ಆರ್‌ಎಸ್‌ಎಸ್ ಸರ್ಕಾರಕ್ಕೆ ಉತ್ತರದಾಯಿಯಾಗಲಿ: ನೋಂದಣಿ ವಿನಾಯಿತಿ ಕಾನೂನು ತೋರಿಸುವಂತೆ ಪ್ರಿಯಾಂಕ್ ಖರ್ಗೆ ಸವಾಲು!
ಲಿಂಕ್ ನಕಲಿಸಲಾಗಿದೆ ✓
ರಾಷ್ಟ್ರೀಯ ಸ್ವಯಂಸೇವಕ ಸಂಘವು (RSS) ಯಾವ ಕಾನೂನಿನಡಿಯಲ್ಲಿ ಸರ್ಕಾರದ ಬಳಿ ನೋಂದಣಿ ಮಾಡಿಕೊಳ್ಳುವುದರಿಂದ ವಿನಾಯಿತಿ ಪಡೆದಿದೆ ಎಂಬುದನ್ನು ತಮಗೆ ಮನವರಿಕೆ ಮಾಡಿಕೊಡುವಂತೆ ಕರ್ನಾಟಕದ ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ಬುಧವಾರ ಆರ್‌ಎಸ್‌ಎಸ್ ನಾಯಕರಿಗೆ ನೇರ ಸವಾಲು ಹಾಕಿದ್ದಾರೆ. ಇದಕ್ಕಾಗಿ ಬೆಂಗಳೂರಿನಲ್ಲಿರುವ ಆರ್‌ಎಸ್‌ಎಸ್ ಪ್ರಧಾನ ಕಚೇರಿ ‘ಕೇಶವ ಕೃಪ’ಕ್ಕೆ ಭೇಟಿ ನೀಡಲು ಅಥವಾ ಆರ್‌ಎಸ್‌ಎಸ್ ನಾಯಕರೇ ತಮ್ಮ ಕಚೇರಿಗೆ ಬಂದು ದಾಖಲೆಗಳನ್ನು ಪ್ರದರ್ಶಿಸಲು ಅವರು ಮುಕ್ತ ಆಹ್ವಾನ ನೀಡಿದ್ದಾರೆ.
“ಆರ್‌ಎಸ್‌ಎಸ್ ನಾಯಕರು ನನ್ನನ್ನು ಅವರ ಕೇಶವ ಕೃಪ ಕಚೇರಿಗೆ ಕರೆಯಲಿ. ಸರ್ಕಾರಕ್ಕೆ ಉತ್ತರದಾಯಿಯಾಗುವುದರಿಂದ ತಮಗೆ ವಿನಾಯಿತಿ ನೀಡಿರುವ ಆ ಕಾನೂನು ಯಾವುದು ಎಂಬುದನ್ನು ನನಗೆ ತೋರಿಸಲಿ. ಅಥವಾ ಅವರೇ ಅಗತ್ಯ ದಾಖಲೆಗಳೊಂದಿಗೆ ನನ್ನ ಕಚೇರಿಗೆ ಬರಲಿ ಮತ್ತು ಸಾಂವಿಧಾನಿಕ ನಿಯಮಗಳಿಂದ ತಾವು ಹೇಗೆ ಹೊರತಾಗಿದ್ದೇವೆ ಎಂಬುದನ್ನು ಸಾಬೀತುಪಡಿಸಲಿ. ನಾನು ಅದನ್ನು ಪರಿಶೀಲಿಸುತ್ತೇನೆ, ಒಂದು ವೇಳೆ ನನ್ನದೇನಾದರೂ ತಪ್ಪಿದ್ದರೆ ನಾನು ಕ್ಷಮೆಯಾಚಿಸುತ್ತೇನೆ. ಇಲ್ಲದಿದ್ದರೆ ಅವರು ತಮ್ಮ ತಪ್ಪು ತಿದ್ದಿಕೊಳ್ಳಲಿ” ಎಂದು ಪ್ರಿಯಾಂಕ್ ಖರ್ಗೆ ತಿಳಿಸಿದ್ದಾರೆ.
ಆರ್‌ಎಸ್‌ಎಸ್ ಸರಸಂಘಚಾಲಕ ಡಾ. ಮೋಹನ್ ಭಾಗವತ್ ಅವರು ಸಂಘವನ್ನು ‘ವ್ಯಕ್ತಿಗಳ ಒಂದು ಒಕ್ಕೂಟ’ (Body of Individuals) ಎಂದು ಬಣ್ಣಿಸಿರುವುದನ್ನು ಉಲ್ಲೇಖಿಸಿ ಗೃಹ ಸಚಿವರು ಈ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಕಳೆದ ವರ್ಷದ ನವೆಂಬರ್‌ನಲ್ಲಿ ಮಾತನಾಡಿದ್ದ ಮೋಹನ್ ಭಾಗವತ್, ಆರ್‌ಎಸ್‌ಎಸ್ ಅನ್ನು ವ್ಯಕ್ತಿಗಳ ಒಕ್ಕೂಟ ಎಂದು ವರ್ಗೀಕರಿಸಲಾಗಿದ್ದು, ಅದೊಂದು ಮಾನ್ಯತೆ ಪಡೆದ ಸಂಸ್ಥೆಯಾಗಿದೆ. ಆದಾಯ ತೆರಿಗೆ ಇಲಾಖೆಯು ತೆರಿಗೆ ಪಾವತಿಸುವಂತೆ ಕೇಳಿದಾಗ ಕಾನೂನು ಹೋರಾಟ ನಡೆದಿತ್ತು. ಆಗ ನ್ಯಾಯಾಲಯವು ಇದೊಂದು ವ್ಯಕ್ತಿಗಳ ಒಕ್ಕೂಟವಾಗಿದ್ದು, ಇಲ್ಲಿ ಸಂಗ್ರಹವಾಗುವ ‘ಗುರುದಕ್ಷಿಣೆ’ಗೆ (ದೇಣಿಗೆ) ಆದಾಯ ತೆರಿಗೆಯಿಂದ ವಿನಾಯಿತಿ ಇದೆ ಎಂದು ತೀರ್ಪು ನೀಡಿತ್ತು ಎಂದು ಸಮರ್ಥಿಸಿಕೊಂಡಿದ್ದರು.
ಆದರೆ ಭಾಗವತ್ ಅವರ ಈ ವಾದವನ್ನು ಒಪ್ಪದ ಪ್ರಿಯಾಂಕ್ ಖರ್ಗೆ, “ದೇಶದಲ್ಲಿ ಸಣ್ಣ ರಸ್ತೆ ಬದಿಯ ವ್ಯಾಪಾರಿಯೂ ನೋಂದಣಿ ಮಾಡಿಕೊಳ್ಳಬೇಕು, ದೇವಸ್ಥಾನಗಳು ಮತ್ತು ದೇವರುಗಳು ಕೂಡ ತಮಗೆ ಬರುವ ಪ್ರತಿಯೊಂದು ಬಿಡಿಗಾಸಿನ ದೇಣಿಗೆಗೆ ಲೆಕ್ಕ ಒಪ್ಪಿಸಬೇಕು ಹಾಗೂ ಸಾಮಾನ್ಯ ನಾಗರಿಕರು ಕಡ್ಡಾಯವಾಗಿ ತೆರಿಗೆ ರಿಟರ್ನ್ಸ್ ಸಲ್ಲಿಸಬೇಕು. ಇಂತಹ ವ್ಯವಸ್ಥೆ ಇರುವಾಗ ಆರ್‌ಎಸ್‌ಎಸ್‌ಗೆ ಮಾತ್ರ ಹೇಗೆ ವಿನಾಯಿತಿ ಸಿಗುತ್ತದೆ? ಅವರು ತಮಗೆ ಇಷ್ಟ ಬಂದಂತೆ ಮಾಡಲು ಸಾಧ್ಯವೇ? ಅವರು ಪದೇ ಪದೇ ತಮ್ಮನ್ನು ವ್ಯಕ್ತಿಗಳ ಒಕ್ಕೂಟ ಎಂದು ಕರೆದುಕೊಳ್ಳುತ್ತಾರೆ, ಕೇವಲ ಆರ್‌ಎಸ್‌ಎಸ್ ಮಾತ್ರವಲ್ಲ, ಬೆಂಗಳೂರು ಕ್ಲಬ್ ಕೂಡ ವ್ಯಕ್ತಿಗಳ ಒಕ್ಕೂಟವೇ ಆಗಿದೆ” ಎಂದು ತೀಕ್ಷ್ಣವಾಗಿ ಪ್ರಶ್ನಿಸಿದ್ದಾರೆ.
ತಾವು ಗೃಹ ಸಚಿವರಾಗಿ ಅಧಿಕಾರ ವಹಿಸಿಕೊಂಡ ಬೆನ್ನಲ್ಲೇ ಟ್ವೀಟ್ ಮಾಡಿದ್ದ ಪ್ರಿಯಾಂಕ್ ಖರ್ಗೆ, ಆರ್‌ಎಸ್‌ಎಸ್ ನೋಂದಣಿಗಾಗಿ “ತಮ್ಮ ದಾಖಲೆಗಳನ್ನು ಸಿದ್ಧವಾಗಿಟ್ಟುಕೊಳ್ಳುವಂತೆ” ಸೂಚಿಸಿದ್ದರು ಹಾಗೂ ಕಾಂಗ್ರೆಸ್ ಸರ್ಕಾರವು ಆರ್‌ಎಸ್‌ಎಸ್ ಕಡ್ಡಾಯ ನೋಂದಣಿಗಾಗಿ ಹೊಸ ಕಾನೂನನ್ನು ತರಲಿದೆ ಎಂದು ಹೇಳಿದ್ದರು. ಪ್ರಿಯಾಂಕ್ ಅವರ ಈ ಹೇಳಿಕೆಯನ್ನು ಬಿಜೆಪಿಯ ಹಿರಿಯ ನಾಯಕ ಸಿ.ಟಿ. ರವಿ ತೀವ್ರವಾಗಿ ಖಂಡಿಸಿದ್ದು, ಈ ಹಿಂದೆ ಪ್ರಧಾನಿಗಳಾಗಿದ್ದ ಜವಾಹರಲಾಲ್ ನೆಹರು ಮತ್ತು ಇಂದಿರಾ ಗಾಂಧಿ ಅವರೇ ಆರ್‌ಎಸ್‌ಎಸ್ ಅನ್ನು ನಿಷೇಧಿಸಲು ಪ್ರಯತ್ನಿಸಿ ವಿಫಲರಾಗಿದ್ದರು ಎಂದು ನೆನಪಿಸಿದ್ದರು. ಇದಕ್ಕೆ ತಿರುಗೇಟು ನೀಡಿರುವ ಪ್ರಿಯಾಂಕ್ ಖರ್ಗೆ, “ಸಿ.ಟಿ. ರವಿ ಅವರಿಗೆ ಇತಿಹಾಸದ ಜ್ಞಾನವಿಲ್ಲ ಎಂದು ತೋರುತ್ತದೆ. ಸಂಘವನ್ನು ನಿಷೇಧಿಸಿದಾಗ ಆರ್‌ಎಸ್‌ಎಸ್ ನಾಯಕರು ನೆಹರು ಮತ್ತು ಸರ್ದಾರ್ ಪಟೇಲ್ ಅವರ ಕಾಲಿಗೆ ಬಿದ್ದಿದ್ದರು. ಇಂದಿರಾ ಗಾಂಧಿ ಅವರು ಆರ್‌ಎಸ್‌ಎಸ್ ನಿಷೇಧಿಸಿದಾಗ, ಅಂದಿನ ಸರಸಂಘಚಾಲಕರು ತುರ್ತು ಪರಿಸ್ಥಿತಿಯನ್ನು ಬೆಂಬಲಿಸಿ ಸುದೀರ್ಘವಾದ ಪ್ರಶಂಸಾ ಪತ್ರ ಬರೆದಿದ್ದರು” ಎಂದು ಹೇಳುವ ಮೂಲಕ ಆರ್‌ಎಸ್‌ಎಸ್ ನಾಯಕರನ್ನು ‘ಹೇಡಿಗಳು’ ಎಂದು ಕರೆದಿದ್ದಾರೆ.
Peepal Media
Peepal Media · ರಾಜ್ಯ ವಿಭಾಗ
