ಬಾಲ್ಯದಲ್ಲಿ ರಾಮಾಯಣ ಓದುತ್ತಿದ್ದೆ, ಅದೇ ನನ್ನ ವ್ಯಕ್ತಿತ್ವ ರೂಪಿಸಿದ್ದು: ನಟ ಮೋಹನ್ ಲಾಲ್ ಜೊತೆ ಸಿಎಂ ವಿಜಯನ್ ಮಾತು

ತಮ್ಮ ಪೋಷಕರು ದೈವಭಕ್ತರಾಗಿದ್ದರು ಮತ್ತು ತಾವು ರಾಮಾಯಣದಂತಹ ಮಹಾಕಾವ್ಯಗಳನ್ನು ಓದುತ್ತಾ ಬೆಳೆದಿದ್ದು, ಇದು ತಮ್ಮ ವ್ಯಕ್ತಿತ್ವವನ್ನು ರೂಪಿಸಲು ಸಹಾಯ ಮಾಡಿದೆ ಎಂದು ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಹೇಳಿದ್ದಾರೆ. ನಟ ಮೋಹನ್ ಲಾಲ್ ಅವರೊಂದಿಗೆ ನಡೆಸಿದ ಒಂದು ಗಂಟೆಯ ಸುದೀರ್ಘ ಸಂದರ್ಶನದಲ್ಲಿ ಸಿಪಿಎಂ ಹಿರಿಯ ನಾಯಕ ವಿಜಯನ್ ಅವರು ಈ ವಿಷಯಗಳನ್ನು ಹಂಚಿಕೊಂಡಿದ್ದಾರೆ.

ವಿಧಾನಸಭಾ ಚುನಾವಣೆ ಹತ್ತಿರ ಬರುತ್ತಿರುವ ಸಮಯದಲ್ಲಿ ರಾಜ್ಯ ಸರ್ಕಾರದ ಮಾಹಿತಿ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯು ಈ ಸಂದರ್ಶನವನ್ನು ಹೊರತಂದಿದ್ದು, ಇದು ವಿಜಯನ್ ಅವರ ವರ್ಚಸ್ಸನ್ನು ಹೆಚ್ಚಿಸುವ ಪ್ರಯತ್ನ ಎಂದು ವಿಶ್ಲೇಷಿಸಲಾಗುತ್ತಿದೆ.

ಬಾಲ್ಯದಲ್ಲಿ ತಾಯಿ ತಮಗಾಗಿ ಜಾನಪದ ಹಾಡುಗಳನ್ನು ಹಾಡುತ್ತಿದ್ದರು ಮತ್ತು ತಾವು ಓದಲು ಕಲಿತ ನಂತರ ಅವರಿಗಾಗಿ ರಾಮಾಯಣ, ಮಹಾಭಾರತ ಹಾಗೂ ಕೃಷ್ಣನ ಹಾಡುಗಳನ್ನು ಓದುತ್ತಿದ್ದೆ ಎಂದು ವಿಜಯನ್ ನೆನಪಿಸಿಕೊಂಡಿದ್ದಾರೆ. ಇಂತಹ ಓದುಗಳು ತಮ್ಮ ವ್ಯಕ್ತಿತ್ವದ ಮೇಲೆ ಪ್ರಭಾವ ಬೀರಿದ್ದು, ತಮ್ಮಲ್ಲಿ ಸನ್ಯಾಸದ ಕೆಲವು ಗುಣಗಳನ್ನು ಬೆಳೆಸಿವೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಇದೇ ಕಾರಣಕ್ಕೆ ತಾವು ಇರುವುದರಲ್ಲೇ ಸಂತೋಷವಾಗಿರುವುದಾಗಿ ಮತ್ತು ಯಾವುದರ ಬಗ್ಗೆಯೂ ಹೆಚ್ಚಿನ ಆಸೆ ಹೊಂದಿಲ್ಲ ಎಂದು ಅವರು ತಿಳಿಸಿದ್ದಾರೆ. ಇದೇ ಸಂದರ್ಭದಲ್ಲಿ ಅವರು ದೇವರು ಜನರ ಮನಸ್ಸಿನಲ್ಲಿ ನೆಲೆಸಿದ್ದಾನೆ ಎಂಬ ಅರ್ಥ ನೀಡುವ ಉಪನಿಷತ್ತಿನ ಸಾಲುಗಳನ್ನು ಕೂಡ ಉಲ್ಲೇಖಿಸಿದ್ದಾರೆ.

ತಮ್ಮ ಬಾಲ್ಯದ ದಿನಗಳ ಬಗ್ಗೆ ಮಾತನಾಡುತ್ತಾ, ಅಂದು ತಮ್ಮ ಪ್ರದೇಶದಲ್ಲಿ ವಿದ್ಯುತ್ ಇಲ್ಲದ ಕಾರಣ ದೆವ್ವ-ಭೂತಗಳೆಂದರೆ ತಮಗೆ ತುಂಬಾ ಭಯವಿತ್ತು ಎಂದು ವಿಜಯನ್ ಹೇಳಿದ್ದಾರೆ. ಆದರೆ ಓದು ಬೆಳೆದಂತೆ ಅಂತಹ ಭಯಗಳಿಂದ ಹೊರಬಂದಿದ್ದಾಗಿ ತಿಳಿಸಿದ ಅವರು, 1970ರಲ್ಲಿ ಮೊದಲ ಬಾರಿಗೆ ಶಾಸಕರಾದಾಗಲೂ ತಮ್ಮ ಮನೆಯಲ್ಲಿ ವಿದ್ಯುತ್ ಸಂಪರ್ಕವಿರಲಿಲ್ಲ ಎಂಬ ಆಸಕ್ತಿದಾಯಕ ವಿಷಯವನ್ನು ಹಂಚಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ, ಅಂದು ಹೆಚ್ಚಿನವರು ಪ್ರಾಥಮಿಕ ಹಂತದಲ್ಲೇ ಓದು ನಿಲ್ಲಿಸುತ್ತಿದ್ದ ಕಾಲದಲ್ಲಿ ತಮ್ಮ ತಾಯಿ ತಮಗೆ ಕಾಲೇಜು ಶಿಕ್ಷಣದವರೆಗೆ ಓದಲು ಬೆಂಬಲ ನೀಡಿದ್ದನ್ನು ಅವರು ಸ್ಮರಿಸಿದ್ದಾರೆ.

ತಮ್ಮನ್ನು ಒಬ್ಬ ‘ಹಠಮಾರಿ’ ವ್ಯಕ್ತಿ ಎಂದು ಬಿಂಬಿಸಲಾಗುತ್ತಿರುವ ಬಗ್ಗೆ ಪ್ರತಿಕ್ರಿಯಿಸಿದ ವಿಜಯನ್, ಇದು ಒಂದು ರೀತಿಯ ಬ್ರ್ಯಾಂಡಿಂಗ್ ಮಾಡುವ ಪ್ರಯತ್ನ ಅಷ್ಟೇ ಎಂದು ತಳ್ಳಿಹಾಕಿದ್ದಾರೆ. ಮಾಧ್ಯಮಗಳಲ್ಲಿ ಬರುವ ನೆಗೆಟಿವ್ ವರದಿಗಳ ಬಗ್ಗೆ ತಮಗೆ ತಲೆನೋವಿಲ್ಲ ಮತ್ತು ಮನಸ್ಸು ಸ್ವಚ್ಛವಾಗಿದ್ದಾಗ ಯಾವುದೇ ಆರೋಪಗಳನ್ನು ನಗುನಗುತ್ತಾ ಎದುರಿಸಬಹುದು ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಸಂದರ್ಶನದ ಕೊನೆಯಲ್ಲಿ, ಹಳೆಯ ರಾಜಕೀಯ ವೈಷಮ್ಯದ ಬಗ್ಗೆ ಮಾತನಾಡುತ್ತಾ, ಹೆಸರಾಂತ ರಾಜಕಾರಣಿಯೊಬ್ಬರು ತಮ್ಮ ಮಕ್ಕಳನ್ನು ಕಿಡ್ನ್ಯಾಪ್ ಮಾಡಲು ಸಂಚು ರೂಪಿಸಿದ್ದರು ಎಂಬ ಗಂಭೀರ ವಿಷಯವನ್ನೂ ಅವರು ಉಲ್ಲೇಖಿಸಿದ್ದಾರೆ.