ಹಂಗೇರಿಯನ್ ಲೇಖಕನಿಗೆ ನೋಬೆಲ್ ಗೌರವ: ಪ್ರತಿಷ್ಠಿತ ಸಾಹಿತ್ಯ ಪುರಸ್ಕಾರವನ್ನು ಮುಡಿಗೇರಿಸಿಕೊಂಡ ಲಾಸ್ಲೋ ಕ್ರಾಸ್ನಾಹೋರ್ಕೈ

ಸಾಹಿತ್ಯ ಕ್ಷೇತ್ರದಲ್ಲಿ ಮಾಡಿದ ವಿಶಿಷ್ಟ ಸೇವೆಗಾಗಿ ಹಂಗೇರಿಯನ್ ಲೇಖಕ ಲಾಸ್ಲೋ ಕ್ರಾಸ್ನಾಹೋರ್ಕೈ ಅವರಿಗೆ ಈ ವರ್ಷದ ನೋಬೆಲ್ ಬಹುಮಾನ ಲಭಿಸಿದೆ. ಅವರ ಅದ್ಭುತ ಮತ್ತು ದಾರ್ಶನಿಕ ಬರಹಗಳಿಗಾಗಿ ಈ ಪ್ರತಿಷ್ಠಿತ ಬಹುಮಾನವನ್ನು ನೀಡಲಾಗಿದೆ ಎಂದು ನೋಬೆಲ್ ಸಮಿತಿ ಘೋಷಿಸಿದೆ.

ಕ್ರಾಸ್ನಾಹೋರ್ಕೈ ಅವರು ಮಧ್ಯ ಯುರೋಪಿಯನ್ ಪರಂಪರೆಯಲ್ಲಿ ಶ್ರೇಷ್ಠ ಮಹಾಕಾವ್ಯದ (epic) ಲೇಖಕರಾಗಿ ಪ್ರಸಿದ್ಧರಾಗಿದ್ದಾರೆ. 1954 ರಲ್ಲಿ ಹಂಗೇರಿಯ ಗ್ಯುಲಾ ಎಂಬ ಸಣ್ಣ ಪಟ್ಟಣದಲ್ಲಿ ಜನಿಸಿದ ಇವರು, 1985 ರಲ್ಲಿ ತಮ್ಮ ಮೊದಲ ಕಾದಂಬರಿ ‘ಸಾಟಾನ್‌ಟಾಂಗೋ’ ಮೂಲಕ ವಿಶ್ವ ಸಾಹಿತ್ಯದಲ್ಲಿ ಸಂಚಲನ ಮೂಡಿಸಿದರು.

ಅವರು 2015 ರಲ್ಲಿ ಮ್ಯಾನ್ ಬೂಕರ್ ಅಂತರರಾಷ್ಟ್ರೀಯ ಪ್ರಶಸ್ತಿ ಮತ್ತು 2019 ರಲ್ಲಿ ನ್ಯಾಷನಲ್ ಬುಕ್ ಅವಾರ್ಡ್ ಸೇರಿದಂತೆ ಹಲವಾರು ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ. ಅವರ ಪ್ರಸಿದ್ಧ ಕಾದಂಬರಿಗಳಾದ ‘ಸಾಟಾನ್‌ಟಾಂಗೋ’ ಮತ್ತು ‘ದಿ ಮೆಲನ್ಕೋಲಿ ಆಫ್ ರೆಸಿಸ್ಟೆನ್ಸ್’ ಚಲನಚಿತ್ರಗಳಾಗಿಯೂ ನಿರ್ಮಾಣಗೊಂಡಿವೆ.

ಸ್ವೀಡನ್‌ನ ರಸಾಯನಶಾಸ್ತ್ರಜ್ಞ ಆಲ್‌ಫ್ರೆಡ್ ನೋಬೆಲ್ ಅವರ ಸ್ಮರಣಾರ್ಥ ನೀಡಲಾಗುವ ಈ ಪ್ರತಿಷ್ಠಿತ ಬಹುಮಾನವು ವಿಜೇತರಿಗೆ 11 ಮಿಲಿಯನ್ ಸ್ವೀಡಿಷ್ ಕ್ರೋನರ್ (ಸುಮಾರು $1.2 ಮಿಲಿಯನ್), 18 ಕ್ಯಾರೆಟ್ ಚಿನ್ನದ ಪದಕ ಮತ್ತು ಡಿಪ್ಲೊಮಾವನ್ನು ಒಳಗೊಂಡಿದೆ.

ಈ ವರ್ಷದ ವಿಜೇತರಿಗೆ ಡಿಸೆಂಬರ್ 10 ರಂದು ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಗುವುದು. ಈಗಾಗಲೇ ಈ ವರ್ಷದ ಭೌತಶಾಸ್ತ್ರ, ರಸಾಯನಶಾಸ್ತ್ರ ಮತ್ತು ವೈದ್ಯಕೀಯ ವಿಭಾಗಗಳ ವಿಜೇತರನ್ನು ಘೋಷಿಸಲಾಗಿದೆ.