ರಾಮಮಂದಿರ ದೇಣಿಗೆ ಹಗರಣ ಕುರಿತು ಪ್ರಧಾನಿ ಮೋದಿ ಮೌನವೇಕೆ? ಸ್ವಪಕ್ಷೀಯರನ್ನು ರಕ್ಷಿಸಲು ಎಫ್‌ಐಆರ್ ಇಲ್ಲದ ತನಿಖೆಯೇ?

ಅಯೋಧ್ಯೆ: “ನಾನು ಭ್ರಷ್ಟಾಚಾರ ಮಾಡುವುದಿಲ್ಲ, ಇತರರಿಗೂ ಮಾಡಲು ಬಿಡುವುದಿಲ್ಲ” ಎಂದು ಸಾರ್ವಜನಿಕ ಸಭೆಗಳಲ್ಲಿ ಪದೇ ಪದೇ ಹೇಳುವ ಪ್ರಧಾನಿ ನರೇಂದ್ರ ಮೋದಿ ಅವರು, ತಾವೇ ಪರಮ ಭಕ್ತರೆಂದು ಹೇಳಿಕೊಳ್ಳುವವರೇ ಕೋಟ್ಯಂತರ ರೂಪಾಯಿ ದೇವರ ಹಣವನ್ನು ಲೂಟಿ ಮಾಡುತ್ತಿದ್ದರೂ ಏಕೆ ಮೌನವಾಗಿದ್ದಾರೆ ಎಂದು ‘ದಿ ವೈರ್’ (The Wire) ಸುದ್ದಿ ಜಾಲತಾಣವು ತನ್ನ ವಿಶೇಷ ವರದಿಯಲ್ಲಿ ಪ್ರಶ್ನಿಸಿದೆ.

ಅಯೋಧ್ಯೆಯ ರಾಮಮಂದಿರದ ದೇಣಿಗೆ ದುರುಪಯೋಗದ ಹಗರಣದ ಮೊತ್ತವು ಲಕ್ಷಾಂತರ ರೂಪಾಯಿಗಳಿಂದ ಹಿಡಿದು ಬರೋಬ್ಬರಿ 1,400 ಕೋಟಿ ರೂಪಾಯಿಗಳವರೆಗೂ ಇರಬಹುದು ಎಂದು ವರದಿ ಅಂದಾಜಿಸಿದೆ. ಯಾವುದೇ ಪಾಪದ ಭೀತಿಯಿಲ್ಲದೆ ಭಕ್ತರ ಕಾಣಿಕೆ ಹಣವನ್ನು ಕಬಳಿಸಿದ್ದರೂ ಪ್ರಧಾನಿ ಮೋದಿ ಅವರು ಮೌನ ಮುರಿಯದಿರುವುದು ಆಶ್ಚರ್ಯ ತಂದಿದೆ ಎಂದು ಲೇಖನದಲ್ಲಿ ಉಲ್ಲೇಖಿಸಲಾಗಿದೆ. ಈ ಹಗರಣದ ಕುರಿತು ಇದುವರೆಗೆ ಒಂದೂ ಅಧಿಕೃತ ಎಫ್‌ಐಆರ್ (FIR) ದಾಖಲಿಸದೆ, ಕಳೆದ 12 ದಿನಗಳಿಂದ ವಿಶೇಷ ತನಿಖಾ ತಂಡದಿಂದ (SIT) ತನಿಖೆ ನಡೆಸುತ್ತಿರುವುದನ್ನು ಹಿರಿಯ ಪತ್ರಕರ್ತ ಪಿ. ರಾಮನ್ ಅವರು ಆಕ್ಷೇಪಿಸಿದ್ದಾರೆ.

ಈ ಇಡೀ ವಿಳಂಬ ನೀತಿಯು ಹಗರಣದ ಹಿಂದೆ ಇರುವ ಸ್ವಪಕ್ಷೀಯರನ್ನು ರಕ್ಷಿಸುವ ಸ್ಪಷ್ಟ ಪ್ರಯತ್ನವಾಗಿದೆ ಎಂದು ಅವರು ವಿಶ್ಲೇಷಿಸಿದ್ದಾರೆ. ಅಯೋಧ್ಯೆ ಮಂದಿರದ ಯೋಜನೆಯು ಆರಂಭದಿಂದಲೂ ಶಂಕಾಸ್ಪದ ಭೂ ವಹಿವಾಟುಗಳು ಸೇರಿದಂತೆ ಹಲವಾರು ಅಕ್ರಮ ಹಾಗೂ ವಂಚನೆಗಳ ನಿಲಯವಾಗಿ ಮಾರ್ಪಟ್ಟಿದ್ದು, ಇಂತಹ ಆರು ದೊಡ್ಡ ವಿವಾದಗಳ ಸ್ವರೂಪವನ್ನು ಈ ಹಿಂದೆಯೇ ಬಹಿರಂಗಪಡಿಸಿದ್ದಾಗಿ ‘ದಿ ವೈರ್’ ನೆನಪಿಸಿದೆ.

ಮಂದಿರದ ಕಾಣಿಕೆ ಎಣಿಕೆಯಲ್ಲಿ ನಡೆದಿರುವ ಅಕ್ರಮಗಳ ಕುರಿತು ಸಿಟ್ (SIT) ಈಗಾಗಲೇ ತನ್ನ ಪ್ರಾಥಮಿಕ ವರದಿಯನ್ನು ಸಿದ್ಧಪಡಿಸಿದ್ದು, ಹುಂಡಿಗಳ ಉಸ್ತುವಾರಿಯಲ್ಲಿ ಭಾರಿ ಲೋಪಗಳು ನಡೆದಿರುವುದನ್ನು ಪತ್ತೆಹಚ್ಚಿದೆ. ಮುಖ್ಯವಾಗಿ ಪ್ರಮುಖ ವಿಭಾಗಗಳಲ್ಲಿ ‘ಪ್ರಾಮಾಣಿಕ ಕಾರ್ಯನಿರ್ವಹಣಾ ವಿಧಾನ’ಗಳನ್ನು (SOPs) ಸಂಪೂರ್ಣವಾಗಿ ಗಾಳಿಗೆ ತೂರಲಾಗಿದೆ. ನಗದು ಎಣಿಕೆ ಮಾಡುವ ಸಮಯದಲ್ಲಿ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸದಿರುವುದು, ಎಣಿಕೆ ಕೊಠಡಿಯ ಒಳಗೆ ಮತ್ತು ಹೊರಗೆ ಹೋಗುವ ಸಿಬ್ಬಂದಿಯ ಮೈದಡವಿ ತಪಾಸಣೆ ನಡೆಸದಿರುವುದು ಹಾಗೂ ಕಾಣಿಕೆ ಎಣಿಕೆಯ ಸಿಸಿಟಿವಿ (CCTV) ದೃಶ್ಯಾವಳಿಗಳನ್ನು ನಿಯಮಾನುಸಾರ 180 ದಿನಗಳವರೆಗೆ ಸುರಕ್ಷಿತವಾಗಿಡದೆ ಉಲ್ಲಂಘಿಸಿರುವುದು ವರದಿಯಲ್ಲಿ ಬಹಿರಂಗವಾಗಿದೆ. ಎಲ್ಲಕ್ಕಿಂತ ಮಿಗಿಲಾಗಿ, ಶ್ರೀ ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಚಂಪತ್ ರಾಯ್ ಅವರ ಮಾಜಿ ಚಾಲಕ ರಾಮಶಂಕರ್ ಯಾದವ್ ಅಲಿಯಾಸ್ ಟಿನ್ನು ಯಾದವ್ ಬಳಿ ಮಂದಿರದ ಪ್ರಮುಖ ಹುಂಡಿಗಳ ಬೀಗದ ಕೀಲಿಗಳು ಇದ್ದದ್ದನ್ನು ತನಿಖಾ ತಂಡವು ತೀವ್ರವಾಗಿ ಪ್ರಶ್ನಿಸಿದೆ.

ದೇಣಿಗೆ ಅಕ್ರಮದ ಆರೋಪಗಳು ತೀವ್ರಗೊಂಡ ಹಿನ್ನೆಲೆಯಲ್ಲಿ ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಚಂಪತ್ ರಾಯ್ ಮತ್ತು ಟ್ರಸ್ಟಿ ಅನಿಲ್ ಮಿಶ್ರಾ ಅವರು ತಮ್ಮ ಹುದ್ದೆಗಳಿಗೆ ನೀಡಿರುವ ರಾಜೀನಾಮೆ ಪತ್ರಗಳು ತಮಗೆ ತಲುಪಿರುವುದನ್ನು ರಾಮಮಂದಿರ ಟ್ರಸ್ಟ್ ಶನಿವಾರ ಅಧಿಕೃತವಾಗಿ ಧೃಡಪಡಿಸಿದೆ. ಈ ಹಗರಣದ ಕುರಿತು ನಿಷ್ಪಕ್ಷಪಾತ ತನಿಖೆ ನಡೆದು, ಭಕ್ತರಲ್ಲಿ ಮಂದಿರದ ಮೇಲಿರುವ ವಿಶ್ವಾಸ ಮರುಕಳಿಸಬೇಕಿದೆ ಎಂದು ಟ್ರಸ್ಟ್ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

ಪ್ರಕರಣದಲ್ಲಿ ಈಗಾಗಲೇ ಬಂಧನಕ್ಕೊಳಗಾಗಿರುವ ಟಿನ್ನು ಯಾದವ್ ವಿರುದ್ಧ ರೋಕಡಿಯಾ ಹನುಮಾನ್ ಮಂದಿರದ ಮುಖ್ಯಸ್ಥ ಆಚಾರ್ಯ ವಿನೋದ್ ಮಿಶ್ರಾ ಅವರು ಮತ್ತೊಂದು ಗಂಭೀರ ಆರೋಪ ಮಾಡಿದ್ದಾರೆ. ಜಾನ್‌ಪುರದ ಉದ್ಯಮಿಯೊಬ್ಬರು ಮಂದಿರದ ಉದ್ಘಾಟನೆಯ ಸವಿನೆನಪಿನಲ್ಲಿ ಶ್ರೀರಾಮನಿಗೆ ಅತ್ಯಂತ ಅಮೂಲ್ಯವಾದ ಚಿನ್ನದ ನೆಕ್ಲೆಸ್ ಮತ್ತು ಚರಣ ಪಾದುಕೆಗಳನ್ನು ಕಾಣಿಕೆಯಾಗಿ ನೀಡಿದ್ದರು. ಇದನ್ನು ಸ್ವೀಕರಿಸಿದ್ದ ಟಿನ್ನು ಯಾದವ್, ಅದಕ್ಕೆ ಸಂಬಂಧಿಸಿದ ಅಧಿಕೃತ ರಶೀದಿ ಮತ್ತು ದೇವರ ಅಲಂಕಾರದ ಫೋಟೋವನ್ನು ಕಳುಹಿಸಿಕೊಡುವುದಾಗಿ ಭರವಸೆ ನೀಡಿದ್ದನು. ಆದರೆ ಘಟನೆ ನಡೆದು 8 ತಿಂಗಳು ಕಳೆದರೂ ಆತ ಯಾವುದೇ ರಶೀದಿಯಾಗಲಿ ಅಥವಾ ಫೋಟೋವನ್ನಾಗಲಿ ನೀಡಿಲ್ಲ ಎಂದು ಅವರು ದೂರಿದ್ದಾರೆ.