ಮಹಾರಾಷ್ಟ್ರ: ಮಲಗಿದ್ದ ಕಾರ್ಮಿಕರ ‘ಶೆಡ್’ ಮೇಲೆ ಟ್ರಕ್‌ನಿಂದ ಮರಳು ಬಿದ್ದು 5 ಕಾರ್ಮಿಕರ ಸಾವು

ಮಹಾರಾಷ್ಟ್ರದ ಜಲ್ನಾದಲ್ಲಿ ನಿರ್ಮಾಣ ಸ್ಥಳದಲ್ಲಿ ಕಾರ್ಮಿಕರಿಗಾಗಿ ನಿರ್ಮಿಸಲಾಗಿದ್ದ ತಾತ್ಕಾಲಿಕ ‘ಶೆಡ್’ ಮೇಲೆ ಟ್ರಕ್‌ನಿಂದ ಮರಳು ಬಿದ್ದು, ಅಪ್ರಾಪ್ತ ವಯಸ್ಕ ಸೇರಿದಂತೆ ಐವರು ಕಾರ್ಮಿಕರು ಸಾವನ್ನಪ್ಪಿದ್ದಾರೆ.

ಪೊಲೀಸರು ಈ ಕುರಿತು ಮಾಹಿತಿ ನೀಡಿದ್ದಾರೆ.

ಈ ಸಂಬಂಧ ಅಧಿಕಾರಿಯೊಬ್ಬರು ಮಾತನಾಡಿ, ಜಾಫ್ರಾಬಾದ್ ತಹಸಿಲ್‌ನ ಪಸೋಡಿ-ಚಂದೋಲ್‌ನಲ್ಲಿರುವ ಸೇತುವೆ ಯೋಜನಾ ಸ್ಥಳದಲ್ಲಿ ಮುಂಜಾನೆ ಈ ಘಟನೆ ನಡೆದಿದೆ ಎಂದರು.

ನಿರ್ಮಾಣ ಸ್ಥಳದಲ್ಲಿ ಕಾರ್ಮಿಕರು ತಾತ್ಕಾಲಿಕ ಶೆಡ್‌ನಲ್ಲಿ ಮಲಗಿದ್ದರು ಎಂದು ಅವರು ಹೇಳಿದರು. ಆಗ ಚಾಲಕ ಮರಳು ತುಂಬಿದ ಟಿಪ್ಪರ್ ಲಾರಿಯೊಂದಿಗೆ ಅಲ್ಲಿಗೆ ಬಂದು, ತಿಳಿಯದೆ ಎಲ್ಲಾ ಮರಳನ್ನು ಶೆಡ್ ಮೇಲೆ ಸುರಿದನು. ಇದರಿಂದಾಗಿ ಕಾರ್ಮಿಕರು ಅದರ ಕೆಳಗೆ ಹೂತುಹೋದರು.

ಮೂಲಗಳ ಪ್ರಕಾರ, ಮರಳಿನ ಭಾರದಿಂದಾಗಿ ಶೆಡ್ ಕುಸಿದು ಬಿದ್ದಿದ್ದು, ನಂತರ ಟ್ರಕ್ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದಾನೆ.

ಅವಶೇಷಗಳಡಿಯಿಂದ ಒಬ್ಬ ಹುಡುಗಿ ಮತ್ತು ಮಹಿಳೆಯನ್ನು ರಕ್ಷಿಸಲಾಗಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ಚಾಲಕನನ್ನು ಪತ್ತೆ ಹಚ್ಚಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಅವರು ಹೇಳಿದರು.

ಮೃತರನ್ನು ಸಿಲ್ಲೋದ್ ತೆಹ್ಸಿಲ್‌ನ ಗೋಲೆಗಾಂವ್ ನಿವಾಸಿಗಳಾದ ಗಣೇಶ್ ಧನ್ವಾಯಿ (60) ಮತ್ತು ಅವರ ಪುತ್ರ ಭೂಷಣ್ ಧನ್ವಾಯಿ (16) ಮತ್ತು ಜಾಫರಾಬಾದ್ ತೆಹ್ಸಿಲ್‌ನ ಪದ್ಮಾವತಿ ನಿವಾಸಿ ಸುನಿಲ್ ಸಪ್ಕಲ್ (20) ಎಂದು ಗುರುತಿಸಲಾಗಿದೆ. ಇತರ ಇಬ್ಬರು ಸಂತ್ರಸ್ತರನ್ನು ಇನ್ನೂ ಗುರುತಿಸಲಾಗಿಲ್ಲ ಎಂದು ಅವರು ಹೇಳಿದರು.