ಮುಂಬೈ: ನ್ಯೂಜಿಲೆಂಡ್ ಕ್ರಿಕೆಟಿಗ ರಚಿನ್ ರವೀಂದ್ರ ಸದ್ಯ ವಿಶ್ವಕಪ್ ನಲ್ಲಿ ಅಗ್ರ ಬ್ಯಾಟಿಂಗ್ ಪ್ರದರ್ಶನ ನೀಡುತ್ತಿರುವ ಹೊತ್ತಿನಲ್ಲೇ ಅವರ ಹೆಸರಿನ ಕುರಿತು ಕತೆಯೊಂದು ಸೋಷಿಯಲ್‌ ಮೀಡಿಯಾದಲ್ಲಿ ಜನಪ್ರಿಯವಾಗಿದೆ. ಕ್ರಿಕೆಟಿಗರಾಗಿರುವ ರಚಿನ್ ತಂದೆ ರವಿ ಕೃಷ್ಣಮೂರ್ತಿ ಈ ವಿಚಾರದ ಕುರಿತು ಸ್ಪಷ್ಟನೆ ನೀಡಿದ್ದಾರೆ. ರಾಹುಲ್ ದ್ರಾವಿಡ್ ಮತ್ತು ಸಚಿನ್ ತೆಂಡೂಲ್ಕರ್ ಹೆಸರುಗಳನ್ನು ಬೆರೆಸಿ ರಚಿನ್ ಎಂದು ಹೆಸರಿಟ್ಟಿದ್ದು ಎನ್ನುವ ವಿಷಯವನ್ನು ರಚಿನ್ ತಂದೆ ರವಿ ಕೃಷ್ಣಮೂರ್ತಿ ನಿರಾಕರಿಸಿದ್ದಾರೆ.
ಭಾರತೀಯ ಮೂಲದ ರಚಿನ್ ರವೀಂದ್ರ ಪ್ರಸ್ತುತ ನ್ಯೂಜಿಲೆಂಡ್ ಪರ ಆಡುತ್ತಿದ್ದಾರೆ. ಅವರ ಅಜ್ಜ ಅಜ್ಜಿಯರು ಬೆಂಗಳೂರಿನಲ್ಲಿ ವಾಸಿಸುತ್ತಿದ್ದಾರೆ. ವಿಶ್ವಕಪ್ ವೇಳೆ ಅವರು ಅಜ್ಜಿಯ ಮನೆಗೆ ಹೋಗಿದ್ದರು. ಈ ಸಂದರ್ಭದಲ್ಲಿ ರಚಿನ್ ಅವರ ತಂದೆ ರವಿ ಕೃಷ್ಣಮೂರ್ತಿ ತಮ್ಮ ಮಗನ ಹೆಸರಿನ ಕುರಿತಾದ ಕುತೂಹಲಗಳನ್ನು ನಿವಾರಿಸಿದರು. ರಚಿನ್‌ಗೆ ದ್ರಾವಿಡ್ ಮತ್ತು ಸಚಿನ್ ಹೆಸರನ್ನು ಸೇರಿಸಿ ಇಟ್ಟಿಲ್ಲ ಎಂದಿದ್ದಾರೆ. ರಚಿನ್ ಹುಟ್ಟಿದಾಗ ಅವರ ಪತ್ನಿ ಈ ಹೆಸರನ್ನು ಸೂಚಿಸಿದ್ದು, ಆಗ ಆ ಬಗ್ಗೆ ಹೆಚ್ಚು ಚರ್ಚೆ ಮಾಡದೆ ಹೆಸರು ಫಿಕ್ಸ್ ಮಾಡಿದೆವು ಎಂದು ರವಿ ಕೃಷ್ಣಮೂರ್ತಿ ಹೇಳಿದ್ದಾರೆ.
ರಚಿನ್ ಹೆಸರು ಉಚ್ಚರಿಸಲು ಚೆನ್ನಾಗಿದೆ ಮತ್ತು ಚಿಕ್ಕದಾಗಿರುವುದರಿಂದ ಅದನ್ನು ಇಡಲು ನಿರ್ಧರಿಸಿದೆ, ಆದರೆ ಕೆಲವು ವರ್ಷಗಳ ನಂತರ ಅದು ರಾಹುಲ್ ಮತ್ತು ಸಚಿನ್ ಹೆಸರುಗಳ ಮಿಶ್ರಣವಾಗಿರುವುದು ಅವರ ಗಮನಕ್ಕೆ ಬಂತು. ತಾವು ಮಗನನ್ನು ಕ್ರಿಕೆಟಿಗನನ್ನಾಗಿ ಮಾಡುವ ಉದ್ದೇಶದಿಂದ ಹೆಸರಿಟ್ಟಿಲ್ಲ ಎಂದರು.
ಈ ಬಾರಿಯ ವಿಶ್ವಕಪ್ ಪಂದ್ಯದಲ್ಲಿ 9 ಇನ್ನಿಂಗ್ಸ್ ಆಡಿರುವ ರಚಿನ್ ಒಟ್ಟು 565 ರನ್ ಗಳಿಸಿದ್ದಾರೆ. ವಿಶ್ವಕಪ್‌ನಲ್ಲಿ ಅತಿ ಹೆಚ್ಚು ರನ್ ಮಾಡಿದ ಸ್ಕೋರರ್‌ ಅಗಿ ಮೂರನೇ ಸ್ಥಾನದಲ್ಲಿ ಮುಂದುವರಿದಿದ್ದಾರೆ. ಅವರ ಇನ್ನಿಂಗ್ಸ್‌ನಲ್ಲಿ ಮೂರು ಶತಕ ಮತ್ತು ಎರಡು ಅರ್ಧ ಶತಕಗಳು ಸೇರಿದ್ದವು. ಅವರು 70.62 ಸರಾಸರಿಯಲ್ಲಿ ಸ್ಕೋರ್ ಮಾಡುತ್ತಿದ್ದಾರೆ.
