ರಾಜ್ಯಸಭಾ ಸದಸ್ಯ ರಾಘವ್ ಚಡ್ಡಾ ಅವರು ಆಮ್ ಆದ್ಮಿ ಪಕ್ಷ (AAP) ತ್ಯಜಿಸಿ ಭಾರತೀಯ ಜನತಾ ಪಕ್ಷ (ಬಿಜೆಪಿ)ಗೆ ಸೇರ್ಪಡೆಯಾದ ಕೇವಲ ಒಂದು ದಿನದ ಅವಧಿಯಲ್ಲಿ ಅವರ ಇನ್ಸ್ಟಾಗ್ರಾಂ ಫಾಲೋವರ್ಸ್ ಸಂಖ್ಯೆ ತೀವ್ರವಾಗಿ ಕುಸಿದಿದ್ದು, ಇದು ಸಾಮಾಜಿಕ ಮಾಧ್ಯಮ ಜಗತ್ತಿನಲ್ಲಿ ದೊಡ್ಡ ಸುದ್ದಿಯಾಗಿದೆ.
ಬಿಜೆಪಿ ಸೇರ್ಪಡೆಯ ಮೊದಲು 1.41 ಕೋಟಿ ಅನುಯಾಯಿಗಳನ್ನು ಹೊಂದಿದ್ದ ಚಡ್ಡಾ ಅವರ ಇನ್ಸ್ಟಾ ಖಾತೆ, ೨೪ ಗಂಟೆಗಳ ಅವಧಿಯಲ್ಲಿ 1.28 ಕೋಟಿಗೆ ಇಳಿದಿದೆ. ಅಂದರೆ ಒಂದೇ ರಾತ್ರಿಯಲ್ಲಿ ಸುಮಾರು 13 ಲಕ್ಷಕ್ಕೂ ಹೆಚ್ಚು ಜನರು ಅವರನ್ನು ಅನ್ಫಾಲೋ ಮಾಡಿದ್ದಾರೆ.
"ನಿನ್ನಲ್ಲಿ ಭವಿಷ್ಯದ ಪ್ರಧಾನಿಯನ್ನು ನೋಡಿದ್ದೇವೆ… ನೀನು ನಮ್ಮನ್ನು ಮೋಸ ಮಾಡಿದ್ದೀಯ" : ಇನ್ಸ್ಟಾಗ್ರಾಂ ಬಳಕೆದಾರರ ಕಮೆಂಟ್ಯುವಜನರ ಆಕ್ರೋಶ
ಚಡ್ಡಾ ಅವರ ರಾಜಕೀಯ ನಿರ್ಧಾರಕ್ಕೆ ಸಾಮಾಜಿಕ ಮಾಧ್ಯಮದಲ್ಲಿ ತೀವ್ರ ವಿರೋಧ ವ್ಯಕ್ತವಾಗಿದೆ. ಇನ್ಸ್ಟಾಗ್ರಾಂನಲ್ಲಿ ಸಾವಿರಾರು ಮಂದಿ ಅವರ ಪೋಸ್ಟ್ಗಳ ಕೆಳಗೆ ತಮ್ಮ ನಿರಾಶೆ ಮತ್ತು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಅನ್ಫಾಲೋ ಮಾಡೋಣ” ಎಂಬ ಕರೆಯೂ ವ್ಯಾಪಕವಾಗಿ ಹರಡಿದ್ದು, ಅದರ ಪರಿಣಾಮ ನೇರವಾಗಿ ಫಾಲೋವರ್ಸ್ ಸಂಖ್ಯೆಯಲ್ಲಿ ಕಾಣುತ್ತಿದೆ.
ಪೋಸ್ಟ್ ಅಳಿಸಿದ ಆರೋಪ
AAP ಹಿರಿಯ ನಾಯಕ ಸೌರಭ್ ಭಾರದ್ವಾಜ್ ಅವರು ಚಡ್ಡಾ ವಿರುದ್ಧ ಗಂಭೀರ ಆರೋಪ ಹೊರಿಸಿದ್ದಾರೆ. ಬಿಜೆಪಿ ಸೇರ್ಪಡೆಗೆ ಮೊದಲು ಚಡ್ಡಾ ಅವರು ಪ್ರಧಾನಿ ನರೇಂದ್ರ ಮೋದಿ ಮತ್ತು ಬಿಜೆಪಿ ವಿರುದ್ಧ ಮಾಡಿದ್ದ ಪೋಸ್ಟ್ಗಳನ್ನು ತಮ್ಮ ಅಕೌಂಟ್ನಿಂದ ಅಳಿಸಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ. ಇದನ್ನು ಭಾರದ್ವಾಜ್ “ರಾಜಕೀಯ ಇಮೇಜ್ ತೊಳೆದುಕೊಳ್ಳುವ ಪ್ರಯತ್ನ” ಎಂದು ಟೀಕಿಸಿದ್ದಾರೆ.
ಆದರೆ ಚಡ್ಡಾ ಈ ಆರೋಪಗಳನ್ನು ಬಲವಾಗಿ ತಳ್ಳಿಹಾಕಿದ್ದಾರೆ. “ಇದು ಸಂಪೂರ್ಣ ಸುಳ್ಳು ಮತ್ತು ನನ್ನ ವಿರುದ್ಧ ನಡೆಯುತ್ತಿರುವ ಸಂಘಟಿತ ಸಂಚು” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಚಡ್ಡಾ ಏಕೆ ಜನಪ್ರಿಯರಾಗಿದ್ದರು?
ರಾಘವ್ ಚಡ್ಡಾ ಅವರು ಯಾವಾಗಲೂ ಸಾಮಾನ್ಯ ಜನರ ಸಮಸ್ಯೆಗಳನ್ನು ಧ್ವನಿಗೂಡಿಸಿದ ಕಾರಣ ಯುವಜನರ ಪ್ರೀತಿಪಾತ್ರ ನಾಯಕರಾಗಿದ್ದರು. ಅವರು ಮಾತನಾಡುತ್ತಿದ್ದ ವಿಷಯಗಳು:
* ವಿಮಾನ ನಿಲ್ದಾಣಗಳಲ್ಲಿ ದುಬಾರಿ ಆಹಾರ ಮತ್ತು ಗ್ರಾಹಕ ಶೋಷಣೆ
* ಮಧ್ಯಮ ವರ್ಗಕ್ಕೆ ತೆರಿಗೆ ಹೊರೆ ಮತ್ತು ಅನ್ಯಾಯ
* ಡೆಲಿವರಿ ಕಾರ್ಮಿಕರ ಕಷ್ಟ ಮತ್ತು ಹಕ್ಕುಗಳು
* ಮೊಬೈಲ್ ರೀಚಾರ್ಜ್ ದರ ಏರಿಕೆ ವಿರುದ್ಧ ಪ್ರತಿಭಟನೆ
ಡೇಟಾ ಆಧಾರಿತ, ಶಾಂತ ಮತ್ತು ಸಮಾಲೋಚನಾ ಶೈಲಿಯ ಭಾಷಣಗಳಿಂದ ಅವರು “ಜಗಳ ಮಾಡುವ ರಾಜಕಾರಣಿ”ಯಲ್ಲ, ಬದಲಾಗಿ “ಸಮಸ್ಯೆ ಪರಿಹರಿಸುವ ನಾಯಕ” ಎಂಬ ಹೆಸರು ಗಳಿಸಿದ್ದರು. ಈ ಇಮೇಜ್ಗೆ ಈಗ ಭಾರಿ ಧಕ್ಕೆಯಾಗಿದೆ.
AAP ಒಳಜಗಳ ಹಿನ್ನೆಲೆ
ಇತ್ತೀಚಿನ ತಿಂಗಳುಗಳಲ್ಲಿ AAP ಒಳಗೆ ಚಡ್ಡಾ ಅವರ ಸ್ಥಾನಮಾನ ದುರ್ಬಲಗೊಳ್ಳುತ್ತಿತ್ತು. ಭಗವಂತ್ ಮಾನ್, ಸಂಜಯ್ ಸಿಂಗ್ ಸೇರಿದಂತೆ ಹಿರಿಯ ನಾಯಕರು ಅವರು ಪಕ್ಷದ ಮಾರ್ಗದಿಂದ ದೂರ ಹೋಗಿದ್ದಾರೆ ಎಂದು ಟೀಕಿಸಿದ್ದರು. ಕೊನೆಗೆ ಅವರನ್ನು ಪಕ್ಷದ ಉಪ ನಾಯಕ ಸ್ಥಾನದಿಂದ ತೆಗೆದುಹಾಕಲಾಗಿತ್ತು. ಈ ಹಿನ್ನೆಲೆಯಲ್ಲಿ ಚಡ್ಡಾ ಅವರ ಜೊತೆ ಇನ್ನೂ ಆರು AAP ರಾಜ್ಯಸಭಾ ಸದಸ್ಯರು ಬಿಜೆಪಿ ಸೇರ್ಪಡೆಯಾಗಿದ್ದಾರೆ. ಈ ಬೆಳವಣಿಗೆ AAP ಪಕ್ಷಕ್ಕೆ ಭಾರಿ ಹಿನ್ನಡೆಯಾಗಿದ್ದು, ಮುಂದಿನ ದಿನಗಳಲ್ಲಿ ಈ ರಾಜಕೀಯ ಬದಲಾವಣೆಯ ಪರಿಣಾಮ ಏನಾಗುತ್ತದೆ ಎಂಬ ಕುತೂಹಲ ವ್ಯಾಪಕವಾಗಿದೆ.
