ಕೇರಳ ಗುಂಪು ಹಲ್ಲೆ ಪ್ರಕರಣೆ: 25 ಲಕ್ಷ ರೂಪಾಯಿ ಪರಿಹಾರಕ್ಕೆ ಛತ್ತೀಸ್‌ಗಢ ಮೂಲದ ಮೃತನ ಕುಟುಂಬದ ಆಗ್ರಹ

ತಿರುವನಂತಪುರಂ: ಕೇರಳದಲ್ಲಿ ಗುಂಪು ಹಲ್ಲೆಗೆ ಬಲಿಯಾದ ಛತ್ತೀಸ್‌ಗಢ ಮೂಲದ ಯುವಕನ ಕುಟುಂಬವು, ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಮತ್ತು ಸೂಕ್ತ ಪರಿಹಾರ ನೀಡುವವರೆಗೆ ಮೃತದೇಹವನ್ನು ಸ್ವೀಕರಿಸಲು ನಿರಾಕರಿಸಿದೆ.

31 ವರ್ಷದ ರಾಮ್ ನಾರಾಯಣ್ ಬಾಘೇಲ್ ಎಂಬುವವರನ್ನು ಡಿಸೆಂಬರ್ 18ರಂದು ಪಾಲಕ್ಕಾಡ್‌ನ ವಾಳೆಯಾರ್ ಎಂಬಲ್ಲಿ ಕಳ್ಳನೆಂದು ತಪ್ಪಾಗಿ ಭಾವಿಸಿ ಗುಂಪೊಂದು ಬರ್ಬರವಾಗಿ ಹತ್ಯೆ ಮಾಡಿತ್ತು. ದಾಳಿಯ ಸಮಯದಲ್ಲಿ ಆರೋಪಿಗಳು ಬಾಘೇಲ್ ಅವರ ಬಳಿ “ನೀನು ಬಾಂಗ್ಲಾದೇಶದವನೇ?” ಎಂದು ಪ್ರಶ್ನಿಸಿದ್ದರು ಎನ್ನಲಾಗಿದೆ.

ಮರಣೋತ್ತರ ಪರೀಕ್ಷೆಯ ವರದಿಯಲ್ಲಿ ಬಾಘೇಲ್ ಅವರ ದೇಹದ ಮೇಲೆ ಸುಮಾರು 30ಕ್ಕೂ ಹೆಚ್ಚು ಗಾಯಗಳಿರುವುದು ಪತ್ತೆಯಾಗಿದ್ದು, ಹಲ್ಲೆಯ ತೀವ್ರತೆಯನ್ನು ಎತ್ತಿ ತೋರಿಸಿದೆ.

ಕುಟುಂಬದ ಆಕ್ರೋಶ ಮತ್ತು ಬೇಡಿಕೆ: ಭಾನುವಾರ ಕೇರಳಕ್ಕೆ ಆಗಮಿಸಿದ ಬಾಘೇಲ್ ಅವರ ಪತ್ನಿ ಲಲಿತಾ, ಇಬ್ಬರು ಮಕ್ಕಳು ಮತ್ತು ಸಹೋದರ, ತೃಶ್ಯೂರ್ ವೈದ್ಯಕೀಯ ಕಾಲೇಜಿನ ಶವಾಗಾರದಲ್ಲಿ ಮೃತದೇಹವನ್ನು ಕಂಡು ಕಣ್ಣೀರಿಟ್ಟರು. “ಬಾಘೇಲ್ ನಮ್ಮ ಕುಟುಂಬದ ಏಕೈಕ ಸಂಪಾದನೆಯ ಮೂಲವಾಗಿದ್ದರು.

ಅವರ ಸಾವಿನಿಂದ ಕುಟುಂಬ ಬೀದಿಗೆ ಬಂದಿದೆ. ಹೀಗಾಗಿ ಕೇರಳ ಸರ್ಕಾರವು ನಮಗೆ 25 ಲಕ್ಷ ರೂಪಾಯಿ ಪರಿಹಾರ ನೀಡಬೇಕು ಮತ್ತು ದಲಿತ ಸಮುದಾಯದ ಸದಸ್ಯನ ಮೇಲೆ ನಡೆದ ಈ ದಾಳಿಯ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು,” ಎಂದು ಅವರ ಸಹೋದರ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಅಲ್ಲಿಯವರೆಗೆ ಮೃತದೇಹ ಪಡೆಯುವುದಿಲ್ಲ ಎಂದು ಅವರು ಪಟ್ಟು ಹಿಡಿದಿದ್ದಾರೆ.

ಈ ಘಟನೆಯನ್ನು ಕಾಂಗ್ರೆಸ್ ನಾಯಕ ಕೆ.ಸಿ. ವೇಣುಗೋಪಾಲ್ ಮತ್ತು ವಿರೋಧ ಪಕ್ಷದ ನಾಯಕ ವಿ.ಡಿ. ಸತೀಶನ್ ಖಂಡಿಸಿದ್ದಾರೆ. “ಕೇರಳದಂತಹ ಕೋಮು ಸಾಮರಸ್ಯದ ಇತಿಹಾಸವಿರುವ ರಾಜ್ಯದಲ್ಲಿ ಇಂತಹ ಪದೇ ಪದೇ ನಡೆಯುತ್ತಿರುವ ಗುಂಪು ಹಲ್ಲೆ ಪ್ರಕರಣಗಳು ವಿಷಾದನೀಯ,” ಎಂದು ವೇಣುಗೋಪಾಲ್ ಆತಂಕ ವ್ಯಕ್ತಪಡಿಸಿದ್ದಾರೆ. 2018ರಲ್ಲಿ ಪಾಲಕ್ಕಾಡ್‌ನಲ್ಲಿ ನಡೆದ ಆದಿವಾಸಿ ಯುವಕ ಮಧು ಅವರ ಹತ್ಯೆಯನ್ನೂ ಅವರು ಈ ಸಂದರ್ಭದಲ್ಲಿ ಸ್ಮರಿಸಿದ್ದಾರೆ.

ಪೊಲೀಸರು ಈಗಾಗಲೇ ಐವರು ಆರೋಪಿಗಳನ್ನು ಬಂಧಿಸಿದ್ದು, ಪ್ರಕರಣದಲ್ಲಿ ಕೆಲವು ಮಹಿಳೆಯರು ಸೇರಿದಂತೆ ಇನ್ನೂ ಹೆಚ್ಚಿನ ವ್ಯಕ್ತಿಗಳು ಭಾಗಿಯಾಗಿರುವ ಶಂಕೆಯಿದೆ. ಕೆಲಸ ಅರಸಿ ಈ ತಿಂಗಳ ಆರಂಭದಲ್ಲಷ್ಟೇ ಕೇರಳಕ್ಕೆ ಬಂದಿದ್ದ ಬಾಘೇಲ್ ಅವರು ಯಾವುದೇ ಕ್ರಿಮಿನಲ್ ಚಟುವಟಿಕೆಗಳಲ್ಲಿ ಭಾಗಿಯಾಗಿಲ್ಲ ಎಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.