ದಿಟ್ಟಿ

ನೋಡಲ್ಲಿ ಚೆಲುವಾಗಿ ಹರವಾಗಿ ಮೈಯ

ಹರಡಿಕೊಂಡು ನಳನಳಿಸುತಿದೆ ಅಶೋಕ!

ಏರಿದ್ದು ಸಾಕೆಂದು

ಕತ್ತರಿಸಿ ಹೀಗಿಂದು

ರೂಪಿಸಿದೆ ನೋಡೀ ಲೋಕ!

ಎಂಥ ಅರಸಿಕಳು ನೀ

ಚೆಲುವಿಗೆ ಸೊಗಸಿಗೆ ಹೀಗೆ

ಇಡಬಹುದೇ ಕೊಡಲಿ?

ಚೆಲುವಿನ ಮಾತಲ್ಲ ತೆಗಿ

ಯಾರು ತುಂಬಿದರು ಅದ

ಎಲ್ಲಿದೆಯದು, ನಿನ್ನದೇ

ಸುತ್ತ ನೋಡಿ ಕಲಿತದ್ದೇ ಮತ್ತಾರೋ ತುಂಬಿದ್ದೇ?

ಕಚಕಚನೆ ಕತ್ತರಿಸಿ

ಕೊಟ್ಟು ತನ್ನ ಕಲ್ಪನೆಯ

ವಿಕಾರವ ಆಕಾರವೆಂದರೆ

ಅಕ್ಕು ಅಕ್ಕು ಎನಬಹುದೇ

ಯಾರಿಗಾಗಿಯೋ ಯಾಕೆ ಅಶೋಕ ಬಾಗಬೇಕು ತಲೆ ನೀಡಬೇಕು?

ತಂದೆಯಲ್ಲ ಎಲ್ಲಿಂದಲೋ ವಾದ

ನೆಮ್ಮದಿಯ ಕೆಡಿಸೋ ಸಂವಾದ

ಯಾಕೆ ಈ ಪರಿಯ ಗಲಿಬಿಲಿ

ಹೊರಳಿ ನೋಡೊಮ್ಮೆ

ಕೈ ತೋರಿದರೆ ಸಾಕು ಇರಬೇಕು

ಮನೆ ಒಳಗೋ ಹೊರಗೋ

ಬೀದಿಗೋ ಗಾದಿಗೋ ಒಪ್ಪಿದರೆ

ಅನುಕ್ರಮಣ ಒಪ್ಪದಿರೆ ಅತಿಕ್ರಮಣ

ಸನ್ನೆಗಳ ಮೀರದಿರೆ ಒಂದು

ಮೀರಿದರೆ ಮತ್ತೊಂದು

ಗಡಿ ತೋರುವರು ಗುಳಿ ತೋಡುವರು

ಬಿದ್ದರೆ ನಗುವರು ಎದ್ದರೆ ಸಿಡಿವರು

ತಲೆಬಾಗಿ ನಡುಬಾಗಿ ಬಾಗುವುದೇ

ಹಿತವೆಂದು ಇಲ್ಲದಿರೆ ಹತವಾದೇವೆಂದು

ತೊಟ್ಟು ಮೆರೆದುದ ಮರೆವುದೇ