ಪಾಕಿಸ್ತಾನಕ್ಕೆ ರಹಸ್ಯ ಮಾಹಿತಿ ಸೋರಿಕೆ ಮಾಡಿದ MEA ಉದ್ಯೋಗಿ ನವೀನ್‌ ಪಾಲ್ ಬಂಧನ

ನವದೆಹಲಿ: ಪಾಕಿಸ್ತಾನಕ್ಕೆ ರಹಸ್ಯ ದಾಖಲೆಗಳನ್ನು ಪೂರೈಸಿದ ಆರೋಪದ ಮೇಲೆ ವಿದೇಶಾಂಗ ಸಚಿವಾಲಯದ ಉದ್ಯೋಗಿಯನ್ನು ಉತ್ತರ ಭಾರತದ ಗಾಜಿಯಾಬಾದ್‌ ನಗರದಲ್ಲಿ ಬಂಧಿಸಲಾಗಿದೆ.

ಆರೋಪಿಯು ಜಿ 20 ಶೃಂಗಸಭೆಗೆ ಸಂಬಂಧಿಸಿದ ವಿವರಗಳನ್ನು ಪಾಕಿಸ್ತಾನ ಮೂಲದ್ದು ಎಂದು ಶಂಕಿಸಲಾದ ಮೊಬೈಲ್ ಸಂಖ್ಯೆಗೆ ಕಳುಹಿಸಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಆರೋಪಿಯನ್ನು ಗಾಜಿಯಾಬಾದ್‌ ನಗರದ ಭೀಮ್ ನಗರ ನಿವಾಸಿ ನವೀನ್ ಪಾಲ್ (27) ಎಂದು ಗುರುತಿಸಲಾಗಿದೆ. ಈತನು ಭಾರತ ಸರ್ಕಾರದ ವಿದೇಶಾಂಗ ಸಚಿವಾಲಯದಲ್ಲಿ ಗುತ್ತಿಗೆ ಆಧಾರದಡಿ ಮಲ್ಟಿ ಟಾಸ್ಕಿಂಗ್ ಸ್ಟಾಫ್ (ಎಂಟಿಎಸ್) ಆಗಿ ಉದ್ಯೋಗದಲ್ಲಿದ್ದ.

ಆರೋಪಿ ನವೀನ್‌ ಪಾಲ್‌ ಬಂಧನವು ಅಧಿಕಾರಿಗಳಿಗೆ ಸುಳಿವು ದೊರೆತ ನಂತರ, ಸೋಮವಾರ ಸಂಜೆ 7 ಗಂಟೆ ಸುಮಾರಿಗೆ ನಡೆದಿದೆ.

“ಆರೋಪಿಯು ಕೇಂದ್ರ ವಿದೇಶಾಂಗ ಸಚಿವಾಲಯದಲ್ಲಿ ಗುತ್ತಿಗೆ ಕಾರ್ಮಿಕನಾಗಿದ್ದು, ಮಲ್ಟಿ ಟಾಸ್ಕಿಂಗ್ ಸಿಬ್ಬಂದಿಯಾಗಿ ಕೆಲಸ ಮಾಡುತ್ತಿದ್ದಾನೆ. ಅವನ ಮೊಬೈಲ್ ಸಂಖ್ಯೆಯಿಂದ ಮತ್ತೊಂದು ಮೊಬೈಲ್ ಸಂಖ್ಯೆಗೆ ಅನುಮಾನಾಸ್ಪದ ಸಂದೇಶಗಳನ್ನು ಕಳುಹಿಸಲಾಗಿದೆ. ಮತ್ತು ಈ ಸಂಖ್ಯೆಯೊಂದಿಗೆ ಗೌಪ್ಯ ದಾಖಲೆಗಳನ್ನು ಹಂಚಿಕೊಂಡಿದ್ದಾನೆ ಹಾಗೂ ಪ್ರತಿಯಾಗಿ ಆರೋಪಿ ಆನ್ ಲೈನ್ ಮೂಲಕ ಹಣವನ್ನು ಸ್ವೀಕರಿಸಿದ್ದಾನೆ” ಎಂದು ಗಾಜಿಯಾಬಾದ್ ಡಿಸಿಪಿ ಶುಭಂ ಪಟೇಲ್ ಸುದ್ದಿ ಸಂಸ್ಥೆಯೊಂದಕ್ಕೆ ತಿಳಿಸಿದ್ದಾರೆ.

“ಪಾಲ್‌ ರಹಸ್ಯ ದಾಖಲೆಗಳನ್ನು ಯಾರೊಂದಿಗೋ ಹಂಚಿಕೊಳ್ಳುತ್ತಿರುವ ಮಾಹಿತಿ ನಮಗೆ ದೊರಕಿತ್ತು. ಈ ಹಿನ್ನೆಲೆಯಲ್ಲಿ ನಾವು ಆತನನ್ನು ವಶಕ್ಕೆ ಪಡೆದುಕೊಂಡು ತನಿಖೆ ನಡೆಸಿದ್ದೇವೆ. ಅವನು ಹಣವನ್ನು ಪಡೆದು ಕೆಲವು ದಾಖಲೆಗಳನ್ನು ಅಪರಿಚಿತ ಮೂಲದೊಡನೆ ಹಂಚಿಕೊಂಡಿರುವುದು ಆತನ ಫೋನ್‌ ಮೂಲಕ ಪತ್ತೆಯಾಗಿದೆ” ಎಂದು  ಪಟೇಲ್ ಹೇಳಿದರು.

ತನಿಖೆಯ ಸಮಯದಲ್ಲಿ ಆರೋಪಿಯ ಫೋನಿನಲ್ಲಿ “ಅಂಜಲಿ ಕೊಲ್ಕತ್ತಾ” ಎಂದು ಸೇವ್‌ ಮಾಡಿಕೊಂಡಿದ್ದ ನಂಬರ್‌ ಪೊಲೀಸರಿಗೆ ದೊರಕಿದೆ. ಇದು ಪಾಕಿಸ್ತಾನದ ಸಂಖ್ಯೆ ಎಂದು ಶಂಕಿಸಲಾಗಿದೆ. ಇದಲ್ಲದೆ, 61 ಪುಟಗಳ ಅಧಿಕೃತ ದಾಖಲೆಯನ್ನು ಸಹ ವಶಪಡಿಸಿಕೊಳ್ಳಲಾಗಿದ್ದು, ಆತನ ಬ್ಯಾಂಕ್ ವಹಿವಾಟುಗಳನ್ನು ಪರಿಶೀಲಿಸಲಾಗಿದೆ. ಹಣಕ್ಕೆ ಬದಲಾಗಿ ರಹಸ್ಯ ಮಾಹಿತಿಯನ್ನು ವರ್ಗಾಯಿಸಿ, ಪ್ರತಿ ದಾಖಲೆಗೆ 8,000 ರೂ.ಗಳಿಂದ 10,000 ರೂ.ಗಳವರೆಗೆ ತೆಗೆದುಕೊಂಡಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಪಾಲ್ ತನ್ನ ಫೋನಿನಲ್ಲಿ “ಮಹಿಳೆಗೆ” ಸೂಕ್ಷ್ಮ ಮಾಹಿತಿಯನ್ನು ಸೋರಿಕೆ ಮಾಡಿರಬಹುದು ಮತ್ತು ಈ ಮೂಲಕ ರಾಷ್ಟ್ರೀಯ ಭದ್ರತೆಗೆ ಅಪಾಯವನ್ನುಂಟು ಮಾಡಿರಬಹುದು ಮತ್ತು ಇತರ ದೇಶಗಳೊಂದಿಗಿನ ಭಾರತದ ಸಂಬಂಧಕ್ಕೆ ಹಾನಿ ಮಾಡಿರಬಹುದು ಎಂದು ಪೊಲೀಸರು ಅಭಿಪ್ರಾಯಪಟ್ಟಿದ್ದಾರೆ.

ಪುಣೆ ಮೂಲದ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ವಿಜ್ಞಾನಿ ಪ್ರದೀಪ್ ಕುರುಲ್ಕರ್ ವಿರುದ್ಧ ಮಹಾರಾಷ್ಟ್ರದ ಭಯೋತ್ಪಾದನಾ ನಿಗ್ರಹ ದಳ (ಎಟಿಎಸ್) ಚಾರ್ಜ್‌ಶೀಟ್ ಸಲ್ಲಿಸಿದ ಕೆಲವೇ ದಿನಗಳ ನಂತರ ಗಾಜಿಯಾಬಾದ್ ಪೊಲೀಸರು ನವೀನ್ ಪಾಲ್ ಅನ್ನು ಬಂಧಿಸಿದ್ದಾರೆ.