ಕನ್ನಡಿಗರೇ ಕ್ಷಮಿಸಿ, ಕ್ಷಮಿಸಿ, ಕ್ಷಮಿಸಿ… ಅಂಗಲಾಚಿದ ಪ್ರಶಾಂತ್‌ ಸಂಬರ್ಗಿ
ಲಿಂಕ್ ನಕಲಿಸಲಾಗಿದೆ ✓
ಬಿಡದಿ: ಬಿಗ್‌ ಬಾಸ್‌ ಶೋನಲ್ಲಿ ಕನ್ನಡ ಹೋರಾಟಗಾರರನ್ನು ಕೀಳಾಗಿ ನಿಂದಿಸಿದ್ದ ಸ್ಪರ್ಧಿ ಪ್ರಶಾಂತ್‌ ಸಂಬರ್ಗಿ ಎಂಬಾತ ಕನ್ನಡಿಗರ ಕ್ಷಮೆ ಯಾಚಿಸಿದ್ದಾನೆ.
ಕನ್ನಡಪರ ಹೋರಾಟಗಾರ ಮತ್ತು ಮತ್ತೋರ್ವ ಸ್ಪರ್ಧಿ ರೂಪೇಶ್‌ ರಾಜಣ್ಣ ಅವರೊಂದಿಗಿನ ಸಂಭಾಷಣೆ ಸಂದರ್ಭದಲ್ಲಿ ಕಳೆದ ಮಂಗಳವಾರ ಸಂಬರ್ಗಿ ಆಡಿದ್ದ ಮಾತುಗಳು ಕನ್ನಡಪರ ಹೋರಾಟಗಾರರನ್ನು ಕೆರಳಿಸಿದ್ದವು. ಈ ಸಂಬಂಧ ಬಿಗ್‌ ಬಾಸ್‌ ಸ್ಪರ್ಧೆ ನಡೆಯುತ್ತಿರುವ ಇಲ್ಲಿನ ಇನ್ನೋವೇಟಿವ್‌ ಫಿಲ್ಮ್‌ ಸಿಟಿ ಸಮೀಪ ಕನ್ನಡಪರ ಹೋರಾಟಗಾರರು ಆಹೋರಾತ್ರಿ ಧರಣಿ ನಡೆಸುತ್ತಿದ್ದಾರೆ.
ಪರಿಸ್ಥಿತಿ ಕೈ ಮೀರುತ್ತಿರುವುದನ್ನು ಗಮನಿಸಿದ ಬಿಗ್‌ ಬಾಸ್‌ ಶೋ ನಿರ್ಮಾಪಕರು ಬಿಗ್‌ ಬಾಸ್‌ ಶೋನ ಕನ್ಫೆಷನ್‌ ರೂಮಿಗೆ ಕರೆಸಿ, ಸಂಬರ್ಗಿ ಮಾತುಗಳು ಸೃಷ್ಟಿಸಿರುವ ವಿವಾದಗಳ ಕುರಿತು ವಿವರಿಸಿದರು.
ಕನ್ನಡ ಹೋರಾಟಗಾರರ ಕುರಿತು ನೀವು ಆಡಿರುವ ಮಾತು ಮತ್ತು ಅದರ ಧಾಟಿ ಭಾಷೆಯನ್ನು ಪ್ರೀತಿಸುವ ಅನೇಕರಿಗೆ ನೋವನ್ನುಂಟು ಮಾಡಿದೆ. ಭಾಷೆಯ ಪರವಾಗಿ ನಿಲ್ಲುವ ಅನೇಕ ಪ್ರಾಮಾಣಿಕ ಕನ್ನಡಿಗರು ನಮ್ಮ ನಡುವೆ ಇದ್ದಾರೆ ಎಂಬುದು ನಿಮ್ಮ ಅರಿವಿನಲ್ಲಿದೆ ಎಂದು ಬಿಗ್‌ ಬಾಸ್‌ ಭಾವಿಸುತ್ತಾರೆ ಎಂದು ಪ್ರಶಾಂತ್‌ ಸಂಬರ್ಗಿಗೆ ಹೇಳಲಾಯಿತು.
ಇದಕ್ಕೆ ಪ್ರತಿಕ್ರಿಯಿಸಿದ ಸಂಬರ್ಗಿ, ಮಾತಿನ ಭರದಲ್ಲಿ ಕನ್ನಡಪರ ಹೋರಾಟಗಾರರನ್ನು ನಿಂದಿಸಿದ್ದೇನೆ. ಅದಕ್ಕಾಗಿ ಕರ್ನಾಟಕದ ಜನತೆಯಲ್ಲಿ ಕ್ಷಮೆ ಕೇಳುತ್ತೇನೆ. ನನ್ನಿಂದ ತಪ್ಪಾಗಿದೆ. ನನಗೆ ಪಶ್ಚಾತ್ತಾಪವಾಗುತ್ತಿದೆ. ದಯವಿಟ್ಟು ಕ್ಷಮೆ ಇರಲಿ, ಕ್ಷಮೆ ಇರಲಿ, ಕ್ಷಮೆ ಇರಲಿ ಎಂದು ಅಂಗಲಾಚಿರುವ ವಿಡಿಯೋವನ್ನು ಕಲರ್ಸ್‌ ಕನ್ನಡ ಬಿಡುಗಡೆ ಮಾಡಿದೆ.
Peepal Media
Peepal Media · ಅಂಕಣ ವಿಭಾಗ
