ಆಂಧ್ರದಲ್ಲಿಂದು ವಿಶ್ವದ ಅತಿ ಎತ್ತರದ ಅಂಬೇಡ್ಕರ್ ಪ್ರತಿಮೆ ಉದ್ಘಾಟನೆ

ವಿಜಯವಾಡ : ಇದೇ ಶುಕ್ರವಾರ ಸಂಜೆ ವಿಜಯವಾಡ ನಗರದ ಹೃದಯಭಾಗದಲ್ಲಿರುವ ಡಾ.ಬಿ.ಆರ್.ಅಂಬೇಡ್ಕರ್ ಅವರ ಪ್ರತಿಮೆಯನ್ನು ಆಂಧ್ರ ಸಿಎಂ ವೈಎಸ್ ಜಗನ್ ಅನಾವರಣಗೊಳಿಸಲಿದ್ದಾರೆ. ಇದು ವಿಶ್ವದ ಅತಿ ಎತ್ತರದ ಅಂಬೇಡ್ಕರ್ ಪ್ರತಿಮೆ ಎಂದು ಆಂಧ್ರ ಸರ್ಕಾರ ಹೇಳಿದೆ. ಅಂಬೇಡ್ಕರ್ ಪ್ರತಿಮೆಯ ಎತ್ತರ 125 ಅಡಿ ಮತ್ತು ಪೀಠದ (ಪ್ರತಿಮೆಯ ತಳ) ಎತ್ತರ 85 ಅಡಿ. ಇವೆರಡನ್ನು ಸೇರಿಸಿದರೆ ಮೂರ್ತಿಯ ಒಟ್ಟು ಎತ್ತರ 210 ಅಡಿ. ಈ ಪ್ರತಿಮೆಗೆ ಸಾಮಾಜಿಕ ನ್ಯಾಯದ ಪ್ರತಿಮೆ ಎಂದು ಹೆಸರಿಡಲಾಗಿದೆ.

ಅಂಬೇಡ್ಕರ್ ಪ್ರತಿಮೆ ಜತೆಗೆ ಸ್ವರಾಜ್ ಮೈದಾನದಲ್ಲಿ ಸುಮಾರು 19 ಎಕರೆ ಪ್ರದೇಶದಲ್ಲಿ ಸ್ಮಾರಕವನ್ನೂ ನಿರ್ಮಿಸಲಾಗಿದೆ. ಸ್ಮಾರಕದಲ್ಲಿ ಅಂಬೇಡ್ಕರ್ ಅವರ ಜೀವನ ವೈಶಿಷ್ಟ್ಯಗಳು ಮತ್ತು ಶಿಲ್ಪಗಳ ಜೊತೆಗೆ ಅವರ ಫೋಟೋ ಗ್ಯಾಲರಿಯನ್ನು ಸ್ಥಾಪಿಸಲಾಗಿದೆ. ಇದು ಕನ್ವೆನ್ಷನ್ ಹಾಲ್ ಮತ್ತು ಫುಡ್ ಕೋರ್ಟ್ ಅನ್ನು ಸಹ ಒಳಗೊಂಡಿದೆ. ಇದು ಅತಿದೊಡ್ಡ ಪ್ರವಾಸಿ ತಾಣವಾಗಲಿದೆ ಎಂದು ಸರ್ಕಾರ ಅಭಿಪ್ರಾಯ ಪಟ್ಟಿದೆ ಎನ್ನಲಾಗುತ್ತಿದೆ.

ಪ್ರತಿಮೆಯ ತಳದ ಕೆಳಗೆ ಮೂರು ಅಂತಸ್ತುಗಳಿವೆ. ನೆಲಮಹಡಿಯಲ್ಲಿ ನಾಲ್ಕು ಸಭಾಂಗಣಗಳನ್ನು ವ್ಯವಸ್ಥೆಗೊಳಿಸಲಾಗಿದ್ದು, ಪ್ರತಿಯೊಂದೂ 4 ಸಾವಿರ ಚದರ ಅಡಿ ವಿಸ್ತೀರ್ಣವನ್ನು ಹೊಂದಿದೆ. ಈ ನಾಲ್ಕರಲ್ಲಿ ಒಂದು ಸಿನಿಮಾ ಹಾಲ್, ಉಳಿದ ಮೂರರಲ್ಲಿ ಅಂಬೇಡ್ಕರ್ ಇತಿಹಾಸ ಹೇಳುವ ಡಿಜಿಟಲ್ ಮ್ಯೂಸಿಯಂ ಇದೆ. ಮೊದಲ ಮಹಡಿಯಲ್ಲಿ ನಾಲ್ಕು ಸಭಾಂಗಣಗಳು ಮತ್ತು ಎರಡನೇ ಮಹಡಿಯಲ್ಲಿ ನಾಲ್ಕು ಸಭಾಂಗಣಗಳು ಇರುತ್ತವೆ. ಈ ಪ್ರತಿಮೆಯ ತಯಾರಿ ಮತ್ತು ಸ್ಮಾರಕ ಸ್ಥಾಪನೆಗೆ ಸುಮಾರು 400 ಕೋಟಿ ರೂ ವೆಚ್ಚ ಮಾಡಿರುವುದಾಗಿ ಆಂದ್ರ ಪ್ರದೇಶ ಸರ್ಕಾರ ತಿಳಿಸಿದೆ.

ಕಳೆದ ವರ್ಷ ಏಪ್ರಿಲ್ ನಲ್ಲಿ ಅಂದಿನ ಸಿಎಂ ಕೆಸಿಆರ್ ಅವರು ಹೈದರಾಬಾದ್ ನಲ್ಲಿ ಅಂಬೇಡ್ಕರ್ ಪ್ರತಿಮೆ ಅನಾವರಣಗೊಳಿಸಿದ್ದರು. 125 ಅಡಿ ಎತ್ತರದ ಈ ಪ್ರತಿಮೆಗೆ ತೆಲಂಗಾಣ ಸರ್ಕಾರ ರೂ.146 ಕೋಟಿ ವೆಚ್ಚ ಮಾಡಿತ್ತು. ಟ್ಯಾಂಕ್ ಬಂಡ್ ಮುಂಭಾಗದಲ್ಲಿರುವ ಅಂಬೇಡ್ಕರ್ ಪ್ರತಿಮೆಯ ಎತ್ತರ 125 ಅಡಿ. ನೆಲಮಾಳಿಗೆಯ ಎತ್ತರ 50 ಅಡಿ. ಎನ್‌ಟಿಆರ್‌ ಗಾರ್ಡನ್‌ ಪಕ್ಕದ 11.4 ಎಕರೆ ಪ್ರದೇಶದಲ್ಲಿ ಈ ಪ್ರತಿಮೆಯನ್ನು ಸ್ಥಾಪಿಸಲಾಗಿದೆ. ಈ ಪ್ರತಿಮೆಯ ನೆಲಮಾಳಿಗೆಯಲ್ಲಿ ವಸ್ತುಸಂಗ್ರಹಾಲಯ, ಗ್ರಂಥಾಲಯ ಮತ್ತು ಸಮ್ಮೇಳನ ಸಭಾಂಗಣವನ್ನು ಒಳಗೊಂಡಿದೆ.