ಮುಸ್ಲಿಮರಲ್ಲಿ ಮೂಡುತ್ತಿರುವ ಪ್ರತ್ಯೇಕತೆಯ ಭಾವನೆ ಸಮಾಜದ ನೈತಿಕ ಕುಸಿತದ ಸಂಕೇತ: ಬಿಜೆಪಿಯ ಮುಸ್ಲಿಂ ನಾಯಕನಿಗೆ ಹೋಟೆಲ್ ನಿರಾಕರಣೆ ವಿರುದ್ಧ ಶಶಿ ತರೂರ್ ಆಕ್ರೋಶ!

ದೆಹಲಿ: ಭಾರತದಲ್ಲಿ ಮುಸ್ಲಿಂ ಸಮುದಾಯದ ವಿರುದ್ಧ ಹೆಚ್ಚಾಗುತ್ತಿರುವ ತಾರತಮ್ಯದ ಧೋರಣೆ ಹಾಗೂ ಅದನ್ನು ಸಮಾಜದಲ್ಲಿ ಸಾಮಾನ್ಯ ಎಂಬಂತೆ ಬಿಂಬಿಸುತ್ತಿರುವುದರ ಕುರಿತು ಕಾಂಗ್ರೆಸ್ ಹಿರಿಯ ನಾಯಕ ಮತ್ತು ಸಂಸದ ಶಶಿ ತರೂರ್ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ಇತ್ತೀಚೆಗೆ ಮಹಾರಾಷ್ಟ್ರದಲ್ಲಿ ಮುಸ್ಲಿಂ ಸಮುದಾಯಕ್ಕೆ ಸೇರಿದ ಸ್ವತಃ ಬಿಜೆಪಿ ನಾಯಕನಿಗೇ ಹೋಟೆಲ್‌ನಲ್ಲಿ ವಾಸ್ತವ್ಯ ನಿರಾಕರಿಸಿದ ಘಟನೆಯನ್ನು ಉಲ್ಲೇಖಿಸಿರುವ ಅವರು, ಇದು ನಮ್ಮ ಇಡೀ ಸಮಾಜದ ‘ನೈತಿಕ ಕುಸಿತ’ವನ್ನು ಎತ್ತಿ ತೋರಿಸುತ್ತದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಎನ್‌ಡಿಟಿವಿ (NDTV) ಮಾಧ್ಯಮದಲ್ಲಿ ಪ್ರಕಟವಾದ ಲೇಖನವೊಂದನ್ನು ಹಂಚಿಕೊಂಡಿರುವ ಶಶಿ ತರೂರ್, ಜಮ್ಮು ಮತ್ತು ಕಾಶ್ಮೀರದ ಬಿಜೆಪಿ ಮಾಧ್ಯಮ ವಿಭಾಗದ ಸಹ-ಪ್ರಭಾರಿ ಸಜ್ಜಾದ್ ಯೂಸುಫ್ ಶಾ ಅವರಿಗೆ ಮಹಾರಾಷ್ಟ್ರದ ಔರಂಗಾಬಾದ್‌ನ ಹೋಟೆಲೊಂದರಲ್ಲಿ ಎದುರಾದ ಕಹಿ ಅನುಭವವನ್ನು ಪ್ರಸ್ತಾಪಿಸಿದ್ದಾರೆ. ಸಜ್ಜಾದ್ ಅವರು ಹೋಟೆಲ್‌ಗೆ ಚೆಕ್-ಇನ್ ಆದ ಕೆಲವೇ ಕ್ಷಣಗಳಲ್ಲಿ, ಅವರ ಮುಸ್ಲಿಂ ಮತ್ತು ಕಾಶ್ಮೀರಿ ಅಸ್ಮಿತೆಯನ್ನು ಕಾರಣವಾಗಿಸಿ ಹೋಟೆಲ್‌ನಿಂದ ಹೊರಹೋಗುವಂತೆ ಸೂಚಿಸಲಾಗಿತ್ತು. “ಕೆಲವೊಮ್ಮೆ ಇಂತಹ ಒಂದೇ ಒಂದು ಘಟನೆಯು ದಿನನಿತ್ಯದ ರಾಜಕೀಯ ಗದ್ದಲಗಳ ನಡುವೆ ನುಗ್ಗಿ, ನಮ್ಮ ಸಮಾಜ ಎಷ್ಟು ಆಳವಾಗಿ ನೈತಿಕವಾಗಿ ಪತನಗೊಳ್ಳುತ್ತಿದೆ ಎಂಬುದನ್ನು ಜಗತ್ತಿಗೆ ಬಿಚ್ಚಿಡುತ್ತದೆ,” ಎಂದು ತರೂರ್ ಬರೆದಿದ್ದಾರೆ.

ಲಘು ಅಲ್ಪಸಂಖ್ಯಾತರನ್ನು ನಡೆಸಿಕೊಳ್ಳುವ ರೀತಿಯೇ ನಾಗರಿಕತೆಯ ಅಳತೆಗೋಲು: ಭಾರತದ ಹಿರಿಮೆಯನ್ನು ಕೇವಲ ಆರ್ಥಿಕ ಬೆಳವಣಿಗೆ ಅಥವಾ ಮೂಲಸೌಕರ್ಯಗಳ ಅಭಿವೃದ್ಧಿಯಿಂದ ಅಳೆಯಲು ಸಾಧ್ಯವಿಲ್ಲ ಎಂದು ಪ್ರತಿಪಾದಿಸಿರುವ ಶಶಿ ತರೂರ್, “ಒಂದು ಶ್ರೇಷ್ಠ ನಾಗರಿಕತೆಯನ್ನು ಕೇವಲ ಜಿಡಿಪಿ (GDP) ಪ್ರಗತಿ, ಹೆದ್ದಾರಿಗಳು ಅಥವಾ ರಕ್ಷಣಾ ವ್ಯವಸ್ಥೆಗಳಿಂದ ನಿರ್ಣಯಿಸಲು ಸಾಧ್ಯವಿಲ್ಲ. ಆ ದೇಶದ ಅತ್ಯಂತ ದುರ್ಬಲ ವರ್ಗದ ಜನರನ್ನು ಅದು ಹೇಗೆ ನಡೆಸಿಕೊಳ್ಳುತ್ತದೆ, ಅಲ್ಪಸಂಖ್ಯಾತರು ರಾತ್ರಿಯಿಡೀ ಎಷ್ಟು ಸುರಕ್ಷಿತವಾಗಿ ಮಲಗಬಲ್ಲರು ಮತ್ತು ದೇಶಕ್ಕೆ ಬರುವ ಅಪರಿಚಿತರು ಇಲ್ಲಿ ಎಷ್ಟು ಸುರಕ್ಷಿತವಾಗಿ ತಮ್ಮ ಮನೆಯಂತೆ ಅನುಭವಿಸಬಲ್ಲರು ಎಂಬುದರ ಮೇಲೆ ನಿಜವಾದ ಹಿರಿಮೆ ಅಡಗಿರುತ್ತದೆ,” ಎಂದಿದ್ದಾರೆ.

ದೇಶದ ನಾಗರಿಕರಲ್ಲಿ ಅಸುರಕ್ಷತೆ ಮತ್ತು ಪ್ರತ್ಯೇಕತೆಯ ಭಾವನೆ ಮೂಡಿದರೆ ಸಾಮಾಜಿಕ ಸಾಮರಸ್ಯವು ಸಂಪೂರ್ಣವಾಗಿ ದುರ್ಬಲಗೊಳ್ಳುತ್ತದೆ. ಒಂದು ನಿರ್ದಿಷ್ಟ ಸಮುದಾಯಕ್ಕೆ ದೇಶದ ವ್ಯವಸ್ಥೆಯಲ್ಲಿ ನಂಬಿಕೆಯೇ ಇಲ್ಲದಂತಾದರೆ, ಯಾವುದೇ ರೀತಿಯ ಕಠಿಣ ಕಣ್ಗಾವಲು ಅಥವಾ ಸರ್ಕಾರದ ಅಧಿಕಾರದಿಂದ ದೇಶದಲ್ಲಿ ಶಾಂತಿಯನ್ನು ಕಾಪಾಡಲು ಸಾಧ್ಯವಿಲ್ಲ ಎಂದು ಅವರು ಎಚ್ಚರಿಸಿದ್ದಾರೆ.

ಬಿಜೆಪಿ ಈ ಘಟನೆಯ ಬಗ್ಗೆ ಆತ್ಮಾವಲೋಕನ ಮಾಡಿಕೊಳ್ಳಲಿ: ಆಡಳಿತಾರೂಢ ಬಿಜೆಪಿ ತನ್ನದೇ ಪಕ್ಷದ ಪದಾಧಿಕಾರಿಗೆ ನಡೆದಿರುವ ಈ ಅನ್ಯಾಯದ ಬಗ್ಗೆ ಗಂಭೀರವಾಗಿ ಆತ್ಮಾವಲೋಕನ ಮಾಡಿಕೊಳ್ಳಬೇಕು ಎಂದು ತರೂರ್ ಒತ್ತಾಯಿಸಿದ್ದಾರೆ. “ಇಲ್ಲಿನ ಅತ್ಯಂತ ದುಃಖದ ಸಂಗತಿಯೆಂದರೆ, ಆಡಳಿತ ಪಕ್ಷದ ಒಳಗೆ ಕೆಲಸ ಮಾಡುವ ವ್ಯಕ್ತಿಗೂ ಸಹ ಅವರ ಧಾರ್ಮಿಕ ಅಸ್ಮಿತೆಯ ಆಧಾರದ ಮೇಲೆ ನಡೆಯುವ ಪೂರ್ವಾಗ್ರಹ ಪೀಡಿತ ತಾರತಮ್ಯದಿಂದ ರಕ್ಷಣೆ ಸಿಕ್ಕಿಲ್ಲ,” ಎಂದು ಅವರು ವಿಷಾದಿಸಿದ್ದಾರೆ.

ತಾರತಮ್ಯ ಅಥವಾ ದ್ವೇಷದ ರಾಜಕಾರಣ ಒಮ್ಮೆ ಸಮಾಜದಲ್ಲಿ ಸಾಂಸ್ಥಿಕ ರೂಪ ಪಡೆದುಕೊಂಡರೆ, ಅದು ವ್ಯಕ್ತಿಯ ರಾಜಕೀಯ ನಿಷ್ಠೆಯನ್ನು ನೋಡುವುದಿಲ್ಲ, ಬದಲಿಗೆ ನೇರವಾಗಿ ಅವರ ಧರ್ಮ ಅಥವಾ ಹೆಸರನ್ನೇ ಗುರಿಯಾಗಿಸುತ್ತದೆ. ಕೇವಲ ಚುನಾವಣಾ ಲಾಭಕ್ಕಾಗಿ ಸಮಾಜದಲ್ಲಿ ಧ್ರುವೀಕರಣವನ್ನು ಒಂದು ಅಸ್ತ್ರವಾಗಿ ಬಳಸಿಕೊಂಡರೆ, ಅದು ಮುಂದೊಂದು ದಿನ ಯಾರ ನಿಯಂತ್ರಣಕ್ಕೂ ಸಿಗದ ಭೀಕರ ರಕ್ಕಸನಾಗಿ ಬೆಳೆಯುತ್ತದೆ ಎಂದು ಅವರು ಪರೋಕ್ಷವಾಗಿ ಎಚ್ಚರಿಸಿದ್ದಾರೆ.