ದಕ್ಷಿಣ ಕನ್ನಡದಲ್ಲಿ ದನಕ್ಕೆ ಸಿಗುವ ಮರ್ಯಾದೆ ಹಿಂದೂ ಹೆಣ್ಣು ಮಗಳಿಗೆ ಸಿಗುವುದಿಲ್ಲ: ಪ್ರತಿಭಾ ಕುಳಾಯಿ ಆಕ್ರೋಶ

ಮಂಗಳೂರು: ಕೃಷ್ಣ ರಾವ್ ಪ್ರಕರಣದಲ್ಲಿ ಜಿಲ್ಲೆಯ ಯಾವುದೇ ಹಿಂದೂ ಸಂಘಟನೆಗಳು ಮಾತನಾಡದಿರುವುದಕ್ಕೆ ಮಾಜಿ ಕಾರ್ಪೊರೇಟರ್ ಪ್ರತಿಭಾ ಕುಳಾಯಿ ಅವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಪ್ರಕರಣದಲ್ಲಿ ಹಿಂದೂ ಹೆಣ್ಣು ಮಗಳಿಗೆ ದನಕ್ಕೆ ಇರುವ ಮರ್ಯಾದೆಯೂ ಇಲ್ಲ ಎಂದು ಅವರು ಕಟುವಾಗಿ ಟೀಕಿಸಿದರು. ಒಂದು ವೇಳೆ ಇದು ಹಿಂದೂ-ಮುಸ್ಲಿಂ ಸಮಸ್ಯೆಯಾಗಿದ್ದರೆ, ಪರಿಸ್ಥಿತಿಯ ಚಿತ್ರಣವೇ ಬದಲಾಗುತ್ತಿತ್ತು ಮತ್ತು ಎಷ್ಟೋ ಜನರ ಪ್ರಾಣ ಹೋಗುತ್ತಿತ್ತು. ಆದರೆ, ಸಂತ್ರಸ್ತೆಯು ಹಿಂದುಳಿದ ಸಮುದಾಯಕ್ಕೆ ಸೇರಿದವಳಾದ್ದರಿಂದ ಮತ್ತು ಅಲ್ಲಿ ಒಗ್ಗಟ್ಟಿಲ್ಲದ ಕಾರಣ, ಜಿಲ್ಲೆಯ ನೀಚ ರಾಜಕಾರಣಿಗಳು ಇವತ್ತು ಈ ಬಗ್ಗೆ ತುಟಿ ಬಿಚ್ಚುತ್ತಿಲ್ಲ ಎಂದು ಅವರು ದೂರಿದರು.

ಮದುವೆಯಾಗುವ ಭರವಸೆ ನೀಡಿ ಸಂತ್ರಸ್ತೆಯನ್ನು ಲೈಂಗಿಕವಾಗಿ ಬಳಸಿಕೊಂಡು, ಮಗುವನ್ನು ನೀಡಿದ ನಂತರ ಇದೀಗ ಆರೋಪಿ ಕೃಷ್ಣ ರಾವ್ ಮದುವೆಗೆ ಒಪ್ಪುತ್ತಿಲ್ಲ. ಆರೋಪಿ ಬೇಕಾದ ಕಡೆ ಮಕ್ಕಳನ್ನು ಮಾಡುತ್ತಿದ್ದಾನೆ. ಆತನ ಅಪ್ಪ ಆಶ್ರಮ ಓಪನ್ ಮಾಡುವುದು ಒಳ್ಳೆಯದು ಎಂದು ಪ್ರತಿಭಾ ಕುಳಾಯಿ ವ್ಯಂಗ್ಯವಾಡಿದರು. ನಮ್ಮ ಜಿಲ್ಲೆಯಲ್ಲಿ ಹಿಂದುತ್ವ ಬಿಟ್ಟರೆ ಬೇರೆ ಯಾವುದೇ ಮುಖ್ಯ ವಿಷಯ (ಸಬ್ಜೆಕ್ಟ್) ಇಲ್ಲ. ಆದರೂ, ಹಿಂದುಳಿದ ಸಮುದಾಯದ ಯುವತಿಗೆ ಅನ್ಯಾಯವಾದಾಗ ಯಾರು ಮುಂದೆ ಬರುತ್ತಿಲ್ಲ. ಇವತ್ತು ಈಕೆಗೆ ಈ ಸಮಸ್ಯೆ ಬಂದಿದೆ, ನಾಳೆ ಇನ್ನೊಬ್ಬ ಯುವತಿಗೆ ಇದೇ ಪರಿಸ್ಥಿತಿ ಎದುರಾಗುತ್ತದೆ ಎಂದು ಅವರು ಎಚ್ಚರಿಸಿದರು.

ಬೆಂಗಳೂರಿನಿಂದ ನಂಜುಡಿಯವರಂತಹವರು ಬಂದು ಈ ಪ್ರಕರಣದಲ್ಲಿ ಹೋರಾಟ ಮಾಡುತ್ತಿದ್ದಾರೆ. ‘ಯಾಕೆ ನಮ್ಮ ಜಿಲ್ಲೆಯಲ್ಲಿ ಯಾರು ಗಂಡಸರು ಇಲ್ಲವಾ, ಹಿಂದೂ ಹೆಣ್ಣುಮಗಳು ಅಂದರೆ ಅಷ್ಟು ಕೀಳಾ?’ ಎಂದು ಪ್ರತಿಭಾ ಕುಳಾಯಿ ಪ್ರಶ್ನಿಸಿದರು. ಡಿಎನ್‌ಎ ಪರೀಕ್ಷೆ (DNA Test) ಆಗಿ ಇಷ್ಟು ದಿನ ಕಳೆದರೂ ಆರೋಪಿಯನ್ನು ಮದುವೆಗೆ ಒಪ್ಪಿಸಲು ಇವರಿಗೆ ಸಾಧ್ಯವಾಗಿಲ್ಲ. ಅವರ ಸಮಾಜದಲ್ಲಿ ಯಾರೂ ಗಂಡಸರು ಇಲ್ಲವಾ ಎಂದು ಅವರು ಆಕ್ರೋಶ ಹೊರಹಾಕಿದರು. ಈ ಸಂದರ್ಭದಲ್ಲಿ ಸಂತ್ರಸ್ತೆಯ ತಾಯಿ ನಮಿತಾ ಮತ್ತು ಸಮುದಾಯದ ಕಾರ್ಯಕರ್ತೆ ಅರ್ಚನಾ ಅವರು ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.