ಇರಾನ್‌‌ ದೇಶದ ಸುಪ್ರೀಂ ಲೀಡರ್ ಖಾತೆಗಳನ್ನು ನಿಷೇಧಿಸಿದ ಮೆಟಾ

ಟೆಹ್ರಾನ್: ಟೆಕ್ ದೈತ್ಯ ಮೆಟಾ ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ವಿರುದ್ಧ ಕಠಿಣ ಕ್ರಮಗಳನ್ನು ಕೈಗೊಂಡಿದೆ. ಅವರ ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್ ಖಾತೆಗಳನ್ನು ಅಳಿಸಲಾಗಿದೆ.

ಸಂಸ್ಥೆಯ ವಿಷಯ ನೀತಿಗಳ ಪುನರಾವರ್ತಿತ ಉಲ್ಲಂಘನೆ ಕಾರಣಕ್ಕಾಗಿ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಅದು ಹೇಳಿದೆ.

ಇಸ್ರೇಲ್ ಮೇಲೆ ಹಮಾಸ್ ನಡೆಸಿದ ದಾಳಿಯ ನಂತರ ಈ ಸರ್ವೋಚ್ಚ ನಾಯಕನನ್ನು ನಿಷೇಧಿಸುವಂತೆ ಮೆಟಾ ಮೇಲೆ ಒತ್ತಡ ಬಂದಿತ್ತು. ಹಮಾಸ್ ನಡೆಸಿದ ದಾಳಿಯನ್ನು ಬೆಂಬಲಿಸುವುದಲ್ಲದೆ, ಗಾಜಾದಲ್ಲಿ ಇಸ್ರೇಲ್ ವಿರುದ್ಧ ಉಗ್ರಗಾಮಿಗಳ ಕ್ರಮಗಳು ಮತ್ತು ಕೆಂಪು ಸಮುದ್ರದಲ್ಲಿ ಹಡಗುಗಳ ಮೇಲೆ ಹೌತಿ ದಾಳಿಗಳನ್ನು ಸಮರ್ಥಿಸುವ ಕಾಮೆಂಟ್‌ಗಳನ್ನು ಖಮೇನಿ ಮಾಡಿದ್ದರು.

ಅಕ್ಟೋಬರ್ 7 ರಂದು ಇಸ್ರೇಲ್ ಮೇಲೆ ನಡೆದ ದಾಳಿಯ ಹಿಂದೆ ತಮ್ಮ ಪಾತ್ರವಿಲ್ಲ ಎಂದು ಅವರು ವಿವರಿಸಿದ್ದರು. ಆದರೆ, ಅವರ ಖಾತೆಗಳನ್ನು ನಿಷೇಧಿಸಿದ ಮೆಟಾ ಇಸ್ರೇಲ್-ಹಮಾಸ್ ಯುದ್ಧವನ್ನು ಉಲ್ಲೇಖಿಸಿಲ್ಲ.

30 ವರ್ಷಗಳಿಗೂ ಹೆಚ್ಚು ಕಾಲ ಇರಾನ್ ದೇಶವನ್ನು ಆಳಿದ ಖಮೇನಿ Instagram ನಲ್ಲಿ 5 ದಶಲಕ್ಷಕ್ಕೂ ಹೆಚ್ಚು ಅನುಯಾಯಿಗಳನ್ನು ಹೊಂದಿದ್ದಾರೆ. ಇರಾನ್‌ನಲ್ಲಿ ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್ ಮೇಲೆ ನಿರ್ಬಂಧಗಳಿವೆ. ಅಲ್ಲಿನ ಜನರು ವರ್ಚುವಲ್ ಪ್ರೈವೇಟ್ ನೆಟ್‌ವರ್ಕ್‌ಗಳ ಮೂಲಕ ಈ ಮಾಧ್ಯಮಗಳನ್ನು ಬಳಸುತ್ತಿದ್ದಾರೆ.