ಬೆಂಗಳೂರು: ನಾಲ್ಕು ದಿನಗಳಿಂದ ಗಾಳಿಯ ಗುಣಮಟ್ಟದಲ್ಲಿ ತೀವ್ರ ಕುಸಿತ, 180 ದಾಟಿದ ಏರ್‌ ಕ್ವಾಲಿಟಿ ಸೂಚ್ಯಂಕ

ಬೆಂಗಳೂರು ನಗರದಲ್ಲಿ ಕಳೆದ ನಾಲ್ಕು ದಿನಗಳಿಂದ ಗಾಳಿಯ ಗುಣಮಟ್ಟದಲ್ಲಿ ತೀವ್ರ ಹಿನ್ನಡೆ ಕಾಣಿಸಿಕೊಂಡಿದ್ದು, ಹಲವು ಪ್ರದೇಶಗಳಲ್ಲಿ ಏರ್‌ ಕ್ವಾಲಿಟಿ ಸೂಚ್ಯಂಕ (AQI) 180ಕ್ಕೆ ತಲುಪಿದೆ. ಇದು “ಅನಾರೋಗ್ಯಕರ” ಅಥವಾ “ಅಪಾಯಕಾರಿ” ವರ್ಗಕ್ಕೆ ಸೇರಿದ ಮಟ್ಟವಾಗಿದ್ದು, ಸಾರ್ವಜನಿಕರಲ್ಲಿ ಆತಂಕ ಹೆಚ್ಚಿಸಿದೆ.

ನಗರದ ಗಾಳಿಯಲ್ಲಿ PM2.5 ಮತ್ತು PM10 ಸೂಕ್ಷ್ಮಕಣಗಳ ಪ್ರಮಾಣ ಹೆಚ್ಚಿರುವುದು ಪ್ರಮುಖ ಕಾರಣವಾಗಿದ್ದರೆ, ಈ ಮೇಲಾಟಕ್ಕೆ ಚಳಿಗಾಲದ ಹವಾಮಾನ, ವಾಹನಗಳ ದಟ್ಟ ಸಂಚರಣೆ, ಹಾಗೂ ನಿರ್ಮಾಣ ಕಾರ್ಯಗಳಿಂದ ಉಂಟಾಗುತ್ತಿರುವ ಧೂಳು ಕಾರಣವೆಂದು ತಜ್ಞರು ತಿಳಿಸಿದ್ದಾರೆ.

ಗಾಳಿಯಲ್ಲಿನ ಮಾಲಿನ್ಯ ಪ್ರಮಾಣ ಏರಿಕೆಯ ಹಿನ್ನೆಲೆ, ಉಸಿರಾಟದ ತೊಂದರೆ, ಗಂಟಲಿನ ಕಿರಿಕಿರಿ, ಕಣ್ಣು ಸುಡುವಿಕೆ ಮುಂತಾದ ಸಮಸ್ಯೆಗಳು ಹೆಚ್ಚಾಗುವ ಸಾಧ್ಯತೆ ಇದೆ. ವಿಶೇಷವಾಗಿ ಮಕ್ಕಳು, ವೃದ್ಧರು ಹಾಗೂ ಅನಾರೋಗ್ಯ ಪೀಡಿತರು ಮಾಲಿನ್ಯಕ್ಕೆ ಹೆಚ್ಚು ಗುರಿಯಾಗುವ ಸಾಧ್ಯತೆ ಇರುವುದರಿಂದ ವೈದ್ಯರು ಎಚ್ಚರಿಕೆ ನೀಡಿದ್ದಾರೆ.

ದೇಶದ ರಾಜಧಾನಿ ದೆಹಲಿಗಿಂತ ಬೆಂಗಳೂರಿನ ವಾತಾವರಣ ಒಟ್ಟಾರೆ ಉತ್ತಮವಾಗಿದ್ದರೂ, ಪ್ರಸ್ತುತ ಮಟ್ಟಗಳು “ಕಳಪೆ ಗಾಳಿ” ಮಟ್ಟಕ್ಕೆ ಸೇರಿರುವುದರಿಂದ ಮುನ್ನೆಚ್ಚರಿಕೆ ಅಗತ್ಯವಾಗಿದೆ.

ಮುಂದಿನ ನಾಲ್ಕು ದಿನಗಳ ಗಾಳಿಯ ಗುಣಮಟ್ಟ: ಹದಗೆಡುವ ಮುನ್ಸೂಚನೆ

ವಾಯು ಮಾಲಿನ್ಯದಲ್ಲಿ ಇಳಿಕೆಯಿಂದ ಹೆಚ್ಚಿನ ಸುಧಾರಣೆ ಕಂಡುಬರುವ ಲಕ್ಷಣಗಳು ಇಲ್ಲ. ಹವಾಮಾನ ಇಲಾಖೆ ನೀಡಿರುವ ಪ್ರಾಥಮಿಕ ಅಂದಾಜು ಹೀಗಿದೆ:

ಇಂದು (ಡಿ. 12): AQI 180 – ಅನಾರೋಗ್ಯಕರ. ಮಾಲಿನ್ಯ ಇನ್ನೂ ಏರಿಕೆ ಕಾಣುವ ಸಾಧ್ಯತೆ.

ನಾಳೆ (ಡಿ. 13): AQI 156ಕ್ಕೂ ಹೆಚ್ಚಿನ ಮಟ್ಟ – ಆರೋಗ್ಯವಂತರಿಗೂ ಉಸಿರಾಟ ತೊಂದರೆ ಉಂಟಾಗುವ ಸಾಧ್ಯತೆ.

ಭಾನುವಾರ (ಡಿ. 14): AQI ಸುಮಾರು 157 – ವಾಯು ಗುಣಮಟ್ಟದಲ್ಲಿ ಯಾವುದೇ ಪ್ರಮುಖ ಸುಧಾರಣೆ ಕಾಣುವ ನಿರೀಕ್ಷೆಿಲ್ಲ.

ಸೋಮವಾರ (ಡಿ. 15): AQI 171 – ಮಾಲಿನ್ಯ ಪ್ರಮಾಣ ಮತ್ತಷ್ಟು ಹೆಚ್ಚುವ ಸಾಧ್ಯತೆ.

ತಜ್ಞರು ಜನರಿಗೆ ಅಗತ್ಯವಿದ್ದಾಗ ಮಾತ್ರ ಹೊರಗೆ ಹೋಗುವಂತೆ, ಹೊರಗಡೆ ಹೋಗುವ ಸಂದರ್ಭಗಳಲ್ಲಿ ಮಾಸ್ಕ್ ಬಳಕೆ, ಮನೆಯೊಳಗೆ ತೇವಾಂಶ ಹೆಚ್ಚಿದ ಪರಿಸರ, ಹಾಗೂ ಬಿಸಿ ದ್ರವಪದಾರ್ಥಗಳ ಸೇವನೆ ಮಾಡಲು ಸಲಹೆ ನೀಡಿದ್ದಾರೆ.