ಉತ್ತರ ಪ್ರದೇಶ: 60 ಸಾವಿರ ಕಾನ್‌ಸ್ಟೆಬಲ್ ಹುದ್ದೆಗಳಿಗೆ 50 ಲಕ್ಷಕ್ಕೂ ಹೆಚ್ಚು ಅರ್ಜಿ ಸಲ್ಲಿಕೆ!

ಹೊಸದಿಲ್ಲಿ: ಉತ್ತರ ಪ್ರದೇಶದಲ್ಲಿ 60,244 ಕಾನ್ಸ್‌ಟೇಬಲ್‌ ಹುದ್ದೆಗಳಿಗೆ 50 ಲಕ್ಷಕ್ಕೂ ಹೆಚ್ಚು ಯುವಕರು ಅರ್ಜಿ ಸಲ್ಲಿಸಿದ್ದು, ಯುಪಿ ಪೊಲೀಸರು ಇದುವರೆಗಿನ ಅತಿದೊಡ್ಡ ನೇಮಕಾತಿ ಅಭಿಯಾನವನ್ನು ನಡೆಸುತ್ತಿದ್ದಾರೆ.

ಟೈಮ್ಸ್ ಆಫ್ ಇಂಡಿಯಾ ವರದಿಯ ಪ್ರಕಾರ, UP ಪೊಲೀಸ್ ನೇಮಕಾತಿ ಮತ್ತು ಪ್ರಚಾರ ಮಂಡಳಿ (UPPRPB) 2009 ರಲ್ಲಿ ರಚನೆಯಾದ ನಂತರ ಇದೇ ಮೊದಲ ಬಾರಿಗೆ ಇಷ್ಟು ಮಟ್ಟದ ಆನ್‌ಲೈನ್ ಅರ್ಜಿಗಳನ್ನು ಸ್ವೀಕರಿಸಿದೆ ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ. ಇದು ದೇಶದಲ್ಲಿ ತಾಂಡವವಾಡುತ್ತಿರುವ ನಿರುದ್ಯೋಗದ ಮಟ್ಟವನ್ನು ಸೂಚಿಸುವಂತಿದೆ.

ಒಟ್ಟು ಅರ್ಜಿದಾರರಲ್ಲಿ 15 ಲಕ್ಷ ಮಹಿಳೆಯರು, 12,000 ಮೀಸಲು ಸೀಟುಗಳಿಗೆ ಅರ್ಜಿ ಸಲ್ಲಿಸಿದ್ದಾರೆ. ನೇಮಕಾತಿ ಪ್ರಕ್ರಿಯೆಯು ಡಿಸೆಂಬರ್ 27, 2023 ರಂದು ಪ್ರಾರಂಭವಾಗಿದೆ.

ಯುಪಿಪಿಆರ್‌ಪಿಬಿ ಅಧ್ಯಕ್ಷೆ ಡಿಜಿ ರೇಣುಕಾ ಮಿಶ್ರಾ ಮಾತನಾಡಿ, ‘ಆನ್‌ಲೈನ್ ನೋಂದಣಿ ವಿಂಡೋವನ್ನು ಲಾಕ್ ಮಾಡಲಾಗಿದೆ. ಅರ್ಜಿಯಲ್ಲಿನ ಶುಲ್ಕ ಹೊಂದಾಣಿಕೆ ಮತ್ತು ತಿದ್ದುಪಡಿಗಳನ್ನು ಜನವರಿ 20ರವರೆಗೆ ಸಲ್ಲಿಸಬಹುದುʼ ಎಂದು ತಿಳಿಸಿದ್ದಾರೆ.

ವಿಂಡೋ ಕ್ಲೋಸ್‌ ಮಾಡುವ ವೇಳೆಗೆ 50.14 ಲಕ್ಷ ಅಭ್ಯರ್ಥಿಗಳು ಅರ್ಜಿ ಸಲ್ಲಿಸಿದ್ದರು ಎಂದು ಮತ್ತೊಬ್ಬ ಅಧಿಕಾರಿ ತಿಳಿಸಿದ್ದಾರೆ. ಮಂಡಳಿಯು ಆರಂಭದಲ್ಲಿ ಸುಮಾರು 32 ಲಕ್ಷ ಅರ್ಜಿಗಳನ್ನು ನಿರೀಕ್ಷಿಸುತ್ತಿತ್ತು ಮತ್ತು ಫೆಬ್ರವರಿ 18ರಂದು ನಿಗದಿಪಡಿಸಲಾದ ಲಿಖಿತ ಪರೀಕ್ಷೆಗಾಗಿ 6,500ಕ್ಕೂ ಹೆಚ್ಚು ಕೇಂದ್ರಗಳನ್ನು ಸ್ಥಾಪಿಸಲು ನಿರ್ಧರಿಸಲಾಗಿದೆ ಎಂದು ಅವರು ಹೇಳಿದರು.

ಈಗ ಎರಡು ಅಥವಾ ಮೂರು ಪಾಳಿಯಲ್ಲಿ ಪರೀಕ್ಷೆ ನಡೆಸಲು ಯೋಜನೆ ರೂಪಿಸಲಾಗುತ್ತಿದೆ ಎಂದು ತಿಳಿಸಿದರು.

ಒಂದು ಹುದ್ದೆಗೆ ಸುಮಾರು 83 ಸ್ಪರ್ಧಿಗಳು ಇದ್ದಾರೆ ಎಂದು ಅಧಿಕಾರಿ ತಿಳಿಸಿದ್ದಾರೆ. ‘ಅರ್ಜಿದಾರರಲ್ಲಿ ಅಂದಾಜು 35 ಲಕ್ಷ ಪುರುಷರು ಮತ್ತು 15 ಲಕ್ಷ ಮಹಿಳೆಯರು ಅಂದರೆ, ಒಂದು ಹುದ್ದೆಗೆ ಪುರುಷ ವಿಭಾಗದಲ್ಲಿ 66 ಮತ್ತು ಮಹಿಳಾ ವಿಭಾಗದಲ್ಲಿ 125 ಸ್ಪರ್ಧಿಗಳಿದ್ದಾರೆ’ ಎಂದು ಅವರು ಹೇಳಿದರು.

ನೇಮಕಾತಿಯ ನಂತರ ಯುಪಿ ಪೊಲೀಸ್‌ನಲ್ಲಿ ಮಹಿಳಾ ಉದ್ಯೋಗಿಗಳ ಸಂಖ್ಯೆ ಅತ್ಯಧಿಕವಾಗಲಿದೆ ಎಂದೂ ಅವರು ಹೇಳಿದರು.

ಇಷ್ಟು ದೊಡ್ಡ ಪ್ರಮಾಣದಲ್ಲಿ ಪರೀಕ್ಷೆ ನಡೆಸುವುದು ದೊಡ್ಡ ಸವಾಲಾಗಿದೆ ಎಂದು ಅಧಿಕಾರಿ ಒಪ್ಪಿಕೊಂಡಿದ್ದಾರೆ. ಅಭ್ಯರ್ಥಿಗಳ ಸುಗಮ ಪ್ರಯಾಣವನ್ನು ಖಚಿತಪಡಿಸಿಕೊಳ್ಳಲು ಮಂಡಳಿಯು ರೈಲ್ವೆ ಮತ್ತು ರಸ್ತೆಮಾರ್ಗಗಳ ಅಧಿಕಾರಿಗಳೊಂದಿಗೆ ಸಭೆ ನಡೆಸುತ್ತದೆ. ‘ಸಾಲ್ವರ್ ಗ್ಯಾಂಗ್’ ತಡೆಯಲು ಜಾಗರೂಕರಾಗಿರುವಂತೆ ಎಸ್‌ಟಿಎಫ್ ಮತ್ತು ಜಿಲ್ಲಾ ಪೊಲೀಸರಿಗೆ ಅದು ಸೂಚನೆ ನೀಡಿದೆ.