ವಿಧಾನಸೌಧ ಸ್ಫೋಟಗೊಂಡಂತೆ ಸುಳ್ಳು ದೃಶ್ಯ ಸೃಷ್ಟಿಸಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದ ಬಿಹಾರಿ ಕಾರ್ಮಿಕನನ್ನು ಬಂಧಿಸಿದ ಪೊಲೀಸರು

ಬೆಂಗಳೂರು: ಕರ್ನಾಟಕದ ಅತ್ಯುನ್ನತ ಆಡಳಿತ ಕೇಂದ್ರವಾದ ವಿಧಾನಸೌಧದ ಮೇಲೆ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವನ್ನು ಬಳಸಿ ಬಾಂಬ್ ಸ್ಫೋಟ ಸಂಭವಿಸಿದಂತೆ ನಕಲಿ ವಿಡಿಯೋ ಸೃಷ್ಟಿಸಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದ 25 ವರ್ಷದ ವಲಸಿಗ ಕಾರ್ಮಿಕನನ್ನು ಬೆಂಗಳೂರು ನಗರ ಪೊಲೀಸರು ಬಂಧಿಸಿದ್ದಾರೆ.

ಬಿಹಾರದ ಅರಿಯಾ ಜಿಲ್ಲೆ ಮೂಲದ ಅಲಿ (ಹಜರತ್ ಅಲಿ ಶೋಯಾಬ್) ಬಂಧಿತ ಆರೋಪಿ. ಕಳೆದ ಕೆಲವು ತಿಂಗಳಿಂದ ಬೆಂಗಳೂರಿನಲ್ಲಿ ದೈನಂದಿನ ವೇತನದ ಪೈಪ್ ಫಿಟ್ಟರ್ ಆಗಿ ಈತ ಕೆಲಸ ಮಾಡುತ್ತಿದ್ದ. ಇನ್‌ಸ್ಟಾಗ್ರಾಮ್‌ನಲ್ಲಿ ‘jnx__king__h_g’ ಎಂಬ ಹ್ಯಾಂಡಲ್ ಮೂಲಕ ಈ ವಿಡಿಯೋ ವೈರಲ್ ಆಗಿತ್ತು. ವಿಧಾನಸೌಧದ ಹೊರಭಾಗದ ದೃಶ್ಯದೊಂದಿಗೆ ಆರಂಭವಾಗುವ ಈ ಕ್ಲಿಪ್‌ನಲ್ಲಿ, ಎಐ ತಂತ್ರಜ್ಞಾನದ ದೃಶ್ಯ ಪರಿಣಾಮಗಳನ್ನು ಬಳಸಿ ಐತಿಹಾಸಿಕ ಕಟ್ಟಡದ ಮೇಲೆ ಭಾರಿ ಸ್ಫೋಟ ಸಂಭವಿಸಿದಂತೆ ಬಿಂಬಿಸಲಾಗಿತ್ತು. ವಿಡಿಯೋದೊಂದಿಗೆ “ವಿದಾನಸಭ ಉಡಾ ದಿಯಾ ಬಮ್ ಸೆ” ಎಂಬ ಕ್ಯಾಪ್ಷನ್ ಕೂಡ ನೀಡಲಾಗಿತ್ತು.

ಪೊಲೀಸರ ನಿಯಮಿತ ಡಿಜಿಟಲ್ ಕಣ್ಗಾವಲು ವೇಳೆ ಈ ಕೃತ್ಯ ಬೆಳಕಿಗೆ ಬಂದಿದೆ. ವಿಧಾನಸೌಧ ಪೊಲೀಸ್ ಠಾಣೆಯ ಇನ್ಸ್‌ಪೆಕ್ಟರ್ ಎಸ್.ಪಿ. ಕುಮಾರ್ ಸ್ವಾಮಿ ಅವರು ತಕ್ಷಣ ಕಾರ್ಯಪ್ರವೃತ್ತರಾಗಿ ಭಾರತೀಯ ನ್ಯಾಯ ಸಂಹಿತೆ (BNS) 2023ರ ಸೆಕ್ಷನ್ 353(1)(b) ಮತ್ತು 353(2) ಅಡಿಯಲ್ಲಿ ಎಫ್‌ಐಆರ್ ದಾಖಲಿಸಿಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣದ ಖಾತೆಗೆ ಸಂಬಂಧಿಸಿದ ಇಂಟರ್ನೆಟ್ ಪ್ರೋಟೋಕಾಲ್ (IP) ಲಾಗ್‌ಗಳು ಹಾಗೂ ಡಿಜಿಟಲ್ ಹೆಜ್ಜೆಗುರುತುಗಳನ್ನು ಬೆನ್ನಟ್ಟಿದ ಪೊಲೀಸರು, ನೇರವಾಗಿ ನಗರದಲ್ಲಿರುವ ಆರೋಪಿಯ ವಾಸಸ್ಥಳವನ್ನು ಪತ್ತೆಹಚ್ಚಿ ವಶಕ್ಕೆ ಪಡೆದಿದ್ದಾರೆ.

ಈ ಪೋಸ್ಟ್ ಹಿಂದಿನ ನಿಖರವಾದ ಉದ್ದೇಶವೇನು, ಎಐ ದೃಶ್ಯಗಳನ್ನು ಎಡಿಟ್ ಮಾಡಲು ಅಥವಾ ಉತ್ಪಾದಿಸಲು ಬೇರೆ ಯಾರಾದರೂ ಸಹಾಯ ಮಾಡಿದ್ದಾರೆಯೇ ಮತ್ತು ಈ ಘಟನೆಯ ಹಿಂದೆ ಯಾವುದೇ ವ್ಯಾಪಕ ಭದ್ರತಾ ಆತಂಕಗಳಿವೆಯೇ ಎಂಬುನ್ನು ₹ಪತ್ತೆಹಚ್ಚಲು ಆರೋಪಿಯನ್ನು ವಶಕ್ಕೆ ಪಡೆದು ತೀವ್ರ ವಿಚಾರಣೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.