70 ಕೋಟಿ ತೆರಿಗೆ ವಂಚನೆ : ಶಿಮಾರೂ ಎಂಟರ್‌ಟೈನ್‌ಮೆಂಟ್ ಲಿಮಿಟೆಡ್‌ನ CEO ಹಿರೇನ್ ಗಡ ಬಂಧನ

ಮುಂಬೈ:70.25 ಕೋಟಿ ಮೊತ್ತದ ತೆರಿಗೆ ವಂಚನೆ ಆರೋಪದ ಮೇಲೆ ಶಿಮಾರೂ ಎಂಟರ್‌ಟೈನ್‌ಮೆಂಟ್ (Shemaroo Entertainment) ಲಿಮಿಟೆಡ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (ಸಿಇಒ) ಹಿರೇನ್ ಗಡ ಅವರನ್ನು ಕೇಂದ್ರ ಸರಕು ಮತ್ತು ಸೇವಾ ತೆರಿಗೆ (ಸಿಜಿಎಸ್‌ಟಿ) ಇಲಾಖೆ ಬುಧವಾರ ಬಂಧಿಸಿದೆ.

ಶಿಮಾರೂ ಎಂಟರ್‌ಟೈನ್‌ಮೆಂಟ್ ಲಿಮಿಟೆಡ್ ಹಲವಾರು ಬಾಲಿವುಡ್ ಚಲನಚಿತ್ರಗಳನ್ನು ನಿರ್ಮಿಸಿದೆ.

ಹಿರೇನ್ ಗಡ ಮತ್ತು ಅವರ ಸಹಚರರು ಕೋಟ್ಯಂತರ ರೂಪಾಯಿ ಮೊತ್ತದ ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್ (ಐಟಿಸಿ) ಪಡೆಯಲು ವಿವಿಧ ಶೆಲ್ ಸಂಸ್ಥೆಗಳನ್ನು ರಚಿಸಿದ್ದು, ಇದು ಸರ್ಕಾರದ ಬೊಕ್ಕಸಕ್ಕೆ ಭಾರಿ ನಷ್ಟವನ್ನು ಉಂಟುಮಾಡಿದೆ ಎಂದು ಜಿಎಸ್‌ಟಿ ಅಧಿಕಾರಿಗಳು ಹೇಳಿದ್ದಾರೆ. ಯಾವುದೇ ಸರಕು ಅಥವಾ ಸೇವೆಗಳನ್ನು ಸರಬರಾಜು ಮಾಡದೆಯೇ 70.25 ಕೋಟಿ ರೂಪಾಯಿಗಳ ತೆರಿಗೆ ಕ್ರೆಡಿಟ್‌ಗಳನ್ನು ಪಡೆಯಲು ಈ ಸಂಸ್ಥೆಗಳನ್ನು ರಚಿಸಿರುವುದಾಗಿ ಗಡ ಒಪ್ಪಿಕೊಂಡಿದ್ದಾರೆ.

ಹಿರೇನ್ ಗಡ ಅವರ ವಿರುದ್ಧ ಸಿಜಿಎಸ್‌ಟಿ ಕಾಯ್ದೆಯ ಸಂಬಂಧಿತ ಸೆಕ್ಷನ್‌ಗಳನ್ನು ದಾಖಲಿಸಲಾಗಿದೆ.

ಅವರನ್ನು ಗುರುವಾರ ಮುಂಬೈ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿತು, ಅಲ್ಲಿ ಅವರ ವಕೀಲರು ಜಿಎಸ್‌ಟಿ ಅಧಿಕಾರಿಗಳು ಅವರನ್ನು “ಕಾನೂನುಬಾಹಿರವಾಗಿ” ಇಪ್ಪತ್ತನಾಲ್ಕು ಗಂಟೆಗಳ ಕಾಲ ಬಂಧಿಸಿದ್ದಾರೆ ಎಂದು ಹೇಳಿದರು.

ಆದಾಗ್ಯೂ, ಜಿಎಸ್‌ಟಿ ಅಧಿಕಾರಿಗಳು, ಗಡ ಅವರನ್ನು ಬುಧವಾರ ಪ್ರಶ್ನಿಸಲಾಯಿತು ಮತ್ತು ಅದೇ ದಿನ ಬಂಧಿಸಲಾಯಿತು, ನಂತರ ಮರುದಿನ ನ್ಯಾಯಾಲಯಕ್ಕೆ ಕರೆದೊಯ್ಯಲಾಯಿತು ಎಂದರು. ಎರಡೂ ಕಡೆಯ ವಾದಗಳನ್ನು ಆಲಿಸಿದ ನಂತರ, ನ್ಯಾಯಾಲಯವು ಶಿಮಾರೂ ಮುಖ್ಯಸ್ಥನನ್ನು ನ್ಯಾಯಾಂಗ ಬಂದನಕ್ಕೆ ನೀಡದೆ ಬಿಡುಗಡೆ ಮಾಡಿ ಕಳುಹಿಸಿತು.