ಕಮೆಡಿಯನ್ ಕುನಾಲ್ ಕಾಮ್ರಾಗೆ ಮಧ್ಯಂತರ ಜಾಮೀನು ಮಂಜೂರು‌ ಮಾಡಿದ ಮದ್ರಾಸ್ ಹೈಕೋರ್ಟ್

ಚೆನ್ನೈ: ಮದ್ರಾಸ್ ಹೈಕೋರ್ಟ್ ಮಾರ್ಚ್ 28, 2025ರಂದು ಕಮೆಡಿಯನ್ ಕುನಾಲ್ ಕಾಮ್ರಾ‌ ಅವರಿಗೆ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಏಕನಾಥ್ ಶಿಂದೆ ಅವರ ಬಗ್ಗೆ ಮಾಡಿದ ಹಾಸ್ಯ ಪ್ರದರ್ಶನದಿಂದ ಉಂಟಾದ ವಿವಾದಕ್ಕೆ ಸಂಬಂಧಿಸಿ ಮಧ್ಯಂತರ ಜಾಮೀನು ಮಂಜೂರು ಮಾಡಿದೆ. ತಮಿಳುನಾಡಿನ ವಿಲ್ಲುಪುರಂ ಜಿಲ್ಲೆಯ ವನೂರಿನ ಜುಡೀಷಿಯಲ್ ಮ್ಯಾಜಿಸ್ಟ್ರೇಟ್‌ ಅವರಿಗೆ ಸಮಂಜಸವೆನ್ನಿಸುವ ಬಾಂಡ್ ಸಲ್ಲಿಸುವ ಷರತ್ತಿನ ಮೇಲೆ ಈ ಜಾಮೀನು ದೊರೆತಿದೆ.

ನ್ಯಾಯಮೂರ್ತಿ ಸುಂದರ್ ಮೋಹನ್ ಅವರು ಎರಡನೇ ಪ್ರತಿವಾದಿ (ಖಾರ್ ಪೊಲೀಸ್) ಗೆ ನೋಟಿಸ್ ಜಾರಿ ಮಾಡಿ, ಪ್ರಕರಣವನ್ನು ಏಪ್ರಿಲ್ 7ಕ್ಕೆ ಮುಂದೂಡಿದ್ದಾರೆ. ಕಾಮ್ರಾ ಅವರು 2021ರಲ್ಲಿ ಮುಂಬೈನಿಂದ ತಮಿಳುನಾಡಿಗೆ ಸ್ಥಳಾಂತರಗೊಂಡಿದ್ದು, ಮುಂಬೈ ಪೊಲೀಸರಿಂದ ಬಂಧನದ ಭಯವಿದೆ ಎಂದು ಹೇಳಿದ್ದಾರೆ.

ಕಾಮ್ರಾ ಅವರ ವಕೀಲರು, “ನಯಾ ಭಾರತ್” ಎಂಬ ಸ್ಟ್ಯಾಂಡ್-ಅಪ್ ಕಾಮಿಡಿಯಲ್ಲಿ ಶಿಂದೆ ಅವರ ಬಗ್ಗೆ ಮಾಡಿದ ಟೀಕೆಯೇ ಆರೋಪವಾಗಿದೆ ಎಂದು ವಾದಿಸಿದರು. ಈ ಆರೋಪವು ಶಿಂದೆ ಅವರ ಖ್ಯಾತಿಗೆ ಧಕ್ಕೆ ತಂದಿದೆ ಎಂದು ಪ್ರಾಸಿಕ್ಯೂಷನ್ ಹೇಳಿದೆ. ಆದರೆ, ಈ ಆರೋಪಕ್ಕೆ ಕಸ್ಟಡಿ ವಿಚಾರಣೆ ಅಗತ್ಯವಿಲ್ಲ ಎಂದು ವಕೀಲರು ಒತ್ತಿ ಹೇಳಿದರು. ಶಿವಸೇನಾ ಕಾರ್ಯಕರ್ತರಿಂದ ಮತ್ತು ಮಂತ್ರಿಗಳಿಂದ ಜೀವ ಬೆದರಿಕೆ ಇದೆ ಎಂದು ತಿಳಿಸಿ, ಮಹಾರಾಷ್ಟ್ರದ ನ್ಯಾಯಾಲಯವನ್ನು ಸಂಪರ್ಕಿಸಲು ಜಾಮೀನು ಕೋರಿದರು.

ನ್ಯಾಯಾಧೀಶರು, ಸುಪ್ರೀಂ ಕೋರ್ಟ್ ತೀರ್ಪನ್ನು ಉಲ್ಲೇಖಿಸಿ, ಕಾಮ್ರಾ ತಕ್ಷಣ ಮಹಾರಾಷ್ಟ್ರ ನ್ಯಾಯಾಲಯವನ್ನು ಏಕೆ ಸಂಪರ್ಕಿಸಲಿಲ್ಲ ಎಂಬುದಕ್ಕೆ‌ ತೃಪ್ತಿಕರ ರೀತಿಯಲ್ಲಿ ಪ್ರಾಥಮಿಕ ವಿವರಣೆ ದೊರೆತಿದೆ ಎಂದರು. ಈ ಹಿನ್ನೆಲೆಯಲ್ಲಿ ಅವರು, ಏಪ್ರಿಲ್ 7ರವರೆಗೆ ಮಧ್ಯಂತರ ಜಾಮೀನು ಮಂಜೂರು ಮಾಡಿ, ವನೂರಿನ ಮ್ಯಾಜಿಸ್ಟ್ರೇಟ್‌ಗೆ ಬಾಂಡ್ ಸಲ್ಲಿಸುವಂತೆ ಸೂಚಿಸಿದರು.

ಕಾಮ್ರಾ ಅವರ “ನಯಾ ಭಾರತ್” ಶೋ ಮುಂಬೈನ ಖಾರ್‌ನ ಹ್ಯಾಬಿಟ್ಯಾಟ್ ಕಾಮಿಡಿ ಕ್ಲಬ್‌ನಲ್ಲಿ ನಡೆದಿದ್ದು, ಅವರು ಅವರು ಶಿಂದೆ ಅವರನ್ನು ಗುರಿಯಾಗಿಸಿ ಹಾಡಿದ ವ್ಯಂಗ್ಯ ಗೀತೆಯಿಂದ ವಿವಾದ ಉಂಟಾಯಿತು. ಶಿವಸೇನಾ ಬೆಂಬಲಿಗರು ಕ್ಲಬ್ ಮತ್ತು ಹೊಟೇಲ್‌ಗೆ ನುಗ್ಗಿ ಧ್ವಂಸಕಾರ್ಯ ನಡೆಸಿದರು. ಶಾಸಕ ಮುರ್ಜಿ ಪಟೇಲ್ ದೂರಿನ ಮೇರೆಗೆ ಖಾರ್ ಪೊಲೀಸರು ಕಾಮ್ರಾ ವಿರುದ್ಧ ಪ್ರಕರಣ ದಾಖಲಿಸಿದರು. ಕಾಮ್ರಾ ತಾನು ನಿರಪರಾಧಿ ಎಂದು ವಾದಿಸಿದ್ದು, ರಾಜಕೀಯ ಒತ್ತಡದಿಂದ ಬೆದರಿಕೆ ಎದುರಿಸುತ್ತಿರುವುದಾಗಿ ಹೇಳಿದ್ದಾರೆ.