ಕರ್ನಾಟಕ ಸರ್ಕಾರ “ದರ ಬೀಜಾಸುರನಂತೆ” ವರ್ತಿಸುತ್ತಿದೆ, ಕಾಂಗ್ರೆಸ್‌ ಕಂಪನಿ ಘಜನಿ, ಘೋರಿಯನ್ನು ಕೂಡಾ ನಾಚಿಸುವಂತಿದೆ: ಕುಮಾರಸ್ವಾಮಿ

ಕರ್ನಾಟಕದ ಸಿದ್ದರಾಮಯ್ಯ ಸರ್ಕಾರ “ದರ ಬೀಜಾಸುರ” ನಾಗಿ ಜನರ ರಕ್ತ ಹೀರುತ್ತಿದೆ ಎಂದು ಕೇಂದ್ರ ಸಚಿವ ಎಚ್ ಡಿ ಕುಮಾರಸ್ವಾಮಿ ಮಂಗಳವಾರ ಆರೋಪಿಸಿದ್ದಾರೆ.

ಮಾಧ್ಯಮಗಳಿಗೆ ನೀಡಿದ ಹೇಳಿಕೆಯಲ್ಲಿ ಅವರು, “ಇಂದಿನಿಂದ ಕಾಂಗ್ರೆಸ್ ಕಂಪನಿ ಸರ್ಕಾರ ಕಸದ ಮೇಲೆ ಸೆಸ್ ವಿಧಿಸುತ್ತಿದೆ. ಅದು ಜನರ ರಕ್ತ ಹೀರುತ್ತಿದೆ” ಎಂದು ಹೇಳಿದ್ದಾರೆ.

ರಾಜ್ಯ ಸರ್ಕಾರವು ವಂಚನೆ ಮಾಡುತ್ತಿದೆ ಮತ್ತು ನಿರಂತರವಾಗಿ ಬೆಲೆಗಳನ್ನು ಹೆಚ್ಚಿಸುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ. “ಇದು ಕರ್ನಾಟಕ ಈಸ್ಟ್ ಇಂಡಿಯಾ ಕಾಂಗ್ರೆಸ್ ಕಂಪನಿ ಸರ್ಕಾರದ ಆಡಳಿತ ಶೈಲಿ” ಎಂದು ಅವರು ಹೇಳಿಕೆಯಲ್ಲಿ ವ್ಯಂಗ್ಯವಾಡಿದ್ದಾರೆ.

ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಶನಿವಾರ 2025-26ನೇ ಸಾಲಿನ ‘ಬ್ರಾಂಡ್ ಬೆಂಗಳೂರು’ ಪರಿಕಲ್ಪನೆಯಡಿಯಲ್ಲಿ ಸಿದ್ಧಪಡಿಸಲಾದ ತನ್ನ ಬಜೆಟ್ ಮಂಡಿಸಿತು.

ಇದು 2025-26 ರಿಂದ ಆಸ್ತಿ ತೆರಿಗೆಯೊಂದಿಗೆ ಘನತ್ಯಾಜ್ಯ ನಿರ್ವಹಣಾ ಬಳಕೆದಾರ ಶುಲ್ಕವನ್ನು ವಿಧಿಸುವ ಪ್ರಸ್ತಾಪವನ್ನು ಮುಂದಿಟ್ಟಿದೆ.

ರಾಜ್ಯ ಸರ್ಕಾರವು ಬೆಲೆಗಳನ್ನು ಹೆಚ್ಚಿಸಲು ತನ್ನ ‘ಐದು ಗ್ಯಾರಂಟಿಗಳು’ ಎನ್ನುವ ನೆಪ ಬಳಸುತ್ತಿದೆ ಎಂದು ಕುಮಾರಸ್ವಾಮಿ ಆರೋಪಿಸಿದರು.

“ಆದರೆ ಅದರ ನಿಜವಾದ ಉದ್ದೇಶ ಜನರನ್ನು ದೋಚುವುದಲ್ಲದೆ ಬೇರೇನೂ ಅಲ್ಲ” ಎಂದು ಅವರು ಹೇಳಿದ್ದಾರೆ. ಭಾರತವನ್ನು ಪದೇ ಪದೇ ಆಕ್ರಮಿಸಿ ಲೂಟಿ ಮಾಡಿದ ಮಹಮ್ಮದ್ ಘಜ್ನವಿ ಮತ್ತು ಮಹಮ್ಮದ್ ಘೋರಿ ಕೂಡ ಕಾಂಗ್ರೆಸ್ ಸರ್ಕಾರ ಕನ್ನಡಿಗರ ಮೇಲೆ ಹೇರುತ್ತಿರುವ ಬೆಲೆ ಏರಿಕೆಯ ಹೊರೆಯನ್ನು ನೋಡಿ ನಾಚುತ್ತಾರೆ ಎಂದು ಅವರು ಹೇಳಿದ್ದಾರೆ.