ಐದು ದಶಕಗಳ ಬಳಿಕ ಭಾರತದಲ್ಲಿ ಕಮ್ಯುನಿಸ್ಟ್ ಆಡಳಿತದ ಅಂತ್ಯ: ಎಡಪಕ್ಷಗಳಿಗೆ ಐತಿಹಾಸಿಕ ಹಿನ್ನಡೆ

ಕೇರಳ : ಕೇರಳದಲ್ಲಿ ಎಡಪಕ್ಷಗಳ ಸೋಲಿನೊಂದಿಗೆ ಭಾರತ ರಾಜಕೀಯದಲ್ಲಿ ಮಹತ್ವದ ತಿರುವು ಉಂಟಾಗಿದ್ದು, ಐದು ದಶಕಗಳ ಬಳಿಕ ದೇಶದಲ್ಲಿ ಕಮ್ಯುನಿಸ್ಟ್ ಮುಖ್ಯಮಂತ್ರಿಗಳಿಲ್ಲದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಪಶ್ಚಿಮ ಬಂಗಾಳದಲ್ಲಿ 1977ರಿಂದ 2011ರವರೆಗೆ ಎಡಪಕ್ಷಗಳು ದೀರ್ಘಕಾಲ ಆಡಳಿತ ನಡೆಸಿದ್ದವು. ತ್ರಿಪುರದಲ್ಲಿ 1993ರಿಂದ 2018ರವರೆಗೆ ಎಡಪಕ್ಷ ಸರ್ಕಾರ ಮುಂದುವರಿದಿತ್ತು. ಕೇರಳದಲ್ಲಿ ಪ್ರತಿ ಐದು ವರ್ಷಗಳಿಗೊಮ್ಮೆ ಅಧಿಕಾರ ಬದಲಾವಣೆಯ ಸಂಪ್ರದಾಯ ಇದ್ದರೂ, 2021ರಲ್ಲಿ ಅದನ್ನು ಮುರಿದು ಎಡಪಕ್ಷಗಳು ಮತ್ತೆ ಅಧಿಕಾರಕ್ಕೆ ಬಂದಿದ್ದವು. ಆದರೆ ಇದೀಗ ಆ ಕೊನೆಯ ಕೋಟೆಯೂ ಕುಸಿದಿದೆ.

ಪಶ್ಚಿಮ ಬಂಗಾಳದಲ್ಲಿ ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್ 34 ವರ್ಷಗಳ ಎಡಪಕ್ಷ ಆಡಳಿತಕ್ಕೆ ತೆರೆ ಎಳೆದಿತ್ತು. ತ್ರಿಪುರದಲ್ಲಿ 2018ರಲ್ಲಿ ಬಿಜೆಪಿ ಅಚ್ಚರಿ ಜಯ ಸಾಧಿಸಿ ಎಡಪಕ್ಷಗಳನ್ನು ಸೋಲಿಸಿತು ಹಾಗೂ 2023ರಲ್ಲಿ ಅದನ್ನೇ ಪುನರಾವರ್ತಿಸಿತು. ಇದೀಗ ಕೇರಳದಲ್ಲೂ ಎಡಪಕ್ಷಗಳ ಸೋಲು ಅವರ ರಾಜಕೀಯ ಬಲಕ್ಕೆ ಮತ್ತೊಂದು ಹೊಡೆತ ನೀಡಿದೆ.

ಕೊನೆಯ ಕೋಟೆ ಕುಸಿತ
ಪಿಣರಾಯಿ ವಿಜಯನ್ ನೇತೃತ್ವದ ಎಡ ಪ್ರಜಾತಾಂತ್ರಿಕ ಮುಂಚೂಣಿ (ಎಲ್‌ಡಿಎಫ್) ಸರ್ಕಾರ 2016ರಲ್ಲಿ ಅಧಿಕಾರಕ್ಕೇರಿದ್ದು, ಇದು ದೇಶದಲ್ಲಿನ ಕೊನೆಯ ಕಮ್ಯುನಿಸ್ಟ್ ಆಡಳಿತವಾಗಿತ್ತು. ಅದರ ಸೋಲಿನೊಂದಿಗೆ 1977ರಿಂದ ಮುಂದುವರಿದ ಕಮ್ಯುನಿಸ್ಟ್ ಮುಖ್ಯಮಂತ್ರಿಗಳ ಯುಗ ಅಂತ್ಯಗೊಂಡಿದೆ.

ಇದರಿಂದ ಎಡಪಕ್ಷಗಳ ರಾಷ್ಟ್ರೀಯ ರಾಜಕೀಯದಲ್ಲಿ ಪ್ರಭಾವ ಕುಗ್ಗುವ ಸಾಧ್ಯತೆ ಹೆಚ್ಚಿದೆ. ಪಶ್ಚಿಮ ಬಂಗಾಳ, ಕೇರಳ ಮತ್ತು ತ್ರಿಪುರ ರಾಜ್ಯಗಳೇ ಎಡಪಕ್ಷಗಳ ಬಲದ ಪ್ರಮುಖ ಕೇಂದ್ರಗಳಾಗಿದ್ದವು. ಆದರೆ ಈಗ ಈ ಮೂರು ರಾಜ್ಯಗಳಿಂದ ಕೇವಲ ಒಬ್ಬ ಸಂಸದ ಮಾತ್ರ ಉಳಿದಿರುವುದು ಗಮನಾರ್ಹ.

ಯುಪಿಎ ಯುಗದ ಬಳಿಕ ಕುಸಿತದ ಹಾದಿ
2004ರ ಲೋಕಸಭಾ ಚುನಾವಣೆಯಲ್ಲಿ ಎಡಪಕ್ಷಗಳು ತಮ್ಮ ಶಿಖರವನ್ನು ತಲುಪಿದ್ದವು. ಒಟ್ಟು 59 ಸ್ಥಾನಗಳನ್ನು ಗೆದ್ದು ಪ್ರಮುಖ ರಾಜಕೀಯ ಶಕ್ತಿಯಾಗಿ ಹೊರಹೊಮ್ಮಿದ್ದವು. ಸಿಪಿಎಂ ಮಾತ್ರವೇ 43 ಸಂಸದರನ್ನು ಹೊಂದಿತ್ತು. ಯುಪಿಎ-1 ಸರ್ಕಾರದ ಅವಧಿಯಲ್ಲಿ ಎಡಪಕ್ಷಗಳು ಮಹತ್ವದ ಪಾತ್ರವಹಿಸಿ, ಸರ್ಕಾರದ ಹಲವು ನೀತಿಗಳ ಮೇಲೆ ಪ್ರಭಾವ ಬೀರಿದ್ದವು. ವಿಶೇಷವಾಗಿ ಇಂಡೋ-ಅಮೆರಿಕಾ ಅಣು ಒಪ್ಪಂದ ಸೇರಿದಂತೆ ಹಲವು ಆರ್ಥಿಕ ನಿರ್ಧಾರಗಳಿಗೆ ವಿರೋಧ ವ್ಯಕ್ತಪಡಿಸಿದ್ದವು.

ಆದರೆ 2009ರ ಲೋಕಸಭಾ ಚುನಾವಣೆಯಲ್ಲಿ ಎಡಪಕ್ಷಗಳ ಬಲ ಕುಸಿದು 24 ಸ್ಥಾನಗಳಿಗೆ ಇಳಿಯಿತು. 2014ರಲ್ಲಿ ಅದು 10ಕ್ಕೆ ಮತ್ತು 2019ರಲ್ಲಿ ಕೇವಲ 5ಕ್ಕೆ ಇಳಿದಿತು. ಪ್ರಸ್ತುತ ಲೋಕಸಭೆಯಲ್ಲಿ ಸಿಪಿಎಂ ಮತ್ತು ಸಿಪಿಐ ಸೇರಿ 6 ಸಂಸದರು ಇದ್ದಾರೆ. ಸಿಪಿಐ(ಎಂಎಲ್) ಲಿಬರೇಶನ್ ಪಕ್ಷದ 2 ಸಂಸದರು ಬಿಹಾರದಿಂದ ಆಯ್ಕೆಯಾಗಿದ್ದಾರೆ.

ಈ ಪೈಕಿ ಸಿಪಿಎಂ-ಸಿಪಿಐ ಸಂಸದರಲ್ಲಿ ನಾಲ್ವರು ತಮಿಳುನಾಡಿನಲ್ಲಿ ಡಿಎಂಕೆ ಬೆಂಬಲದಿಂದ ಮತ್ತು ಒಬ್ಬರು ರಾಜಸ್ಥಾನದಲ್ಲಿ ಕಾಂಗ್ರೆಸ್ ಬೆಂಬಲದಿಂದ ಗೆದ್ದಿದ್ದಾರೆ.