ಮಹಾರಾಷ್ಟ್ರ ಚುನಾವಣೆ: ಚಲಾವಣೆಯಾದ ಮತ ಮತ್ತು ಎಣಿಕೆಯಾದ ಮತಗಳ ಸಂ‍ಖ್ಯೆಯಲ್ಲಿ ವ್ಯತ್ಯಾಸ; ತನಿಖೆಗೆ ತಜ್ಞರ ಆಗ್ರಹ

ಚಲಾವಣೆಯಾದ ಮತಗಳಿಗಿಂತ ಎಣಿಕೆಯಾದ ಮತಗಳು ಮುಂಬೈ: ಮಹಾರಾಷ್ಟ್ರ ವಿಧಾನಸಭೆಗೆ ಇತ್ತೀಚೆಗೆ ನಡೆದ ಚುನಾವಣೆಗೆ ಸಂಬಂಧಿಸಿದಂತೆ ಕುತೂಹಲಕಾರಿ ಸಂಗತಿಯೊಂದು ಬೆಳಕಿಗೆ ಬಂದಿದೆ.

ಬಹುತೇಕ ಎಲ್ಲ ಕ್ಷೇತ್ರಗಳಲ್ಲಿ ಎಣಿಕೆ ಮತ್ತು ಚಲಾವಣೆಯಾದ ಮತಗಳ ನಡುವೆ ವ್ಯತ್ಯಾಸ ಕಂಡುಬಂದಿದೆ. ಚುನಾವಣಾ ಆಯೋಗ ನೀಡಿರುವ ಮಾಹಿತಿ ಪ್ರಕಾರ ಮಹಾರಾಷ್ಟ್ರ ಚುನಾವಣೆಯಲ್ಲಿ ಶೇ.66.05ರಷ್ಟು ಮತದಾನವಾಗಿದೆ. ಅಂದರೆ ಈ ಲೆಕ್ಕಾಚಾರದಲ್ಲಿ 6,40,88,195 ಮತಗಳು ಚಲಾವಣೆಯಾಗಿವೆ. ಇದರಲ್ಲಿ ಪುರುಷರು 3,06,49,318, ಮಹಿಳೆಯರು 3,34,37,057 ಹಾಗೂ ಇತರರು 1,820 ಮತಗಳನ್ನು ಚಲಾವಣೆ ಮಾಡಿದ್ದಾರೆ. ಆದರೆ ರಾಜ್ಯದ ಎಲ್ಲ ಕ್ಷೇತ್ರಗಳಲ್ಲಿ ಎಣಿಕೆಯಾದ ಒಟ್ಟು ಮತಗಳ ಸಂಖ್ಯೆ 6,45,92,508. ಅಂದರೆ ಚಲಾವಣೆಯಾದ ಮತಗಳ ಜೊತೆಗೆ 5,04,313 ಮತಗಳು ಎಣಿಕೆಯಾಗಿವೆ. ಇದು ಹೇಗೆ ಸಾಧ್ಯ?

ರಾಜ್ಯದ ಎಂಟು ಕ್ಷೇತ್ರಗಳಲ್ಲಿ ಚಲಾವಣೆಯಾದ ಮತಗಳಿಗಿಂತ ಕಡಿಮೆ ಮತ ಎಣಿಕೆಯಾಗಿದೆ. ಉಳಿದ 280 ಸ್ಥಾನಗಳಲ್ಲಿ ಎಣಿಕೆಯಾದ ಮತಗಳು ಚಲಾವಣೆಯಾದ ಮತಗಳಿಗೆ ಹೆಚ್ಚುವರಿಯಾಗಿವೆ. ಮೂಲ ಲೆಕ್ಕಾಚಾರದಲ್ಲಿ ದೊಡ್ಡ ವ್ಯತ್ಯಾಸವನ್ನು ಗಮನಿಸಲಾಗಿದೆ. ಚಲಾವಣೆಯಾದ ಮತಗಳಿಗಿಂತ 4,538 ಹೆಚ್ಚು ಮತಗಳು ಎಣಿಕೆಯಾಗಿವೆ. ಉಸ್ಮಾನಾಬಾದ್ ಕ್ಷೇತ್ರದಲ್ಲಿ 4,155 ಮತಗಳ ವ್ಯತ್ಯಾಸವಾಗಿದೆ.

ಲೋಕಸಭೆ ಚುನಾವಣೆ ಸಂದರ್ಭದಲ್ಲಿ

ಮೇ ತಿಂಗಳಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲೂ ಈ ವ್ಯತ್ಯಾಸಗಳು ಕಂಡುಬಂದವು. ಚಲಾವಣೆಯಾದ ಮತಗಳಿಗೂ ನಮೂನೆ 17ಸಿಯಲ್ಲಿನ ಮಾಹಿತಿಗೂ ವ್ಯತ್ಯಾಸವಿದೆ. ಪ್ರತಿ ಮತಗಟ್ಟೆಯಲ್ಲಿ ಚಲಾವಣೆಯಾದ ಮತಗಳ ಸಂಖ್ಯೆಯನ್ನು 17ಸಿ ದಾಖಲೆಯಲ್ಲಿ ನಮೂದಿಸಲಾಗಿರುತ್ತದೆ. ಲೋಕಸಭೆ ಚುನಾವಣೆ ಫಲಿತಾಂಶ ಪ್ರಕಟವಾದ ನಂತರ, ಅಸೋಸಿಯೇಷನ್ ​​ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ಎಡಿಆರ್) ಸುಪ್ರೀಂ ಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದು, ಪ್ರತಿ ಹಂತದಲ್ಲಿ ಮತದಾನ ಮುಗಿದ 48 ಗಂಟೆಗಳ ಒಳಗೆ ಮತದಾನ ಕೇಂದ್ರಗಳಿಂದ ಚಲಾವಣೆಯಾದ ಮತಗಳ ವಿವರಗಳನ್ನು ಬಿಡುಗಡೆ ಮಾಡುವಂತೆ ಸೂಚನೆ ನೀಡುವಂತೆ ಕೋರಿತ್ತು. ಪ್ರಾಥಮಿಕ ಮತ್ತು ಅಂತಿಮ ಮತದಾನದ ವಿವರಗಳ ನಡುವೆ ಶೇಕಡಾ 5-6ರಷ್ಟು ವ್ಯತ್ಯಾಸವಿದೆ ಎಂದು ಅದು ಹೇಳಿತ್ತು. ಆದರೆ, ಎಡಿಆರ್ ಕೋರಿಕೆಯನ್ನು ಸುಪ್ರೀಂ ಕೋರ್ಟ್ ಒಪ್ಪಿರಲಿಲ್ಲ.

ಹಾಗೆ ಮಾಡುವುದರಿಂದ ಪ್ರಾಯೋಗಿಕವಾಗಿ ಕೆಲವು ತೊಂದರೆಗಳು ಉಂಟಾಗುತ್ತವೆ ಎಂದು ಹೇಳಿತ್ತು. ನಮೂನೆ 17ಸಿಯಲ್ಲಿನ ಮಾಹಿತಿಯನ್ನು ಅಭ್ಯರ್ಥಿಗಳ ಏಜೆಂಟರಿಗೆ ಮಾತ್ರ ನೀಡಲಾಗುತ್ತದೆಯೇ ಹೊರತು ಸಾರ್ವಜನಿಕರಿಗೆ ಬಹಿರಂಗಪಡಿಸುವ ಅಗತ್ಯವಿಲ್ಲ ಎಂದು ಚುನಾವಣಾ ಆಯೋಗ ಹೇಳಿದೆ.

ಇವು ಕೇವಲ ಉದಾಹರಣೆಗಳು

ಪರಿಶಿಷ್ಟ ಪಂಗಡಕ್ಕೆ ಮೀಸಲಾಗಿರುವ ನವಾಪುರವನ್ನು ಉದಾಹರಣೆಯಾಗಿ ತೆಗೆದುಕೊಂಡರೆ, ಚಲಾವಣೆಯಾದ ಮತಗಳಿಗಿಂತ ಎಣಿಕೆಯಾದ ಮತಗಳು ಹೆಚ್ಚು. ಆ ಕ್ಷೇತ್ರದ ಒಟ್ಟು ಮತದಾರರ ಸಂಖ್ಯೆ 2,95,786. ಅಲ್ಲಿ ಶೇ.81.15 ಅಂದರೆ 2,40,022 ಮತದಾನವಾಗಿದೆ. ಆದರೆ ಎಣಿಕೆಯಾದ ಮತಗಳು 2,41,193. ಅಂದರೆ ಚಲಾವಣೆಯಾದ ಮತಗಳಿಗಿಂತ 1,171 ಹೆಚ್ಚು. ಇಲ್ಲಿ ಗೆಲ್ಲುವ ಅಭ್ಯರ್ಥಿಯ ಬಹುಮತ 1,122 ಮತಗಳು.

ಇನ್ನೊಂದು ಉದಾಹರಣೆಯನ್ನು ನೋಡೋಣ. ಮಾವಲ್ ಸ್ಥಾನದಲ್ಲಿ ಚಲಾವಣೆಯಾದ ಮತಗಳಿಗಿಂತ ಕಡಿಮೆ ಎಣಿಕೆಯಾಗಿದೆ. ಈ ಕ್ಷೇತ್ರದಲ್ಲಿ 2,80,319 ಮತಗಳು ಚಲಾವಣೆಯಾಗಿವೆ. ಆದರೆ ಕೇವಲ 2,79,081 ಮತಗಳು ಮಾತ್ರ ಎಣಿಕೆಯಾಗಿವೆ. ಅಂದರೆ 1.238 ಮತಗಳು ಚಲಾವಣೆಯಾದ ಮತಗಳಿಗಿಂತ ಕಡಿಮೆ ಎಣಿಕೆಯಾಗಿದೆ. ಈ ಹಿನ್ನೆಲೆಯಲ್ಲಿ ಚುನಾವಣೆ ನಡೆಸುವಲ್ಲಿ ಪಾರದರ್ಶಕತೆ ಮತ್ತು ನಿಷ್ಪಕ್ಷಪಾತ ಬಹುಮುಖ್ಯವಾಗಿದ್ದು, ಚುನಾವಣಾ ಆಯೋಗ ಈ ಬಗ್ಗೆ ಹೆಚ್ಚಿನ ಗಮನಹರಿಸಬೇಕು ಎಂದು ರಾಜಕೀಯ ತಜ್ಞರು ಆಗ್ರಹಿಸುತ್ತಿದ್ದಾರೆ.

ಆಕರ: ವೈರ್‌ ಡಾಟ್‌ ಇನ್