“ಗಂಗಾನದಿಯಲ್ಲಿ ಮಾಡಿಸಿದಂತೆ ಯಮುನೆಯಲ್ಲಿ ಫೋಟೋಶೂಟ್ ಮಾಡಿಸಲು ಸಾಧ್ಯವೇ” : ಪ್ರಧಾನಿ ಮೋದಿಗೆ ಮಮತಾ ಬ್ಯಾನರ್ಜಿ ಸವಾಲು

ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಪ್ರಧಾನಿ ನರೇಂದ್ರ ಮೋದಿಗೆ ನೇರ ಸವಾಲು ಹಾಕಿದ್ದಾರೆ. ಹೌರಾದಲ್ಲಿ ನಡೆದ ಚುನಾವಣಾ ಸಭೆಯಲ್ಲಿ ಮಾತನಾಡಿದ ಅವರು, ಪ್ರಧಾನಿ ಕೋಲ್ಕತ್ತಾದ ಹೂಗ್ಲಿ ನದಿಯಲ್ಲಿ ದೋಣಿ ವಿಹಾರ ಆನಂದಿಸಿದ ವಿಷಯವನ್ನು ಉಲ್ಲೇಖಿಸಿ, “ನಮ್ಮ ಗಂಗಾ ಶುದ್ಧವಾಗಿದೆ, ಅದಕ್ಕಾಗಿಯೇ ಪ್ರಧಾನಿ ದೋಣಿ ವಿಹಾರ ಆನಂದಿಸಬಹುದು. ಅದೇ ರೀತಿ ದೆಹಲಿಯ ಯಮುನಾ ನದಿಯಲ್ಲಿ ಸ್ನಾನ ಮಾಡಲು ಸಾಧ್ಯವೇ?” ಎಂದು ಕೇಳಿದರು.

ಪ್ರಧಾನಿ ಮೋದಿ ಅವರ ಬೆಳಗಿನ ದೋಣಿ ವಿಹಾರ ಕಾರ್ಯಕ್ರಮವನ್ನು ‘ಫೋಟೋ-ಶಾಪಿಂಗ್’ ಮತ್ತು ‘ಚುನಾವಣಾ ರಾಜಕೀಯ’ ಎಂದು ಬಣ್ಣಿಸಿದ ಮಮತಾ, “ನೀವು ಗಂಗಾ ನದಿಯಲ್ಲಿ ದೋಣಿ ವಿಹಾರ ಮಾಡಿದ್ದೀರಿ, ಸ್ವಾಗತ. ಆದರೆ ನಾನು ನಿಮಗೆ ಸವಾಲು ಹಾಕುತ್ತೇನೆ — ದೆಹಲಿಯ ಯಮುನಾಗೆ ಹೋಗಿ ಸ್ನಾನ ಮಾಡಿ” ಎಂದು ಸ್ಪಷ್ಟ ಸವಾಲು ಹಾಕಿದರು. ನಂತರ ಬಂದರು ಪ್ರದೇಶದಲ್ಲಿ ನಡೆದ ರ್ಯಾಲಿಯಲ್ಲೂ ಮಾತನಾಡಿದ ಅವರು, “ಬಂಗಾಳದ ಗಂಗಾ ಮತ್ತು ದೆಹಲಿಯ ಯಮುನಾ ನಡುವೆ ಹೋಲಿಕೆ ಮಾಡಿ ನೋಡಿ. ಇದು ರಾಜಕೀಯ ಲಾಭಕ್ಕಾಗಿ ತೆಗೆದ ಛಾಯಾಚಿತ್ರವಷ್ಟೇ” ಎಂದರು.

ಝಾರ್‌ಗ್ರಾಮ್ ಝಲ್-ಮುರಿ: ‘ಪೂರ್ವ ನಿಯೋಜಿತ ನಾಟಕ’ ಎಂದ ಮಮತಾ
ಝಾರ್‌ಗ್ರಾಮ್‌ನಲ್ಲಿ ಪ್ರಧಾನಿ ಝಲ್-ಮುರಿ ತಿಂದ ಪ್ರಸಂಗವನ್ನು ‘ಸಂಪೂರ್ಣ ನಾಟಕೀಯ ನಡೆ’ ಎಂದ ಮಮತಾ, “ಆ ಝಲ್-ಮುರಿಯನ್ನು ಮೊದಲೇ ಸಿದ್ಧಪಡಿಸಲಾಗಿತ್ತು. ಅಂಗಡಿಯೊಳಗೆ ಕ್ಯಾಮೆರಾಗಳನ್ನು ಅಳವಡಿಸಲಾಗಿತ್ತು. ಅವರು ಜೇಬಿನಲ್ಲಿ ೧೦ ರೂಪಾಯಿ ನೋಟು ಒಯ್ಯುತ್ತಾರೆ ಎಂದು ನಂಬಲು ಸಾಧ್ಯವೇ?” ಎಂದು ಹೇಳಿದರು. ಜೊತೆಗೆ ಮೋದಿ ಅವರಿಗೆ ಸ್ನೇಹ ಭಾವದ ಆಹ್ವಾನ ನೀಡಿದ ಅವರು, “ನಿಮಗೆ ಬಂಗಾಳ ಎಂದರೆ ತುಂಬಾ ಇಷ್ಟವಾದರೆ, ಮೀನು-ಅನ್ನ ರುಚಿ ನೋಡಿ. ನಾನೇ ಅಡುಗೆ ಮಾಡಿ ಬಡಿಸುತ್ತೇನೆ” ಎಂದರು.

ಅಭಿಷೇಕ್: ‘ಮೋದಿ ಬಂಗಾಳ ಪ್ರವಾಸೋದ್ಯಮದ ಬ್ರಾಂಡ್ ರಾಯಭಾರಿ’
ತೃಣಮೂಲ ಕಾಂಗ್ರೆಸ್‌ನ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಅಭಿಷೇಕ್ ಬ್ಯಾನರ್ಜಿ ಅವರು ಪ್ರಧಾನಿ ಮೋದಿ ಅವರನ್ನು ‘ಬಂಗಾಳದ ಪ್ರವಾಸೋದ್ಯಮದ ಅತಿದೊಡ್ಡ ಬ್ರಾಂಡ್ ರಾಯಭಾರಿ’ ಎಂದು ವ್ಯಂಗ್ಯದಿಂದ ಕರೆದರು. “ಅವರು ಚುನಾವಣೆ ಸಮಯದಲ್ಲಿ ಮಾತ್ರ ಏಕೆ ಬರುತ್ತಾರೆ? ವರ್ಷಪೂರ್ತಿ ಬಂಗಾಳಕ್ಕೆ ಬಂದು ಇಲ್ಲಿನ ರುಚಿಕರ ಖಾದ್ಯಗಳನ್ನು ಆನಂದಿಸಿ” ಎಂದರು. ಪ್ರಧಾನಿ ಝಲ್-ಮುರಿ ತಿಂದ ಸ್ಥಳ ಝಾರ್‌ಗ್ರಾಮ್ ಪುರಸಭೆ ನಿರ್ಮಿಸಿದ್ದು, ಮುರಿ ಮಾರಾಟಗಾರ ಬಿಹಾರ ಮೂಲದವನಾಗಿದ್ದು ಜೀವನೋಪಾಯಕ್ಕಾಗಿ ಬಂಗಾಳಕ್ಕೆ ಬಂದಿರುವುದಾಗಿ ಹೇಳಿಕೊಂಡಿರುವ ಅಂಶವನ್ನು ಅಭಿಷೇಕ್ ಉಲ್ಲೇಖಿಸಿ, “ಅವರು ತಮ್ಮ ಸ್ವಂತ ಸುಳ್ಳುಗಳನ್ನೇ ಬಹಿರಂಗಪಡಿಸುತ್ತಿದ್ದಾರೆ” ಎಂದು ಟೀಕಿಸಿದರು.