ಅಕ್ರಮ ಬೆಟ್ಟಿಂಗ್: ಕಾಂಗ್ರೆಸ್ ಶಾಸಕ ಕೆ.ಸಿ. ವೀರೇಂದ್ರ ಪಪ್ಪಿಗೆ ಸೇರಿದ 177 ಕೋಟಿ ರೂ. ಮೌಲ್ಯದ ಆಸ್ತಿ ಜಪ್ತಿ ಮಾಡಿದ ಇಡಿ

ಬೆಂಗಳೂರು: ಅಕ್ರಮ ಆನ್‌ಲೈನ್ ಬೆಟ್ಟಿಂಗ್ ಮತ್ತು ಜೂಜಾಟಕ್ಕೆ ಸಂಬಂಧಿಸಿದ ಪ್ರಕರಣದಲ್ಲಿ, ಕಾಂಗ್ರೆಸ್ ಶಾಸಕ ಕೆ.ಸಿ. ವೀರೇಂದ್ರ (ಪಪ್ಪಿ) ಮತ್ತು ಅವರ ಸಹಚರರಿಗೆ ಸೇರಿದ 177.3 ಕೋಟಿ ರೂ. ಮೌಲ್ಯದ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ ಎಂದು ಜಾರಿ ನಿರ್ದೇಶನಾಲಯ (ಇಡಿ) ಗುರುವಾರ ತಿಳಿಸಿದೆ.

ಜಪ್ತಿ ಮಾಡಲಾದ ಆಸ್ತಿಗಳಲ್ಲಿ ಕೃಷಿ ಭೂಮಿ ಮತ್ತು ವಸತಿ ನಿವೇಶನಗಳಂತಹ ಸ್ಥಿರ ಆಸ್ತಿಗಳು ಹಾಗೂ ಇತರೆ ಚರ ಆಸ್ತಿಗಳು ಸೇರಿವೆ. ಅಕ್ರಮ ಆನ್‌ಲೈನ್ ಬೆಟ್ಟಿಂಗ್/ಜೂಜಾಟದ ಕಾರ್ಯಾಚರಣೆಗಳಿಂದ ಬಂದ ‘ಅಪರಾಧದ ಆದಾಯ’ದಿಂದ (Proceeds of Crime) ನೇರವಾಗಿ ಗಳಿಸಿದ ಅಥವಾ ಮೌಲ್ಯವರ್ಧಿತ ಆಸ್ತಿ ಇದಾಗಿರುವುದರಿಂದ ಇದನ್ನು ಜಪ್ತಿ ಮಾಡಲಾಗಿದೆ ಎಂದು ಇಡಿ ಹೇಳಿದೆ.

ಒಂದೇ ರೀತಿಯ ಕಾರ್ಯವಿಧಾನದ ಮೂಲಕ ರಾಷ್ಟ್ರವ್ಯಾಪಿ ಅಕ್ರಮ ಆನ್‌ಲೈನ್ ಬೆಟ್ಟಿಂಗ್ ಜಾಲವನ್ನು ನಡೆಸುತ್ತಿದ್ದ ವೀರೇಂದ್ರ ಮತ್ತು ಅವರ ಸಹಚರರೇ ಇದರ ಹಿಂದಿನ ಪ್ರಮುಖ ಸೂತ್ರಧಾರಿಗಳು ಎಂದು ಇಡಿ ಹೇಳಿಕೊಂಡಿದೆ.

“ಈ ಆನ್‌ಲೈನ್ ಬೆಟ್ಟಿಂಗ್ ಮತ್ತು ವಂಚನೆಯ ಹಗರಣಗಳ ಮೂಲಕ ಸಾರ್ವಜನಿಕರಿಗೆ ಮೋಸ ಮಾಡಿ, ಆರೋಪಿಗಳು ಭಾರಿ ಪ್ರಮಾಣದ ‘ಅಪರಾಧದ ಆದಾಯ’ವನ್ನು ಗಳಿಸಿದ್ದಾರೆ ಎಂಬುದು ತನಿಖೆಯಿಂದ ದೃಢಪಟ್ಟಿದೆ. ಈ ಯೋಜನೆಯಲ್ಲಿ, ಅಮಾಯಕ ಆಟಗಾರರನ್ನು ಆನ್‌ಲೈನ್ ಕ್ಯಾಸಿನೊಗಳ ಸ್ವರೂಪದಲ್ಲಿದ್ದ ಅಕ್ರಮ ಗೇಮಿಂಗ್ ವೆಬ್‌ಸೈಟ್‌ಗಳಲ್ಲಿ ಹಣ ಹೂಡುವಂತೆ ಪ್ರೇರೇಪಿಸಲಾಗುತ್ತಿತ್ತು; ಅವರು ಜಮೆ ಮಾಡಿದ (ಒಟ್ಟಾರೆಯಾಗಿ ಕೋಟಿಗಟ್ಟಲೆ) ಹಣವನ್ನು ಪೇಮೆಂಟ್ ಗೇಟ್‌ವೇಗಳ ಮೂಲಕ ನಿರ್ದಿಷ್ಟ ಪೇಮೆಂಟ್ ಅಗ್ರಿಗೇಟರ್ ಖಾತೆಗಳಿಗೆ ವರ್ಗಾಯಿಸಿಕೊಳ್ಳಲಾಗುತ್ತಿತ್ತು,” ಎಂದು ಸಂಸ್ಥೆ ತಿಳಿಸಿದೆ.

ರಿಲಯನ್ಸ್ ಗ್ರೂಪ್ ಕಂಪನಿಗಳ 1,800 ಕೋಟಿ ರೂ. ಮೌಲ್ಯದ ಹೊಸ ಆಸ್ತಿ ಜಪ್ತಿ ಮಾಡಿದ ಇಡಿ; ಒಟ್ಟು ಜಪ್ತಿ 12 ಸಾವಿರ ಕೋಟಿ ರೂ.

“ಬಳಕೆದಾರರಲ್ಲಿ ನಂಬಿಕೆ ಹುಟ್ಟಿಸಲು ಆರಂಭದಲ್ಲಿ ನಕಲಿ ಗೆಲುವುಗಳನ್ನು ತೋರಿಸಲಾಗುತ್ತಿತ್ತು, ನಂತರ ಅವರು ಹಣವನ್ನು ಹಿಂಪಡೆಯದಂತೆ (withdrawals) ನಿರ್ಬಂಧಿಸಲಾಗುತ್ತಿತ್ತು. ‘ಅಪರಾಧದ ಆದಾಯ’ವನ್ನು ಅಕ್ರಮವಾಗಿ ವರ್ಗಾಯಿಸಲು (ಲಾಂಡರಿಂಗ್) ನೂರಾರು ‘ಮ್ಯೂಲ್ ಖಾತೆ’ಗಳು (ಬೇರೆಯವರ ಹೆಸರಿನ ಖಾತೆಗಳು) ಮತ್ತು ಹಲವಾರು ಪೇಮೆಂಟ್ ಗೇಟ್‌ವೇಗಳನ್ನು ಬಳಸಿರುವುದು ತನಿಖೆಯಿಂದ ಬಹಿರಂಗವಾಗಿದೆ,” ಎಂದು ಸಂಸ್ಥೆ ಸೇರಿಸಿದೆ.

ಇದಕ್ಕೂ ಮುನ್ನ, ಇಡಿ ಹಲವು ರಾಜ್ಯಗಳ 60ಕ್ಕೂ ಹೆಚ್ಚು ಸ್ಥಳಗಳಲ್ಲಿ ವ್ಯಾಪಕ ಶೋಧ ಮತ್ತು ಜಪ್ತಿ ಕಾರ್ಯಾಚರಣೆಗಳನ್ನು ನಡೆಸಿತ್ತು. ಈ ವೇಳೆ ಭಾರೀ ಪ್ರಮಾಣದ ನಗದು, ಚಿನ್ನದ ಗಟ್ಟಿಗಳು, ಚಿನ್ನ ಮತ್ತು ಬೆಳ್ಳಿ ಆಭರಣಗಳು, ವಾಹನಗಳು, ಡಿಜಿಟಲ್ ಸಾಧನಗಳು ಮತ್ತು ಮಹತ್ವದ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿತ್ತು.

“ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ (PMLA) ಸೆಕ್ಷನ್ 19 ರ ಅಡಿಯಲ್ಲಿ ವೀರೇಂದ್ರ ಅವರನ್ನು ಇಡಿ ಬಂಧಿಸಿತ್ತು ಮತ್ತು ವಿಶೇಷ ನ್ಯಾಯಾಲಯಕ್ಕೆ (ಪಿಎಂಎಲ್‌ಎ) ದೂರು ಸಲ್ಲಿಸಲಾಗಿತ್ತು. ತನಿಖೆಯ ವೇಳೆ ಸಂಗ್ರಹಿಸಲಾದ ಸಾಕ್ಷ್ಯಗಳ ಆಧಾರದ ಮೇಲೆ, ಕೆ.ಸಿ. ವೀರೇಂದ್ರ ಅವರು ನೇರವಾಗಿ ಮತ್ತು ಪರೋಕ್ಷವಾಗಿ ಹೊಂದಿರುವ ಆಸ್ತಿಗಳನ್ನು ಇಡಿ ತಾತ್ಕಾಲಿಕವಾಗಿ ಜಪ್ತಿ ಮಾಡಿದೆ. ಇವು ಅಕ್ರಮ ಹಣ ವರ್ಗಾವಣೆಯಲ್ಲಿ ತೊಡಗಿರುವ ಮತ್ತು ಅಪರಾಧದ ಮೂಲಕ ಗಳಿಸಿದ ಆಸ್ತಿಗಳೆಂದು ನಂಬಲಾಗಿದೆ.

“ಇದರೊಂದಿಗೆ, ಪಿಎಂಎಲ್‌ಎ, 2002 ರ ನಿಬಂಧನೆಗಳ ಅಡಿಯಲ್ಲಿ ಪ್ರಸ್ತುತ ಪ್ರಕರಣದಲ್ಲಿ ಇಡಿ 320 ಕೋಟಿ ರೂ.ಗೂ ಹೆಚ್ಚು ಮೌಲ್ಯದ ಆಸ್ತಿಯನ್ನು ಜಪ್ತಿ ಮಾಡಿದೆ. ಅಲ್ಲದೆ, ತನಿಖೆಯ ಹಾದಿಯಲ್ಲಿ, ಇಲ್ಲಿಯವರೆಗೆ 2,300 ಕೋಟಿ ರೂ.ಗೂ ಹೆಚ್ಚು ಮೌಲ್ಯದ ‘ಅಪರಾಧದ ಆದಾಯ’ವನ್ನು ಗುರುತಿಸಲಾಗಿದೆ. ಇದನ್ನು ಅಕ್ರಮ ಆನ್‌ಲೈನ್ ಬೆಟ್ಟಿಂಗ್ ಮತ್ತು ಜೂಜಾಟದ ಚಟುವಟಿಕೆಗಳ ಮೂಲಕ ಗಳಿಸಲಾಗಿತ್ತು ಮತ್ತು ನಂತರ ಅನೇಕ ಹಂತದ ವಹಿವಾಟುಗಳ ಮೂಲಕ ಅಕ್ರಮವಾಗಿ ವರ್ಗಾಯಿಸಲಾಗಿತ್ತು,” ಎಂದು ಏಜೆನ್ಸಿ ಹೇಳಿದೆ.