‘ಬಾಬ್ರಿ ಭಕ್ತರ ಬಗ್ಗೆ ಎಚ್ಚರವಿರಲಿ’: ಕಾಲನೇಮಿ ರಾಕ್ಷಸನನ್ನು ಪ್ರಸ್ತಾಪಿಸಿ ಎಚ್ಚರಿಕೆ ನೀಡಿದ ಯೋಗಿ ಆದಿತ್ಯನಾಥ್

ಲಖನೌ: ರಾಮಾಯಣದ ‘ಕಾಲನೇಮಿ’ ರಾಕ್ಷಸನ ಕಥೆಯನ್ನು ಉಲ್ಲೇಖಿಸಿರುವ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್, ರಾಮ ಮಂದಿರ ಚಳವಳಿಯ ಹಿತೈಷಿಗಳಿಗೆ ಮಹತ್ವದ ಎಚ್ಚರಿಕೆಯೊಂದನ್ನು ನೀಡಿದ್ದಾರೆ. ರಾಮ ಮಂದಿರ ಹೋರಾಟದ ಹಾದಿ ತಪ್ಪಿಸಲು ಯತ್ನಿಸುತ್ತಿರುವ ‘ಬಾಬ್ರಿ ಭಕ್ತ’ರ ಬಗ್ಗೆ ರಾಮಭಕ್ತರು (ಬಜರಂಗಿಗಳು) ಸದಾ ಜಾಗರೂಕರಾಗಿರಬೇಕು ಎಂದು ಅವರು ಕರೆ ನೀಡಿದ್ದಾರೆ.

ವಿಶ್ವ ಹಿಂದೂ ಪರಿಷತ್ (ವಿಹಿಂಪ) ಮಾಜಿ ನಾಯಕ ದಿವಂಗತ ಅಶೋಕ್ ಸಿಂಘಾಲ್ ಅವರ ಜನ್ಮ ಶತಮಾನೋತ್ಸವ ಅಂಗವಾಗಿ ಲಖನೌದಲ್ಲಿ ಭಾನುವಾರ ಆಯೋಜಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಯೋಗಿ ಆದಿತ್ಯನಾಥ್, ವಿರೋಧಿಗಳ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದರು.

ಕಾಲನೇಮಿಗೆ ಹೋಲಿಕೆ

ಲಕ್ಷ್ಮಣನ ಪ್ರಾಣ ಉಳಿಸಲು ಹಿಮಾಲಯದಿಂದ ಸಂಜೀವಿನಿ ಮೂಲಿಕೆ ತರಲು ಹೊರಟಿದ್ದ ಹನುಮಂತನನ್ನು ತಡೆಯಲು ರಾವಣನು ಕಾಲನೇಮಿ ಎಂಬ ರಾಕ್ಷಸನನ್ನು ಕಳುಹಿಸಿದ್ದ ರಾಮಾಯಣದ ಪ್ರಸಂಗವನ್ನು ಮುಖ್ಯಮಂತ್ರಿ ಸ್ಮರಿಸಿದರು. “ಹನುಮಂತನ ಭಕ್ತರು ಇಂದಿನ ಕಾಲನೇಮಿಗಳನ್ನು ಗುರುತಿಸಿ, ಅವರು ರಾಮ ಮಂದಿರ ಆಂದೋಲನಕ್ಕೆ ಕೆಟ್ಟ ಹೆಸರು ತರದಂತೆ ತಡೆಯಬೇಕು. ಈ ಹಿಂದೆ ರಾಮ ಮಂದಿರವನ್ನು ಕಟುವಾಗಿ ವಿರೋಧಿಸುತ್ತಿದ್ದವರು, ಇಂದು ರಾಮಭಕ್ತರಂತೆ ನಟಿಸುತ್ತಿದ್ದಾರೆ. ಇದು ವಿಹಿಂಪ ಸೈದ್ಧಾಂತಿಕ ಹೋರಾಟಕ್ಕೆ ಸಂದ ಜಯ,” ಎಂದು ಹೇಳಿದರು.

ಹಸುವನ್ನು ‘ಪ್ರಾಣಿ’ ಎನ್ನಬೇಡಿ

ಹಸುವನ್ನು ರಾಷ್ಟ್ರೀಯ ಪ್ರಾಣಿ ಎಂದು ಘೋಷಿಸುವಂತೆ ಕೋರಿ ಮನವಿ ಸಲ್ಲಿಸುತ್ತಿರುವ ಕೆಲ ಸಂಘಟನೆಗಳನ್ನು ಇದೇ ವೇಳೆ ಯೋಗಿ ಆದಿತ್ಯನಾಥ್ ಪರೋಕ್ಷವಾಗಿ ಟೀಕಿಸಿದರು. ಹಸುವನ್ನು ಕೇವಲ ಒಂದು ‘ಪ್ರಾಣಿ’ ಎಂದು ಕರೆಯುವುದನ್ನು ಆಕ್ಷೇಪಿಸಿದ ಅವರು, ಗೋ ಸಂರಕ್ಷಣೆ ಮತ್ತು ಗೋಪಾಲನೆಯಲ್ಲಿ ಭಕ್ತರು ತಮ್ಮನ್ನು ತಾವು ತೊಡಗಿಸಿಕೊಳ್ಳಬೇಕು ಎಂದರು.

ಕಾಂಗ್ರೆಸ್ ವಿರುದ್ಧ ಕಿಡಿಕಾರಿದ ಯೋಗಿ

ಶ್ರೀರಾಮ ಮತ್ತು ಶ್ರೀಕೃಷ್ಣ ಕೇವಲ ಕಾಲ್ಪನಿಕ, ಅವರು ಅಸ್ತಿತ್ವದಲ್ಲೇ ಇರಲಿಲ್ಲ ಎಂದು ಈ ಹಿಂದೆ ಸುಪ್ರೀಂ ಕೋರ್ಟ್‌ಗೆ ಅಫಿಡವಿಟ್ ಸಲ್ಲಿಸುವ ಮೂಲಕ ಕಾಂಗ್ರೆಸ್ ಪಕ್ಷವು ಹಿಂದೂ ನಂಬಿಕೆಗಳನ್ನು ಪದೇಪದೆ ಅವಮಾನಿಸಿದೆ ಎಂದು ಆರೋಪಿಸಿದರು. ಜೊತೆಗೆ, ಹಿಂದೆ ಮೂಲಭೂತ ಸೌಕರ್ಯಗಳ ಕೊರತೆಯಿಂದ ಕಂಗೆಟ್ಟಿದ್ದ ಅಯೋಧ್ಯೆ, ಇಂದು ಸರಯೂ ನದಿಯ ಪುನರುಜ್ಜೀವನ, ವಿಶಾಲ ರಸ್ತೆಗಳು ಹಾಗೂ ಮಹರ್ಷಿ ವಾಲ್ಮೀಕಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದೊಂದಿಗೆ ಜಾಗತಿಕ ಮಟ್ಟದ ನಗರವಾಗಿ ಬದಲಾಗಿದೆ ಎಂದು ಹರ್ಷ ವ್ಯಕ್ತಪಡಿಸಿದರು.

ಅಶೋಕ್ ಸಿಂಘಾಲ್ ಅವರ ನಾಯಕತ್ವ ಮತ್ತು 1990ರ ರಾಮಜನ್ಮಭೂಮಿ ಹೋರಾಟದ ತ್ಯಾಗಗಳನ್ನು ಸ್ಮರಿಸಿದ ಅವರು, ಸಿಂಘಾಲ್ ಜನ್ಮ ಶತಮಾನೋತ್ಸವವನ್ನು ವಿಹಿಂಪ ದೇಶ-ವಿದೇಶಗಳಲ್ಲಿ ವರ್ಷಪೂರ್ತಿ ಆಚರಿಸಲಿದೆ ಎಂದು ತಿಳಿಸಿದರು.