ಹೊಸ ಮತದಾರರ ನೋಂದಣಿಗೆ ಪೋಷಕರ ವಿವರ ಕಡ್ಡಾಯ; ಚುನಾವಣಾ ಆಯೋಗದ ಹೊಸ ನಿಯಮ

ಹೊಸದಾಗಿ ಮತದಾರರ ಪಟ್ಟಿಗೆ ಸೇರ್ಪಡೆಯಾಗಲು ಬಯಸುವ ಅರ್ಜಿದಾರರಿಗೆ ಚುನಾವಣಾ ಆಯೋಗ (EC) ಹೊಸ ಷರತ್ತನ್ನು ವಿಧಿಸಿದೆ. ಇನ್ನು ಮುಂದೆ ಫಾರ್ಮ್-6 ಮೂಲಕ ಆನ್‌ಲೈನ್‌ನಲ್ಲಿ ಮತದಾರರ ನೋಂದಣಿ ಮಾಡಿಕೊಳ್ಳುವವರು ತಮ್ಮ ಪೋಷಕರು ಅಥವಾ ಅಜ್ಜ-ಅಜ್ಜಿಯರು ಹಿಂದಿನ ವಿಶೇಷ ತೀವ್ರ ಪರಿಷ್ಕರಣೆ (Special Intensive Revision – SIR) ಮತದಾರರ ಪಟ್ಟಿಯಲ್ಲಿ ಇದ್ದರೇ ಎಂಬ ಮಾಹಿತಿಯನ್ನು ಕಡ್ಡಾಯವಾಗಿ ನೀಡಬೇಕಾಗುತ್ತದೆ.

ಚುನಾವಣಾ ಆಯೋಗದ ಅಧಿಕಾರಿಗಳ ಪ್ರಕಾರ, ಈ ಘೋಷಣೆಯನ್ನು ಆನ್‌ಲೈನ್ ನೋಂದಣಿ ಪ್ರಕ್ರಿಯೆಯಲ್ಲಿ ಆಡಳಿತಾತ್ಮಕ ಆದೇಶದ ಮೂಲಕ ಸೇರಿಸಲಾಗಿದ್ದು, ECINET ಪೋರ್ಟಲ್‌ನಲ್ಲಿ ಇದು ಕಡ್ಡಾಯವಾಗಿದೆ. ಘೋಷಣೆಯ ಮಾಹಿತಿಯನ್ನು ಭರ್ತಿ ಮಾಡದಿದ್ದರೆ ಫಾರ್ಮ್-6 ಅನ್ನು ಆನ್‌ಲೈನ್‌ನಲ್ಲಿ ಸಲ್ಲಿಸಲು ಅವಕಾಶ ಇರುವುದಿಲ್ಲ.

ಈ ನಿಯಮವು ಮೊದಲ ಬಾರಿಗೆ ಮತದಾರರಾಗುವವರು, ಹೊಸದಾಗಿ ಮತದಾನದ ಅರ್ಹತೆ ಪಡೆದ ನಾಗರಿಕರು ಹಾಗೂ ಹಿಂದೆ ಮತದಾರರ ಪಟ್ಟಿಯಿಂದ ಹೆಸರು ಅಳಿಸಲ್ಪಟ್ಟು ಮತ್ತೆ ನೋಂದಣಿ ಬಯಸುವವರಿಗೆ ಅನ್ವಯಿಸುತ್ತದೆ.

ಹೊಸ ಘೋಷಣೆಯಲ್ಲಿ ಅರ್ಜಿದಾರರಿಗೆ ಮೂರು ಆಯ್ಕೆಗಳನ್ನು ನೀಡಲಾಗಿದೆ. ಮೊದಲನೆಯದಾಗಿ, ತಮ್ಮ ಹೆಸರು ಹಿಂದಿನ SIR ಮತದಾರರ ಪಟ್ಟಿಯಲ್ಲಿ ಇದ್ದಿತೇ, ಎರಡನೆಯದಾಗಿ ಪೋಷಕರು ಅಥವಾ ಅಜ್ಜ-ಅಜ್ಜಿಯ ಹೆಸರು ಹಿಂದಿನ ಪಟ್ಟಿಯಲ್ಲಿ ಇದ್ದಿತೇ, ಅಥವಾ ಮೂರನೆಯದಾಗಿ ಅರ್ಜಿದಾರರು ಅಥವಾ ಅವರ ಕುಟುಂಬದವರು ಹಿಂದಿನ ಪಟ್ಟಿಯಲ್ಲಿ ಇರಲಿಲ್ಲವೇ ಎಂಬುದನ್ನು ಆಯ್ಕೆ ಮಾಡಬೇಕಾಗುತ್ತದೆ.

ಮೊದಲ ಎರಡು ಆಯ್ಕೆಗಳಲ್ಲಿ ಯಾವುದನ್ನಾದರೂ ಆರಿಸಿದರೆ, ಹಿಂದಿನ SIR ಪಟ್ಟಿಯ ವಿಧಾನಸಭಾ ಕ್ಷೇತ್ರ, ಮತಗಟ್ಟೆ ಸಂಖ್ಯೆ ಮತ್ತು ಸರಣಿ ಸಂಖ್ಯೆ ಸೇರಿದಂತೆ ಅಗತ್ಯ ವಿವರಗಳನ್ನು ಸಲ್ಲಿಸಬೇಕು. ಈ ಮಾಹಿತಿ ಇಲ್ಲದಿದ್ದರೆ ಮೂರನೇ ಆಯ್ಕೆಯನ್ನು ಆರಿಸಬಹುದಾದರೂ, ಅದರ ಪರಿಣಾಮಗಳ ಬಗ್ಗೆ ಪೋರ್ಟಲ್‌ನಲ್ಲಿ ಯಾವುದೇ ಸ್ಪಷ್ಟ ಮಾಹಿತಿ ನೀಡಲಾಗಿಲ್ಲ.

ಈ ವ್ಯವಸ್ಥೆಯನ್ನು ಮೊದಲು ಕಳೆದ ವರ್ಷ ಬಿಹಾರದಲ್ಲಿ ನಡೆದ SIR ಪರಿಷ್ಕರಣೆ ವೇಳೆ ಪರಿಚಯಿಸಲಾಗಿತ್ತು. ಬಳಿಕ SIR ನಡೆದ ಇತರೆ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಲ್ಲಿಯೂ ಇದೇ ವಿಧಾನವನ್ನು ಜಾರಿಗೆ ತರಲಾಗಿದೆ ಎಂದು ಚುನಾವಣಾ ಆಯೋಗದ ಅಧಿಕಾರಿಗಳು ತಿಳಿಸಿದ್ದಾರೆ.

ಅಧಿಕಾರಿಗಳ ಪ್ರಕಾರ, ಈ ಹೊಸ ಘೋಷಣೆಯಿಂದ ಮತದಾರರ ಗುರುತಿನ ಪರಿಶೀಲನೆ ಸುಲಭವಾಗುವುದಲ್ಲದೆ, ಹೊಸ ಅರ್ಜಿದಾರರು ಸಲ್ಲಿಸಬೇಕಾಗುವ ಪೂರಕ ದಾಖಲೆಗಳ ಸಂಖ್ಯೆಯೂ ಕಡಿಮೆಯಾಗಲಿದೆ.

ಈಗಾಗಲೇ ಚುನಾವಣಾ ನಿಯಮಗಳ ಪ್ರಕಾರ, ಫಾರ್ಮ್-6ನಲ್ಲಿ ಅರ್ಜಿದಾರರು ತಮ್ಮೊಂದಿಗೆ ವಾಸಿಸುವ ಕುಟುಂಬ ಸದಸ್ಯರ ವಿವರಗಳು ಹಾಗೂ ಅವರ EPIC ಸಂಖ್ಯೆಯನ್ನು ನಮೂದಿಸಬೇಕಿದೆ. ಈಗ ಸೇರಿಸಿರುವ ಹೊಸ ಘೋಷಣೆಯು ಹಿಂದಿನ SIR ಪಟ್ಟಿಯ ಮಾಹಿತಿಯನ್ನೂ ಕಡ್ಡಾಯವಾಗಿ ಕೇಳುವ ಮೂಲಕ ಈ ಪ್ರಕ್ರಿಯೆಯನ್ನು ಮತ್ತಷ್ಟು ವಿಸ್ತರಿಸಿದೆ.

ದೇಶಾದ್ಯಂತ ನಡೆಯುತ್ತಿರುವ SIR ಅಭಿಯಾನದ ಭಾಗವಾಗಿ ಅರ್ಹ ಮತದಾರರನ್ನು ಗುರುತಿಸುವುದು ಹಾಗೂ ನಕಲಿ, ಮೃತ, ಸ್ಥಳಾಂತರಗೊಂಡ, ಗೈರುಹಾಜರಿರುವ ಮತ್ತು ವಿದೇಶಿ ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ತೆಗೆದುಹಾಕುವ ಉದ್ದೇಶದಿಂದ ಚುನಾವಣಾ ಆಯೋಗ ಈ ಕ್ರಮ ಕೈಗೊಂಡಿದೆ.

ಈಗಾಗಲೇ ಬಿಹಾರ, ಪಶ್ಚಿಮ ಬಂಗಾಳ, ಕೇರಳ ಮತ್ತು ತಮಿಳುನಾಡು ಸೇರಿದಂತೆ ಹಲವು ರಾಜ್ಯಗಳಲ್ಲಿ SIR ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಇತರ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಪ್ರಕ್ರಿಯೆ ಮುಂದುವರಿದಿದೆ. ಈ ಪರಿಷ್ಕರಣೆಯಲ್ಲಿ ದೊಡ್ಡ ಪ್ರಮಾಣದಲ್ಲಿ ಮತದಾರರ ಹೆಸರುಗಳು ಪಟ್ಟಿಯಿಂದ ಅಳಿಸಲ್ಪಟ್ಟಿರುವ ಹಿನ್ನೆಲೆಯಲ್ಲಿ, ಹೊಸ ನಿಯಮಗಳು ಹಾಗೂ ಅವುಗಳ ಪರಿಣಾಮಗಳ ಕುರಿತು ರಾಜಕೀಯ ಮತ್ತು ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆ ಏರ್ಪಟ್ಟಿದೆ.