ಮಹಾರಾಷ್ಟ್ರ ಪವಾರ್‌ ಪಾಲಿಟಿಕ್ಸ್: ಮತ್ತೆ ಒಂದಾಗಲಿದ್ದಾರೆಯೇ ಚಿಕ್ಕಪ್ಪ ಮಗ?‌

ಮುಂಬೈ; ಮಹಾರಾಷ್ಟ್ರದ ಉಪ ಮುಖ್ಯಮಂತ್ರಿ ಅಜಿತ್ ಪವಾರ್ ಮತ್ತು ಅವರ ಬಣದ ಎನ್‌ಸಿಪಿ ಶಾಸಕರು ಮುಂಬೈಯ ವೈಬಿ ಚವಾಣ್ ಸೆಂಟರ್‌ಗೆ ಆಗಮಿಸಿ ಪಕ್ಷದ ಅಧ್ಯಕ್ಷ ಶರದ್ ಪವಾರ್ ಅವರನ್ನು ಸತತ ಎರಡನೇ ದಿನ ಭೇಟಿಯಾಗಿದ್ದಾರೆ. ಪವಾರ್ ಕೂಡ ವೈಬಿ ಚವಾಣ್ ಕೇಂದ್ರದಲ್ಲಿದ್ದು ಅವರನ್ನು ಭೇಟಿಯಾಗಿದ್ದಾರೆ. ಇದರಿಂದಾಗಿ ಚಿಕ್ಕಪ್ಪ-ಮಗನ ನಡುವೆ ರಾಜಿಯ ಭರವಸೆ ಹೆಚ್ಚಿದೆ.

ಇದಕ್ಕೂ ಮೊದಲು, ಅಜಿತ್ ಪವಾರ್ ಅವರು ಪ್ರಫುಲ್ ಪಟೇಲ್, ಛಗನ್ ಭುಜಬಲ್, ಅದಿತಿ ತತ್ಕರೆ ಮತ್ತು ಹಸನ್ ಮಶ್ರಿಫ್ ಅವರೊಂದಿಗೆ ಭಾನುವಾರವೂ ಪವಾರ್ ಅವರನ್ನು ಭೇಟಿ ಮಾಡಲು ವೈಬಿ ಚವಾಣ್ ಸೆಂಟರ್ ಗೆ ಬಂದಿದ್ದರು. ಈ ವೇಳೆ ಶರದ್ ಪವಾರ್ ಬಣದ ಜಯಂತ್ ಪಾಟೀಲ್ ಮತ್ತು ಜಿತೇಂದ್ರ ಅವ್ಹಾದ್ ಕೂಡ ಉಪಸ್ಥಿತರಿದ್ದರು.

ಮಹಾರಾಷ್ಟ್ರ ವಿಧಾನಸಭೆಯ ಮುಂಗಾರು ಅಧಿವೇಶನದ ಮೊದಲ ದಿನವಾದ ಸೋಮವಾರ 53 ಎನ್‌ಸಿಪಿ ಶಾಸಕರ ಪೈಕಿ 27 ಶಾಸಕರು ಗೈರಾಗಿದ್ದರು. ಎನ್‌ಸಿಪಿ ಶಾಸಕ ನವಾಬ್ ಮಲಿಕ್, ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಪ್ರಸ್ತುತ ನ್ಯಾಯಾಂಗ ಬಂಧನದಲ್ಲಿದ್ದಾರೆ.

ಅಜಿತ್ ಪವಾರ್ ಸೇರಿದಂತೆ 24 ಶಾಸಕರು ಅಧಿವೇಶನದಲ್ಲಿ ಪಾಲ್ಗೊಂಡಿದ್ದರು
ಅಧಿವೇಶನದಲ್ಲಿ ಭಾಗವಹಿಸಿದ್ದ 24 ಎನ್‌ಸಿಪಿ ಶಾಸಕರ ಪೈಕಿ ಉಪಮುಖ್ಯಮಂತ್ರಿ ಅಜಿತ್ ಪವಾರ್, ಕ್ಯಾಬಿನೆಟ್ ಸಚಿವರಾದ ಛಗನ್ ಭುಜಬಲ್, ದಿಲೀಪ್ ವಾಲ್ಸೆ ಪಾಟೀಲ್, ಹಸನ್ ಮುಶ್ರೀಫ್, ಅದಿತಿ ತತ್ಕರೆ, ಸಂಜಯ್ ಬನ್ಸೋಡೆ, ಧನಂಜಯ್ ಮುಂಡೆ, ಅನಿಲ್ ಪಾಟೀಲ್ ಮತ್ತು ಧರ್ಮರಾವ್ ಅತ್ರಮ್ ಆಡಳಿತ ಪಕ್ಷದಲ್ಲಿ ಕುಳಿತಿದ್ದರು. ಅಜಿತ್ ಪವಾರ್ ಅವರಿಗೆ ಬೆಂಬಲ ನೀಡಿದ ಮತ್ತು ಸದನದಲ್ಲಿ ಉಪಸ್ಥಿತರಿರುವ ಇತರ ಶಾಸಕರೆಂದರೆ ಬಬನರಾವ್ ಶಿಂಧೆ, ಇಂದ್ರನೀಲ್ ನಾಯಕ್, ಪ್ರಕಾಶ್ ಸೋಲಂಖೆ, ಕಿರಣ್ ಲಹ್ಮತೆ, ಸುನೀಲ್ ಶೆಲ್ಕೆ ಮತ್ತು ಸರೋಜ್ ಅಹಿರೆ.

ವಿರೋಧ ಪಕ್ಷದ ಜಾಗದಲ್ಲಿ ಎನ್‌ಸಿಪಿ ರಾಜ್ಯಾಧ್ಯಕ್ಷ ಜಯಂತ್ ಪಾಟೀಲ್ (ಶರದ್ ಪವಾರ್ ಪಾಳಯದಿಂದ), ಶಾಸಕರಾದ ಬಾಳಾಸಾಹೇಬ್ ಪಾಟೀಲ್, ಪ್ರಜಕ್ತ್ ತನ್‌ಪುರೆ, ಸುನೀಲ್ ಭೂಸಾರ, ಮಾನಸಿಂಗ್ ಪವಾರ್, ಸುಮನ್ ಪಾಟೀಲ್, ರೋಹಿತ್ ಪವಾರ್, ರಾಜೇಶ್ ಟೋಪೆ, ಅಶೋಕ್ ಪವಾರ್ ಮತ್ತು ಅನಿಲ್ ದೇಶಮುಖ ಕುಳಿತಿದ್ದರು.

ಎನ್‌ಸಿಪಿಯ (ಶರದ್ ಪವಾರ್ ಪಾಳಯ) ಮುಖ್ಯ ಸಚೇತಕ ಜಿತೇಂದ್ರ ಅವ್ಹಾದ್ ಅವರು ಭಾನುವಾರ ಸ್ಪೀಕರ್ ರಾಹುಲ್ ನಾರ್ವೇಕರ್ ಅವರಿಗೆ ಪತ್ರ ಬರೆದು, ಅಜಿತ್ ಪವಾರ್ ಪಾಳೆಯದ ಸದಸ್ಯರು ಮತ್ತು ಪಕ್ಷದ ಉಳಿದ ಶಾಸಕರಿಗೆ ಅಧಿವೇಶನಕ್ಕೆ ಪ್ರತ್ಯೇಕ ಆಸನ ವ್ಯವಸ್ಥೆಗಳನ್ನು ಕೋರಿದ್ದಾರೆ. ಸರ್ಕಾರಕ್ಕೆ ಸೇರ್ಪಡೆಗೊಂಡಿರುವ ಅಜಿತ್ ಪವಾರ್ ಸೇರಿದಂತೆ ಒಂಬತ್ತು ಶಾಸಕರನ್ನು ಹೊರತುಪಡಿಸಿ ಎನ್‌ಸಿಪಿ ವಿರೋಧ ಪಕ್ಷದ ಭಾಗವಾಗಿದೆ ಎಂದು ಅವ್ಹಾದ್ ಪತ್ರದಲ್ಲಿ ಹೇಳಿದ್ದಾರೆ.

ಎನ್‌ಸಿಪಿಯ ವಿಷಯದಲ್ಲಿ ಯಾರು ಅಧಿಕಾರದಲ್ಲಿದ್ದಾರೆ ಮತ್ತು ಯಾರು ಇಲ್ಲ ‌ಎನ್ನುವುದಕ್ಕೆ ಸ್ಪಷ್ಟವಾದ ವ್ಯತ್ಯಾಸವಿಲ್ಲ ಎಂದು ನಾರ್ವೇಕರ್ ಇತ್ತೀಚೆಗೆ ಹೇಳಿದ್ದರು. “ನಿಜವಾದ ಎನ್‌ಸಿಪಿಯನ್ನು ಯಾರು ಪ್ರತಿನಿಧಿಸುತ್ತಾರೆ ಎಂಬುದನ್ನು ನಿರ್ಧರಿಸುವುದು ಹೇಗೆ ಎಂಬುದರ ಕುರಿತು ಸಾಕಷ್ಟು ವಿಚಾರ ಮತ್ತು ವಿಮರ್ಶೆಗಳು ನಡೆಯಲಿವೆ” ಎಂದು ಅವರು ಹೇಳಿದ್ದರು. ಜುಲೈ 2 ರಂದು ಅಜಿತ್ ಪವಾರ್ ಅವರು ಎಂಟು ಇತರರೊಂದಿಗೆ ಏಕನಾಥ್ ಶಿಂಧೆ-ಬಿಜೆಪಿ ಸರ್ಕಾರದಲ್ಲಿ ಉಪ ಮುಖ್ಯಮಂತ್ರಿಯಾಗಿ ಎನ್‌ಸಿಪಿ ಶಾಸಕರೊಂದಿಗೆ ಪ್ರಮಾಣವಚನ ಸ್ವೀಕರಿಸಿದ್ದರು.

ಇತ್ತ ಶರದ್‌ ಪವಾರ್‌ ನಾಳೆ ಬೆಂಗಳೂರಿನಲ್ಲಿ ನಡೆಯುತ್ತಿರುವ ಮಹಾಘಟಬಂಧನದ ಸಭೆಯಲ್ಲಿ ಭಾಗವಹಿಸಲಿದ್ದಾರೆ ಎಂದು ಅವರ ಪಕ್ಷದ ಮೂಲಗಳು ತಿಳಿಸಿದೆ. ಒಟ್ಟಾರೆ ಪಕ್ಷದೊಳಗೆ ಏನೋ ನಡೆಯುತ್ತಿದ್ದು ಈ ಮೇಲಿಂದ ಮೇಲಿನ ಭೇಟಿಗಳು ರಾಜಿಯ ಸಾಧ್ಯತೆಗಳನ್ನು ದಟ್ಟವಾಗಿಸಿವೆ.