ಅಪರಾಧ ಘಟನೆಗೆ ಕೋಮು ಬಣ್ಣ ಬಳಿದ ಆರೋಪ: ನವಿಕಾ ಕುಮಾರ್‌ ನಿರೂಪಣೆಯ ವಿಡಿಯೋ ಹಿಂಪಡೆಯುವಂತೆ ಆದೇಶಿಸಿದ NBDSA

ಹೊಸದೆಹಲಿ: ಗುಜರಾತಿನಲ್ಲಿ ನಡೆದಿದ್ದ ಘಟನೆಯೊಂದಕ್ಕೆ ಸಂಬಂಧಿಸಿದಂತೆ ನಡೆದ ಸುದ್ದಿಯನ್ನು ಬಿತ್ತರಿಸುವಾಗ ನಿರ್ದಿಷ್ಟ ಸಮುದಾಯವೊಂದನ್ನು ಗುರಿಯಾಗಿಸಿಕೊಂಡು ಸುದ್ದಿಯನ್ನು ನಿರೂಪಸಿದ್ದಕ್ಕಾಗಿ NBDSA ಟೌಮ್ಸ್‌ ನೌ ನವಭಾರತ್‌ ಟೈಮ್ಸ್‌ ವಾಹಿನಿಗೆ ಛೀಮಾರಿ ಹಾಕಿದೆ. ಜೊತೆಗೆ ಒಂದು ವಾರದ ಒಳಗೆ ಪ್ರಸ್ತುತ ಘಟನೆಗೆ ಸಂಬಂಧಿಸಿದ ವಿಡಿಯೋವನ್ನು ಅದರ ವೆಬ್ಸೈಟ್‌ ಮತ್ತು YoutTube ವೇದಿಕೆಯಿಂದ ತೆಗೆದುಹಾಕುವಂತೆ ಆದೇಶಿಸಿದೆ.

ಟೈಮ್ಸ್‌ ನೌ ನಿರೂಪಕಿ ನವಿಕಾ ಕುಮಾರ್‌ 2022ರ ನವೆಂಬರ್‌ ತಿಂಗಳ 29ನೇ ತಾರೀಖಿನಂದು ಗುಜರಾತಿನಲ್ಲಿ ಗರ್ಬಾ ನೃತ್ಯದ ವೇಳೆ ಹುಡುಗಿಯರ ಫೋಟೊ ತೆಗೆದರೆಂದು ತಕರಾರು ತೆಗೆದು ಮುಸ್ಲಿಂ ಯುವಕರನ್ನು ಬಜರಂಗದಳದ ಸದಸ್ಯರು ಥಳಿಸಿದ ಕುರಿತು ಕಾರ್ಯಕ್ರಮ ನಡೆಸಿಕೊಟ್ಟಿದ್ದರು. ಈ ಕಾರ್ಯಕ್ರಮದ ವೇಳೆ ಆಕೆ ಮುಸ್ಲಿಂ ಸಮುದಾಯವನ್ನು ಟಾರ್ಗೆಟ್‌ ಮಾಡಿ ಕಾರ್ಯಕ್ರಮ ಮಾಡಿದ್ದಾರೆಂದು ಆರೋಪಿಸಿ ಟೆಕ್ ಎಥಿಕ್ಸ್ ಪ್ರೊಫೆಷನಲ್ ಇಂದ್ರಜೀತ್ ಘೋರ್ಪಡೆ ಅವರು ದೂರು ಸಲ್ಲಿಸಿದ್ದರು.

ವಾಹಿನಿ ಸುದ್ದಿ ಮಾನದಂಡಗಳನ್ನು ಉಲ್ಲಂಘಿಸಿ ಘಟನೆಗೆ ಕೋಮು ಬಣ್ಣ ನೀಡಿದ್ದಲ್ಲದೆ, ಮುಸ್ಲಿಂ ಸಮುದಾಯವನ್ನು ಅಪರಾಧಿಗಳು ಎನ್ನುವಂತೆ ಚಿತ್ರಿಸಿದೆ ಎಂದು ಅವರ ದೂರಿದ್ದರು. ಅವರೊಂದಿಗೆ ಈ ಕುರಿತು ಮತೀನ್ ಮುಜಾವರ್ ಎಂಬುವರು ಮತ್ತೊಂದು ದೂರನ್ನು ದಾಖಲಿಸಿದ್ದರು.

ದೂರನ್ನು ಸ್ವೀಕರಿಸಿದ ನ್ಯೂಸ್ ಬ್ರಾಡ್‌ಕಾಸ್ಟಿಂಗ್ ಮತ್ತು ಡಿಜಿಟಲ್ ಸ್ಟ್ಯಾಂಡರ್ಡ್ಸ್ ಅಥಾರಿಟಿ (NBDSA) ದೂರುದಾರರ ಅಭಿಪ್ರಾಯವನ್ನು ಒಪ್ಪಿದ್ದು, Times Navbharat channel ಸುದ್ದಿಗಳಿಗೆ ಕೋಮು ಬಣ್ಣ ನೀಡುವುದನ್ನು ನಿಲ್ಲಿಸಬೇಕು ಆದೇಶಿಸಿದೆ.

ಆದರೆ ತನ್ನ ಕಾರ್ಯಕ್ರಮವನ್ನು ಸಮರ್ಥಿಸಿಕೊಂಡಿದ್ದ ವಾಹಿನಿ ತಾನು ಮಹಿಳಾ ಸುರಕ್ಷತೆಯ ಕುರಿತಾಗಿ ಕಾರ್ಯಕ್ರಮ ಮಾಡಿದ್ದೆ ಎಂದು ಸಮರ್ಥಿಸಿಕೊಂಡಿದೆ. ದೂರಿನಲ್ಲಿರುವ ವಿಷಯಗಳು ನಮ್ಮ ಕಾರ್ಯಕ್ರಮದ ವ್ಯಾಪ್ತಿಯ ಆಚೆಗಿವೆ ಮತ್ತು ಆಧಾರ ರಹಿತವಾಗಿವೆ ಎಂದೂ ಅದು ಸಮರ್ಥಿಸಿಕೊಂಡಿತ್ತು.

ಆದರೆ NBDSA ವಾಹಿನಿಯ ವಾದವನ್ನು ತಳ್ಳಿಹಾಕಿ ಒಂದು ವಾರದೊಳಗೆ ವಾಹಿನಿ ವೆಬ್ಸೈಟ್‌ ಹಾಗೂ ಯೂಟ್ಯೂಬಿನಿಂದ ವರದಿಗಳನ್ನು ತೆಗೆದುಹಾಕಿರುವುದನ್ನು ಖಚಿತಪಡಿಸಬೇಕು ಎಂದು ಆದೇಶಿಸಿದೆ. ಜೊತೆಗೆ ವಾಹಿನಿಯು ತಾನು ಮಹಿಳಾ ಸುರಕ್ಷತೆಯ ಕುರಿತಾಗಿ ಕಾರ್ಯಕ್ರಮ ಮಾಡಿದ್ದೆ ಎಂದು ಹೇಳಿಕೊಂಡಿದೆ ಆದರೆ ಅದು ಕಾರ್ಯಕ್ರಮದಲ್ಲಿ ಆ ವಿಷಯದಿಂದ ಹೊರಳಿ ಘಟನೆಗೆ ಕೋಮು ಬಣ್ಣ ನೀಡಿದೆ ಎಂದು NBDSA ಹೇಳಿದೆ.

NBDSA ಆದೇಶವನ್ನು ಇಲ್ಲಿ ಓದಬಹುದು.