ನಾನು ದೇವಸ್ಥಾನಕ್ಕೆ ಹೋದ ದಿನ ಮಾಂಸ ತಿಂದಿರಲಿಲ್ಲ: ವಿವಾದ ಮತ್ತು ವಾಗ್ದಾಳಿಗಳಿಗೆ ಸಿದ್ದರಾಮಯ್ಯ ಸ್ಪಷ್ಟನೆ

ಬೆಂಗಳೂರು: ಇತ್ತೀಚೆಗೆ ಮಾಂಸಾಹಾರ ಸೇವಿಸಿ ದೇವಸ್ಥಾನಕ್ಕೆ ಹೋಗಿ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದ ಆರೋಪದ ಮೇಲೆ ಬಿಜೆಪಿಯಿಂದ ದಾಳಿ ನಡೆದಿದ್ದು, ಆ ದಿನ ನಾನು ಮಾಂಸಾಹಾರ ಸೇವಿಸಿಲ್ಲ ಎಂದು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮಂಗಳವಾರ ಸ್ಪಷ್ಟಪಡಿಸಿದ್ದಾರೆ.

ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನಿಜ ಹೇಳಬೇಕೆಂದರೆ ನಾನು ಆ ದಿನ ಮಾಂಸವನ್ನು ಸೇವಿಸಲಿಲ್ಲ. ಕೋಳಿ ಕರಿ ಇದ್ದರೂ, ನಾನು ಬಿದಿರು ಚಿಗುರು ಕರಿ ಮತ್ತು ‘ಅಕ್ಕಿ ರೊಟ್ಟಿ’ ಮಾತ್ರ ತಿನ್ನುತ್ತಿದ್ದೆ ಎಂದು ಹೇಳಿದರು.

ನನ್ನ ಪ್ರಕಾರ ಇದು ಸಮಸ್ಯೆಯೇ ಅಲ್ಲ. ಅನೇಕರು ಮಾಂಸವನ್ನು ತಿನ್ನದೆ ಹೋಗುತ್ತಾರೆ ಮತ್ತು ಅನೇಕರು ತಿಂದ ನಂತರ ಹೋಗುತ್ತಾರೆ. ಅನೇಕ ಸ್ಥಳಗಳಲ್ಲಿ, ದೇವತೆಗಳಿಗೆ ಮಾಂಸವನ್ನು ಅರ್ಪಿಸಲಾಗುತ್ತದೆ. ಆದರೆ ಮಾಂಸಾಹಾರ ಸೇವಿಸಿ ಪ್ರವೇಶಿಸಿದ ಆರೋಪ ವಿವಾದಕ್ಕೆ ಕಾರಣವಾಗಿದೆ. ಇದನ್ನು ʼಸಮಸ್ಯೆಯಲ್ಲʼ ಎಂದು ಕರೆದ ಮಾಜಿ ಮುಖ್ಯಮಂತ್ರಿ ಆಹಾರದ ಆಯ್ಕೆಯ ಹಕ್ಕನ್ನು ಪ್ರತಿಪಾದಿಸಲು ಪ್ರಯತ್ನಿಸಿದರು. ಇದರ ನಡುವೆಯು ನೀವು ಮಾಂಸ ತಿಂದು ದೇವಸ್ಥಾನಕ್ಕೆ ಹೋಗಿದ್ದು ನಿಜವೋ? ಸುಳ್ಳೋ? ಎಂದು ಮಾಧ್ಯಮದವರು ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಸಿದ್ದರಾಮಯ್ಯ, ದೇವಸ್ಥಾನಕ್ಕೆ ಭೇಟಿ ನೀಡುವ ಮೊದಲು ದೇವರು ಏನು ತಿನ್ನಬೇಕು ಮತ್ತು ಏನು ಮಾಡಬಾರದು ಎಂದು ಹೇಳಿದ್ದಾನೆಯೇ ಎಂದು ಪ್ರಶ್ನಿಸಿದರು.

ಮಾಂಸ ತಿನ್ನುವುದು ಸಮಸ್ಯೆಯೇ? ಒಬ್ಬರು ಏನು ತಿನ್ನುತ್ತಾರೆ ಎಂಬುದು ವೈಯಕ್ತಿಕ ಆಹಾರ ಪದ್ಧತಿಯಾಗಿದೆ. ನಾನು ಮಾಂಸ ಮತ್ತು ಸಸ್ಯಾಹಾರ ಎರಡನ್ನೂ ತಿನ್ನುತ್ತೇನೆ, ಅದು ನನ್ನ ಅಭ್ಯಾಸ. ಕೆಲವರು ಮಾಂಸ ತಿನ್ನುವುದಿಲ್ಲ, ಅದು ಅವರ ಆಹಾರ ಪದ್ಧತಿ ಎಂದು ಸಿದ್ದರಾಮಯ್ಯ ಹೇಳಿದರು.

ಬಿಜೆಪಿಗೆ ಬೇರೆ ಕೆಲಸವಿಲ್ಲ, ಹೀಗಾಗಿ ವಿವಾದ ಸೃಷ್ಟಿಸಿ ಜನರ ಗಮನವನ್ನು ಮುಖ್ಯ ಸಮಸ್ಯೆಗಳಿಂದ ಬೇರೆಡೆಗೆ ಸೆಳೆಯಲು ಯತ್ನಿಸುತ್ತಿದೆ ಎಂದರು.

ಮಾಂಸಾಹಾರ ಸೇವಿಸಿ ದೇವಸ್ಥಾನಕ್ಕೆ ಭೇಟಿ ನೀಡಿದ ಕಾಂಗ್ರೆಸ್ ಶಾಸಕಾಂಗ ಪಕ್ಷದ ನಾಯಕನ ಕೃತ್ಯಕ್ಕೆ ಆಡಳಿತಾರೂಢ ಬಿಜೆಪಿ ನಾಯಕರಿಂದ ತೀವ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಹಿರಿಯ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್, ಹಂದಿ ಮಾಂಸ ತಿಂದು ಮಸೀದಿಗೆ ಹೋಗಿ ಎಂದು ಸವಾಲ್‌ ಹಾಕಿದ್ದರು. ಈ ಸವಾಲು ಮತ್ತು ದಾಳಿಗೆ ಪ್ರತಿಕ್ರಿಯಿಸಿದ ಸಿದ್ದರಾಮಯ್ಯ, ನಾನು ಚಿಕನ್ ಮತ್ತು ಮಟನ್ ಮಾತ್ರ ತಿನ್ನುತ್ತೇನೆ, ಬೇರೆ ಯಾವುದೇ ಮಾಂಸ (ಹಂದಿ ಅಥವಾ ಗೋಮಾಂಸ) ತಿನ್ನುವುದಿಲ್ಲ. ಆದರೆ ಅದನ್ನು ತಿನ್ನುವವರ ಆಹಾರದ ಅಭ್ಯಾಸವನ್ನು ನಾನು ವಿರೋಧಿಸುವುದಿಲ್ಲ ಅದು ಅವರ ಆಹಾರ ಪದ್ಧತಿ  ಎಂದು ಉತ್ತರಿಸಿದರು.

ಚುನಾವಣೆ ಸಮೀಪಿಸುತ್ತಿರುವ ಸಂದರ್ಭದಲ್ಲಿ ದೇವಸ್ಥಾನ, ಮಠಗಳಿಗೆ ಭೇಟಿ ನೀಡುವ ನಾಟಕವಾಡುತ್ತಿದ್ದಾರೆ ಎಂದು ಆರೋಪಿಸಿರುವ ರಾಜ್ಯ ಬಿಜೆಪಿ ಅಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಹೇಳಿಕೆಗೆ ಪ್ರತಿಕ್ರಿಯಿಸಿದ ಸಿದ್ದರಾಮಯ್ಯ, ನಾನು ದೇವಸ್ಥಾನಗಳಿಗೆ ಭೇಟಿ ನೀಡುತ್ತೇನೆ ಮತ್ತು ದೇವರ ಏಕತೆಯನ್ನು ನಂಬುತ್ತೇನೆ ಎಂದು ಹೇಳಿದರು.