳಸುವುದರಿಂದ ಎಚ್ಚರಿಕೆ ಲೇಬಲ್‌ಗೆ ಬೇರೆ ಬಣ್ಣ ಬಳಸುವಂತೆ ಅವರು ಸಲಹೆ ನೀಡಿದರು.

ಅರ್ಜಿದಾರ ಎನ್‌ಜಿಒ ಪರ ಹಾಜರಾದ ವಕೀಲ ರಾಜೀವ್ ಶಂಕರ್ ದ್ವಿವೇದಿ, ಎಫ್‌ಎಸ್‌ಎಸ್‌ಎಐ ಪ್ರಸ್ತಾಪದಲ್ಲಿರುವ ಲೋಪದೋಷಗಳನ್ನು ನ್ಯಾಯಾಲಯದ ಗಮನಕ್ಕೆ ತಂದರು. ಮುಂದಿನ ಕ್ರಮ ಕೈಗೊಳ್ಳುವ ಮುನ್ನ ಹೆಚ್ಚಿನ ಮಾಹಿತಿ ಅಗತ್ಯವಿದೆ ಎಂದ ಪೀಠ, ಶೀಘ್ರದಲ್ಲೇ ಮಧ್ಯಂತರ ಆದೇಶ ಹೊರಡಿಸುವುದಾಗಿ ತಿಳಿಸಿತು. ಎಫ್‌ಎಸ್‌ಎಸ್‌ಎಐ ಮತ್ತು ಅರ್ಜಿದಾರರು ತಮ್ಮ ವರದಿಗಳನ್ನು ಸಲ್ಲಿಸಿದ ನಂತರ, ಸೆಪ್ಟೆಂಬರ್ 28 ರಂದು ಈ ಪ್ರಕರಣದ ಮುಂದಿನ ವಿಚಾರಣೆ ನಡೆಯಲಿದೆ.