ಧರ್ಮಸ್ಥಳ ಪ್ರಕರಣ : ಸೌಜನ್ಯ ಸಾವಿನ ಪ್ರಕರಣವನ್ನು ಎಸ್ಐಟಿ ಪರಿಗಣಿಸಲು ಸೌಜನ್ಯ ತಾಯಿ ಮನವಿ, ಪುರಸ್ಕರಿಸಿದ ಎಸ್ಐಟಿ

ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿರುವ ಮೊದಲ ಎಫ್‌ಐಆರ್ ಆಧರಿಸಿ ನಡೆಯುತ್ತಿರುವ ತನಿಖೆಯಲ್ಲಿ ಸೌಜನ್ಯ ಸಾವಿನ ಪ್ರಕರಣದ ಮೇಲಿನ ಅರ್ಜಿಯನ್ನು ಸೇರಿಸಲು ಸಾಮೂಹಿಕ ಅಂತ್ಯಕ್ರಿಯೆ ಪ್ರಕರಣದ ತನಿಖೆ ನಡೆಸುತ್ತಿರುವ ವಿಶೇಷ ತನಿಖಾ ತಂಡ (ಎಸ್‌ಐಟಿ) ನಿರ್ಧರಿಸಿದೆ. ಅಕ್ಟೋಬರ್ 2012 ರಲ್ಲಿ ಅತ್ಯಾಚಾರ ಮತ್ತು ಹತ್ಯೆಗೀಡಾದ ಸೌಜನ್ಯ ಸಾವಿನ ಬಗ್ಗೆ ಅವರ ತಾಯಿ ಕುಸುಮಾವತಿ ಅವರಿಗೆ ನೀಡಿದ ಸ್ವೀಕೃತಿಯಲ್ಲಿ ಎಸ್‌ಐಟಿ ಇದನ್ನು ತಿಳಿಸಿದೆ.

“ನೀವು ಸಲ್ಲಿಸಿದ ಅರ್ಜಿಯನ್ನು ಪರಿಶೀಲಿಸಲಾಗಿದೆ ಮತ್ತು ಅರ್ಜಿಯಲ್ಲಿ ಎತ್ತಲಾದ ಅಂಶಗಳನ್ನು ಧರ್ಮಸ್ಥಳ ಪೊಲೀಸ್ ಠಾಣೆ ಪ್ರಕರಣ ಸಂಖ್ಯೆ 39/2025 ರ ತನಿಖೆಯಲ್ಲಿ ಸೂಕ್ತವಾಗಿ ಸೇರಿಸಲಾಗುವುದು” ಎಂದು ಸ್ವೀಕೃತಿ ಪತ್ರದಲ್ಲಿ ಎಸ್‌ಐಟಿ ತಿಳಿಸಿದೆ.

ಗುರುವಾರ ಮಧ್ಯಾಹ್ನ ಕುಸುಮಾವತಿ ಬೆಳ್ತಂಗಡಿಯಲ್ಲಿರುವ ಎಸ್‌ಐಟಿ ಕಚೇರಿಗೆ ಭೇಟಿ ನೀಡಿ ತಮ್ಮ ಅರ್ಜಿಯನ್ನು ಸಲ್ಲಿಸಿದರು. 13 ವರ್ಷಗಳು ಕಳೆದರೂ 17 ವರ್ಷದ ಬಾಲಕಿ ಸೌಜನ್ಯ ಕೊಲೆಯ ಹಿಂದಿನ ನಿಜವಾದ ಅಪರಾಧಿಗಳನ್ನು ಗುರುತಿಸಲಾಗಿಲ್ಲ ಎಂದು ಕುಸುಮಾವತಿ ಅರ್ಜಿಯಲ್ಲಿ ಬೇಸರ ವ್ಯಕ್ತಪಡಿಸಿದ್ದಾರೆ. ಎಸ್‌ಐಟಿ ಪ್ರಸ್ತುತ ಸಾಕ್ಷಿ ದೂರುದಾರ ಚಿನ್ನಯ್ಯ ಎಂಬ ಶಂಕಿತನನ್ನು ವಶಕ್ಕೆ ಪಡೆದುಕೊಂಡಿದ್ದು, ಹಲವಾರು ದಿನಗಳಿಂದ ವಿಚಾರಣೆ ನಡೆಸುತ್ತಿದೆ.

ಸ್ಥಳೀಯವಾಗಿ ಮೃತದೇಹಗಳನ್ನು ವಿಲೇವಾರಿ ಮಾಡುವಲ್ಲಿ ಹೆಸರುವಾಸಿಯಾದ ಚಿನ್ನಯ್ಯನಿಗೆ ಈ ಅಪರಾಧದ ಬಗ್ಗೆ ಮೊದಲೇ ತಿಳಿದಿತ್ತು ಆದರೆ ಹಿಂದಿನ ಹೇಳಿಕೆಗಳಲ್ಲಿ ಅದನ್ನು ಮರೆಮಾಚಿದ್ದರು ಎಂದು ಕುಸುಮಾವತಿ ಆರೋಪಿಸಿದ್ದಾರೆ. ಸೌಜನ್ಯಳ ಹತ್ಯೆಗೆ ಸಂಬಂಧಿಸಿದ ಜೀವ ಬೆದರಿಕೆಯಿಂದಾಗಿ ಚಿನ್ನಯ್ಯ 2014 ರಲ್ಲಿ ಧರ್ಮಸ್ಥಳವನ್ನು ತೊರೆದಿದ್ದಾರೆ ಎಂದು  ಕುಸುಮಾವತಿ ಎಸ್ಐಟಿಗೆ ಸಲ್ಲಿಸಿದ ದೂರು/ಮನವಿಯಲ್ಲಿ ಹೇಳಿದ್ದಾರೆ.

ಅರ್ಜಿಯ ಪ್ರಕಾರ, ಆಗಸ್ಟ್ 12 ಮತ್ತು 13 ರಂದು ರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ (NHRC) ನಡೆಸಿದ ವಿಚಾರಣೆಯ ಸಂದರ್ಭದಲ್ಲಿ, ಚಿನ್ನಯ್ಯ ಅವರ ಸಹೋದರಿ ರತ್ನಾ, ಧರ್ಮಸ್ಥಳ ದೇವಸ್ಥಾನದ ಹಿರಿಯ ವ್ಯಕ್ತಿಯೊಬ್ಬರು ಅಪರಾಧದ ವಿವರಗಳನ್ನು ಬಹಿರಂಗಪಡಿಸಿದರೆ ಭೀಕರ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ಚಿನ್ನಯ್ಯ ಅವರಿಗೆ ಬೆದರಿಕೆ ಹಾಕಿದ್ದರು ಎಂದು ಸಾಕ್ಷ್ಯ ನುಡಿದಿದ್ದಾರೆ. ಈ ಬೆದರಿಕೆಯೇ ಚಿನ್ನಯ್ಯ ಅವರನ್ನು ಪರಾರಿಯಾಗುವಂತೆ ಮಾಡಿತು ಎಂದು ಕುಟುಂಬ ನಂಬುತ್ತದೆ ಎಂದು ಕುಸುಮಾವತಿ ಎಸ್ಐಟಿಗೆ ಹೇಳಿದ್ದಾರೆ.