ಮುಂದಿನ ದಿನಗಳಲ್ಲಿ ಭಾರತ ನೀರಿಗಾಗಿ ಪರದಾಡಲಿದೆ: ಮೂಡೀಸ್

ಹೊಸದೆಹಲಿ: ಈ ವರ್ಷ ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಗರಿಷ್ಠ ತಾಪಮಾನ ದಾಖಲಾಗಿದೆ. ಇದರೊಂದಿಗೆ ರಾಜ್ಯವನ್ನು ನೀರಿನ ಸಮಸ್ಯೆಯೂ ಕಾಡುತ್ತಿದೆ.

ದೆಹಲಿಯ ಜನರು ಕುಡಿಯಲು ನೀರಿಲ್ಲದೆ ಪರದಾಡುತ್ತಿದ್ದಾರೆ. ಈ ಹಿಂದೆ ಕರ್ನಾಟಕವೂ ನೀರಿನ ಸಮಸ್ಯೆ ಎದುರಿಸಿತ್ತು. ಈ ಎರಡು ರಾಜ್ಯಗಳು ಮಾತ್ರ ದೇಶದಲ್ಲಿ ನೀರಿನ ಸಮಸ್ಯೆ ಎದುರಿಸುತ್ತಿವೆ ಎಂದು ಭಾವಿಸಿದರೆ ತಪ್ಪಾಗುತ್ತದೆ.

ಹವಾಮಾನ ಬದಲಾವಣೆಯಿಂದಾಗಿ ಭಾರತವು ಭವಿಷ್ಯದಲ್ಲಿ ತೀವ್ರ ನೀರಿನ ಬಿಕ್ಕಟ್ಟನ್ನು ಎದುರಿಸಲಿದೆ ಎಂದು ಮೂಡೀಸ್ ರೇಟಿಂಗ್ ಕಂಪನಿ ಇತ್ತೀಚೆಗೆ ಎಚ್ಚರಿಸಿದೆ. ಮುಂದಿನ ದಿನಗಳಲ್ಲಿ ಭಾರತದಲ್ಲಿ ನೀರಿನ ಸಮಸ್ಯೆ ಹೆಚ್ಚಾಗಲಿದೆ. ಇದು ಬಳಕೆಯ ಬೆಳವಣಿಗೆ, ಆರ್ಥಿಕ ಅಭಿವೃದ್ಧಿ ಮತ್ತು ದೇಶೀಯ ಸಾಲದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುವ ಸಾಧ್ಯತೆಯಿದೆ ಎಂದು ಮೂಡೀಸ್ ಎಚ್ಚರಿಸಿದೆ. ಅದರಲ್ಲೂ ನೀರಿನ ಸಮಸ್ಯೆಯಿಂದ ಕಂಪನಿಗಳು, ಕೃಷಿ ಕ್ಷೇತ್ರ ತೀವ್ರ ಸಂಕಷ್ಟಕ್ಕೆ ಸಿಲುಕುವ ಸಾಧ್ಯತೆ ಇದೆ. ಪರಿಣಾಮವಾಗಿ ಆಹಾರ ಪದಾರ್ಥಗಳ ಬೆಲೆ ಏರುತ್ತದೆ. ವ್ಯಾಪಾರ ಕ್ಷೇತ್ರದ ಮೇಲೆ ಪರಿಣಾಮ ಬೀರಲಿದೆ. ಒಟ್ಟಾರೆ ನೀರಿನ ಸಮಸ್ಯೆಯಿಂದ ಸಮಾಜದಲ್ಲಿ ಅಶಾಂತಿ ತಲೆದೋರುವ ಅಪಾಯವಿದೆ ಎಂದು ಮೂಡೀಸ್ ತಿಳಿಸಿದೆ.‌

ಭಾರತದ ಜನಸಂಖ್ಯೆಯ ಶೇಕಡಾ 40ಕ್ಕಿಂತ ಹೆಚ್ಚು ಜನರು ಕೃಷಿಯನ್ನು ಅವಲಂಬಿಸಿದ್ದಾರೆ. ಇವರೆಲ್ಲ ನೀರಿನ ಸಮಸ್ಯೆಗೆ ತುತ್ತಾಗುವ ಸಾಧ್ಯತೆ ಇದೆ. ಅದೇ ರೀತಿ ಈ ಬಿಕ್ಕಟ್ಟು ದೇಶದ ಬೆಳವಣಿಗೆಯಲ್ಲಿ ಅಸ್ಥಿರತೆಯನ್ನು ಹೆಚ್ಚಿಸಲಿದೆ ಎಂದು ಮೂಡೀಸ್ ಹೇಳಿದೆ. ನೀರಿನ ಒತ್ತಡದಿಂದಾಗಿ ಕಲ್ಲಿದ್ದಲು ಆಧಾರಿತ ವಿದ್ಯುತ್ ಉತ್ಪಾದನಾ ಕಂಪನಿಗಳು ಮತ್ತು ಉಕ್ಕು ಕಂಪನಿಗಳು ಭವಿಷ್ಯದಲ್ಲಿ ಹಲವು ಸಮಸ್ಯೆಗಳನ್ನು ಎದುರಿಸಲಿದ್ದು, ಕೈಗಾರಿಕಾ ಕ್ಷೇತ್ರಕ್ಕೆ ಧಕ್ಕೆಯಾಗುವ ಸಾಧ್ಯತೆ ಇದೆ ಎಂದು ಮೂಡೀಸ್ ಕಂಪನಿ ತಿಳಿಸಿದೆ.

ನೀರು ನಿರ್ವಹಣೆಯಲ್ಲಿ ಭಾರತ ಜಿ20 ಆರ್ಥಿಕತೆಗಿಂತ ಬಹಳ ಹಿಂದುಳಿದಿದೆ ಎಂಬುದನ್ನು ಈ ಸಂದರ್ಭದಲ್ಲಿ ಮೂಡೀಸ್ ನೆನಪಿಸಿತು. ಭಾರತವು ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯಾಗಿದ್ದರೂ, ಕೈಗಾರಿಕೀಕರಣಗೊಂಡ ಮತ್ತು ನಗರೀಕರಣಗೊಂಡಿದ್ದರೂ ಮತ್ತು ವಿಶ್ವದಲ್ಲೇ ಅತಿ ಹೆಚ್ಚು ಜನಸಂಖ್ಯೆಯನ್ನು ಹೊಂದಿದ್ದರೂ, ಅವಶ್ಯಕತೆಗಳಿಗೆ ಅನುಗುಣವಾಗಿ ನೀರು ಲಭ್ಯವಿಲ್ಲ. ಈಗಾಗಲೇ ತಲಾ ಸರಾಸರಿ ವಾರ್ಷಿಕ ನೀರಿನ ಲಭ್ಯತೆ ಕಡಿಮೆಯಾಗಿದೆ. 2021ರಲ್ಲಿ ಸರಾಸರಿ ವಾರ್ಷಿಕ ತಲಾ ನೀರಿನ ಲಭ್ಯತೆ 1,486 ಘನ ಮೀಟರ್ ಇತ್ತು. ಇದು 2031ರ ವೇಳೆಗೆ ಇದು 1,367 ಕ್ಯೂಬಿಕ್ ಮೀಟರ್‌ಗೆ ಇಳಿಯಲಿದೆ ಎಂದು ಮೂಡೀಸ್ ಭವಿಷ್ಯ ನುಡಿದಿದೆ. ಜಲಸಂಪನ್ಮೂಲ ಸಚಿವಾಲಯದ ಪ್ರಕಾರ, 1,700 ಕ್ಯೂಬಿಕ್ ಮೀಟರ್‌ಗಿಂತ ಕಡಿಮೆ ಮಟ್ಟವು ನೀರಿನ ಲಭ್ಯತೆ ನೀರಿನ ಒತ್ತಡವನ್ನು ಸೂಚಿಸುತ್ತದೆ. ಅದೇ 1,000 ಕ್ಯೂಬಿಕ್ ಮೀಟರ್ ಆಗಿದ್ದರೆ ಅದು ನೀರಿನ ಕೊರತೆಯನ್ನು ಸೂಚಿಸುತ್ತದೆ.

ಭಾರತದಲ್ಲಿ ಪರಿಸರ ಬದಲಾವಣೆಯಿಂದಾಗಿ ದೆಹಲಿ ಸೇರಿದಂತೆ ಉತ್ತರದ ರಾಜ್ಯಗಳಲ್ಲಿ 50 ಡಿಗ್ರಿ ತಾಪಮಾನ ದಾಖಲಾಗುತ್ತಿದೆ. ಮತ್ತೊಂದೆಡೆ ಭಾರಿ ಮಳೆ, ಪ್ರವಾಹ ಉಂಟಾಗಿದೆ. ಏಕಾಏಕಿ ಮಳೆ ಬಂದರೂ ಮಳೆ ನೀರು ಹಿಡಿದಿಟ್ಟುಕೊಳ್ಳಲು ಜಾಗ ಸಾಕಾಗುವುದಿಲ್ಲ. ಇದರಿಂದ ಮೂಲಸೌಕರ್ಯಕ್ಕೂ ತೊಂದರೆಯಾಗಲಿದೆ ಎಂದು ಮೂಡೀಸ್ ಹೇಳಿದೆ.

ಮಾನ್ಸೂನ್ ಮಳೆಯೂ ಕ್ರಮೇಣ ಕಡಿಮೆಯಾಗುತ್ತಿದೆ ಎಂದು ಭಾರತೀಯ ಉಷ್ಣವಲಯದ ಹವಾಮಾನ ಸಂಸ್ಥೆ (ಐಐಟಿಎಂ) ಹೇಳಿದೆ. 1950-2020ರ ಅವಧಿಯಲ್ಲಿ, ಹಿಂದೂ ಮಹಾಸಾಗರವು ಪ್ರತಿ ಶತಮಾನಕ್ಕೆ 1.20 ಡಿಗ್ರಿ ಸೆಲ್ಸಿಯಸ್ ದರದಲ್ಲಿ ಬೆಚ್ಚಗಾಗಿದೆ. ಐಐಟಿಎಂ ಪ್ರಕಾರ, ಇದು 2020-2100ರ ನಡುವೆ 1.7-3.8 ಡಿಗ್ರಿ ಸೆಲ್ಸಿಯಸ್‌ಗೆ ಏರುತ್ತದೆ. ಹೆಚ್ಚುತ್ತಿರುವ ಸಮುದ್ರದ ಉಷ್ಣತೆಯಿಂದಾಗಿ ದುರ್ಬಲ ಮಾನ್ಸೂನ್ ಮಳೆಯು ಸಾಮಾನ್ಯ. ಇದರಿಂದಾಗಿ ಮಳೆ ಅಥವಾ ಆಗಾಗ ಬರ ಪರಿಸ್ಥಿತಿ ಎದುರಾಗುವ ಸಾಧ್ಯತೆ ಇದೆ ಎಂದು ಐಐಟಿಎಂ ಹೇಳಿದೆ.