NCERT ಪಠ್ಯಪುಸ್ತಕ ವಿವಾದ: ತಜ್ಞರ ಸಮಿತಿ ಪರಿಶೀಲನೆ ಇಲ್ಲದೆ ಪಠ್ಯ ಪ್ರಕಟಿಸಬೇಡಿ – ಸುಪ್ರೀಂ ಕೋರ್ಟ್ ಆದೇಶ

ಎನ್‌ಸಿಇಆರ್‌ಟಿ (NCERT) ಪಠ್ಯಪುಸ್ತಕಗಳಲ್ಲಿನ ವಿವಾದಾತ್ಮಕ ಅಂಶಗಳ ಕುರಿತು ಸುಪ್ರೀಂ ಕೋರ್ಟ್ ಬುಧವಾರ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ. ಎಂಟನೇ ತರಗತಿಯ ಸಮಾಜ ವಿಜ್ಞಾನ ಪಠ್ಯಪುಸ್ತಕದಲ್ಲಿ ‘ನ್ಯಾಯಾಂಗದಲ್ಲಿ ಭ್ರಷ್ಟಾಚಾರ’ ಎಂಬ ಶೀರ್ಷಿಕೆಯಡಿ ಅಧ್ಯಾಯವೊಂದನ್ನು ಮುದ್ರಿಸಿರುವುದನ್ನು ಪ್ರಶ್ನಿಸಿ ನ್ಯಾಯಾಲಯವು ಸ್ವಯಂಪ್ರೇರಿತ (Suo Motu) ವಿಚಾರಣೆ ನಡೆಸಿತು. ಈ ಕುರಿತು ಕೇಂದ್ರ ಸರ್ಕಾರ ಮತ್ತು ಎನ್‌ಸಿಇಆರ್‌ಟಿ ನೀಡಿದ ವಿವರಣೆಯು ನ್ಯಾಯಪೀಠಕ್ಕೆ ತೃಪ್ತಿ ತಂದಿಲ್ಲ.

ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರ ನೇತೃತ್ವದ ಧರ್ಮಾಸನವು, ಕೇವಲ ಎಂಟನೇ ತರಗತಿಯಲ್ಲದೆ ಎಲ್ಲಾ ತರಗತಿಗಳ ಪಠ್ಯಪುಸ್ತಕಗಳನ್ನು ಸಮಗ್ರವಾಗಿ ಪರಿಶೀಲಿಸಬೇಕೆಂದು ಸೂಚಿಸಿದೆ. ಪಠ್ಯಪುಸ್ತಕಗಳನ್ನು ಪರಿಶೀಲಿಸಲು ಸರ್ಕಾರವು ತಜ್ಞರ ಸಮಿತಿಯನ್ನು ರಚಿಸಬೇಕಿತ್ತು ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ. ಎನ್‌ಸಿಇಆರ್‌ಟಿಗೆ ಕೇವಲ ಸೂಚನೆ ನೀಡುವುದರ ಬದಲು, ವಿಷಯದ ಆಳವನ್ನು ಅರಿತು ಸಮಿತಿ ರಚಿಸುವುದು ಅಗತ್ಯವಾಗಿತ್ತು ಎಂದು ಕೇಂದ್ರ ಸರ್ಕಾರಕ್ಕೆ ಛೀಮಾರಿ ಹಾಕಿತು.

ಪಠ್ಯದಲ್ಲಿನ ವಿವಾದಾತ್ಮಕ ಅಧ್ಯಾಯವನ್ನು ತಿದ್ದಿ ಬರೆಯಲಾಗಿದೆ ಎಂಬ ಎನ್‌ಸಿಇಆರ್‌ಟಿ ಅಫಿಡವಿಟ್‌ಗೆ ಪ್ರತಿಕ್ರಿಯಿಸಿದ ನ್ಯಾಯಾಲಯ, “ಈ ಅಧ್ಯಾಯವನ್ನು ಬರೆದವರು ಯಾರು? ಆ ತಜ್ಞರು ಯಾರು?” ಎಂದು ಪ್ರಶ್ನಿಸಿತು. ನ್ಯಾಯಾಲಯವು ಇಷ್ಟೊಂದು ಕಳವಳ ವ್ಯಕ್ತಪಡಿಸಿದ ನಂತರವೂ ಎನ್‌ಸಿಇಆರ್‌ಟಿ ನಿರ್ದೇಶಕರು ಇಷ್ಟು ಸಂಕ್ಷಿಪ್ತ ಹೇಳಿಕೆಯೊಂದಿಗೆ ನ್ಯಾಯಾಲಯಕ್ಕೆ ಬಂದಿರುವುದು ಸರಿಯಾದ ಕ್ರಮವಲ್ಲ ಎಂದು ನ್ಯಾಯಮೂರ್ತಿ ಜೋಮಾಲ್ಯ ಬಾಗ್ಚಿ ಅಸಮಾಧಾನ ವ್ಯಕ್ತಪಡಿಸಿದರು.

ತಜ್ಞರ ಸಮಿತಿಯು ಅಧಿಕೃತವಾಗಿ ಪರಿಶೀಲಿಸಿ ಅನುಮೋದಿಸುವವರೆಗೆ ಯಾವುದೇ ಅಧ್ಯಾಯಗಳನ್ನು ಅಥವಾ ಸರಿಪಡಿಸಿದ ಪಠ್ಯಗಳನ್ನು ಪ್ರಕಟಿಸಬಾರದು ಎಂದು ಸುಪ್ರೀಂ ಕೋರ್ಟ್ ಕಟ್ಟುನಿಟ್ಟಿನ ಆದೇಶ ನೀಡಿದೆ. ಈ ಸಮಿತಿಯಲ್ಲಿ ಮಾಜಿ ಹಿರಿಯ ನ್ಯಾಯಾಧೀಶರು, ಪ್ರಖ್ಯಾತ ಶಿಕ್ಷಣ ತಜ್ಞರು ಮತ್ತು ಕಾನೂನು ತಜ್ಞರು ಇರಬೇಕು ಎಂದು ಕೋರ್ಟ್ ನಿರ್ದೇಶಿಸಿದೆ. ಈ ಸಮಿತಿಯ ವರದಿಯ ಆಧಾರದ ಮೇಲೆಯೇ ಮುಂದಿನ ಪ್ರಕಟಣೆಗಳು ನಡೆಯಬೇಕು ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಪಠ್ಯಪುಸ್ತಕಗಳಲ್ಲಿ ವ್ಯವಸ್ಥೆಯ ಬಗ್ಗೆ ಅಥವಾ ನ್ಯಾಯಾಂಗದ ಬಗ್ಗೆ ಆಧಾರರಹಿತ ಅಥವಾ ಹಾನಿಕಾರಕ ಅಂಶಗಳನ್ನು ಸೇರಿಸುವುದು ವಿದ್ಯಾರ್ಥಿಗಳ ಮನಸ್ಸಿನ ಮೇಲೆ ತಪ್ಪು ಪ್ರಭಾವ ಬೀರುತ್ತದೆ ಎಂದು ನ್ಯಾಯಾಲಯ ಈ ಸಂದರ್ಭದಲ್ಲಿ ಎಚ್ಚರಿಸಿದೆ. ಆದ್ದರಿಂದ ಪಠ್ಯ ರಚನೆಯಲ್ಲಿ ಪಾರದರ್ಶಕತೆ ಮತ್ತು ತಜ್ಞರ ಅಭಿಪ್ರಾಯಕ್ಕೆ ಹೆಚ್ಚಿನ ಮಹತ್ವ ನೀಡಬೇಕೆಂದು ನ್ಯಾಯಪೀಠ ಆದೇಶಿಸಿದೆ.